မဲခေါင်၊ မေ ၈
ယမန်နေ့က ဟောမုဇ်ရေလက်ကြားကို ဖြတ်သန်းခဲ့သည့် အမေရိကန်ရေတပ် ဖျက်သင်္ဘော ၃ စီး တိုက်ခိုက်ခံခဲ့ရပြီးနောက် အမေရိကန်က အီရန်ဆိပ်ကမ်း ၂ ခုကို ပြန်လည် တိုက်ခိုက်ခဲ့ကြောင်း သိရသည်။
အမေရိကန်ရေတပ် ဖျက်သင်္ဘောများဖြစ်သော USS Truxton, USS Mason and USS Rafael Peralta တို့ကို အီရန်က ဒုံးကျည်များ၊ ဒရုန်းများ၊ စပိဘုတ်များဖြင့် တိုက်ခိုက်ခဲ့သည်။
၎င်းတိုက်ခိုက်မှုများကို အမေရိကန်အလယ်ပိုင်းစစ်ဌာနချုပ် – CENTCOM က အတည်ပြုခဲ့ပြီး အမေရိကန် စစ်ဘက်ကလည်း အီရန်စစ်စခန်းများ၊ ဒရုန်းနှင့် ဒုံးကျည်ပစ်လွှတ်ရာ နေရာများကို မိမိကိုယ်ကိုယ် ကာကွယ်သော ပစ်ခတ်မှုများဖြင့် တုံ့ပြန်ခဲ့ကြောင်း ထုတ်ပြန် ပြောကြားသည်။
ရေလက်ကြားကို မေးတင်ထားသော အီရန်၏ ဘန်ဒါအဘတ်စ် နှင့် ကီရှန် ဆိပ်ကမ်းတို့ကိုလည်း အမေရိကန်စစ်ဘက်က ပစ်မှတ်ထားခဲ့ကြောင်း အမေရိကန်အရာရှိ အများအပြားက စီဘီအက်စ်သတင်းအား ပြောပြကြသည်။
အီရန်ပစ်မှတ်များကို တိုက်ခိုက်ခဲ့သော်လည်း အပစ်အခတ်ရပ်စဲမှုကို ဆက်လက် သက်ရောက်မှု ရှိနေဆဲဖြစ်ကြောင်း နှင့် အီရန်နှင့်တိုက်ခိုက်မှုကို “ချစ်လို့စတာ” ဟုသမ္မတ ထရမ့်က အေဘီစီသတင်းဌာနကို ပြောကြားသည်။
“သူတို့က ဒီကနေ့မှာ ယီးတီးယားတား လာလုပ်လို့ ကျနော်တို့ သူတို့ကို တောက်ချပစ်လိုက်ပါတယ်” ဟု ထရမ့်က ပြောကြားပြီး အီရန်က ထိုသို့ မလုပ်ခဲ့သင့်ဟု ဆက်ပြောသည်။
အမေရိကန်ဖျက်သင်္ဘော ၃ စီး တိုက်ခိုက်ခံရမှုသည် ၎င်းတို့ထဲမှ ၂ စီး ပြီးခဲ့သည့်ရက်ပိုင်းက ကြုံတွေ့ခဲ့ရသည်ထက် ပိုမိုပြင်းထန်ပြီး ပိုမိုရှည်ကြာခဲ့ကြောင်း အမေရိကန်အရာရှိများက ပြောကြသည်။
အီရန် အမြန်ရေယာဉ်ငယ်များသည် အမေရိကန်စစ်သင်္ဘောများ အနီးအထိ ရောက်ရှိလာခဲ့ကြရာ ၎င်းတို အနားမကပ်နိုင်စေရန် စစ်သင်္ဘောက ပြန်လည် ပစ်ခတ်ခဲ့ကြောင်း တရားဝင် ထုတ်ဖော်ပြော၍ မရသဖြင့် အမည်မဖော်လိုသည့် အမေရိကန် အရာရှိကြီးများက စီဘီအက်စ်ရုပ်သံကို ပြောကြားသည်။
အမေရိကန်စစ်သင်္ဘောများနှင့် အထောက်အကူပြု လေယာဉ်များသည် ၂ နာရီ၊ ၃ နာရီခန့် အဆင့်ဆင့် ခံစစ် တည်ဆောက်ခဲ့ကာ ၅ လက်မ ရေတပ်စက်သေနတ်များနှင့် CIWS ဟု ခေါ်သော အနီးကပ်ပစ် လက်နက်စနစ်များကိုပါ အသုံးပြုခဲ့ရကြောင်း ကန်အရာရှိများက ပြောကြားသည်။
အမေရိကန် အပါချီရဟတ်ယာဉ်များက ငရဲမီး ဒုံးကျည်များ ပစ်လွှတ်ခဲ့သလို သင်္ဘောပေါ်မှ ရေတပ်သားများကလည်း ချဉ်းကပ်လာသော အီရန် စပိဘုတ်များကို လက်နက်ငယ်များဖြင့် ပစ်ခတ်ခဲ့ရပြီး အခြားလေ ယာဉ်များလည်း ပါဝင်ကူညီခဲ့ကြောင်း သိရသည်။
တိုက်ခိုက်မှုအတွင်း အီရန်စစ်တပ်က ဒုံးကျည်များ၊ ဒရုန်းများ ပစ်လွှတ်ခဲ့သော်လည်း အမေရိကန်တပ်ဖွဲ့ဝင်များကို ထိမှန်ခြင်း၊ သင်္ဘောများ ပျက်စီးခြင်း မဖြစ်ခဲ့ကြောင်း သိရသည်။
အီရန်ဘက်မှ တိုက်ခိုက်သူများအပေါ် ကြီးမားစွာ ဖျက်ဆီးပစ်ခဲ့ကြောင်း သမ္မတ ထရမ့်က ၎င်းပိုင် Truth Social လူမှုကွန်ရက်ပေါ်တွင် ရေးသားသည်။
အေးကျော်
Ref:CBS News
#MeKongNews
#စစ်သင်္ဘောများ
#အီရန်ဆိပ်ကမ်း
#အမေရိကန်
#တိုက်ခိုက်
