မဲခေါင်၊ ဧပြီ ၂၉
ရှမ်းပြည်တောင်ပိုင်း၊ ပင်လောင်းမြို့နယ် နယ်စပ်ရှိ ဆောင်းပြောင်းကျေးရွာတွင် PNO နှင့် စစ်ကောင်စီတပ်ဖွဲ့ဝင်အင်အား ၃၀၀ ဝန်းကျင် စုဝေးရောက်ရှိနေပြီး ဖယ်ခုံအနောက်ဘက်ခြမ်းနှင့် မိုးဗြဲဒေသဘက်သို့ စစ်ရေးလှုပ်ရှားမှုများ တိုးမြှင့်လာနိုင်ကြောင်း ဒေသခံများနှင့် စစ်ရေးနီးစပ်သည့် သတင်းရင်းမြစ်များထံမှ သိရသည်။
ဒေသခံများ၏ ပြောကြားချက်အရ လတ်တလော ရက်ပိုင်းအတွင်း ဆောင်းပြောင်းကျေးရွာအနီး PNO နှင့် စစ်ကောင်စီ ပူးပေါင်းတပ်များ လှုပ်ရှားမှု ပိုမိုများပြားလာပြီး လူအင်အားများ စုဝေးနေသည့်အပြင် ရိက္ခာနှင့် စစ်ရေး ပြင်ဆင်မှုများလည်း ပြုလုပ်နေကြောင်း သိရသည်။
“ဆောင်းပြောင်းဖက်မှာ PNO နဲ့ စစ်ကောင်စီ လူအင်အား ၃၀၀ လောက် စုထားတယ်လို့ သိရတယ်။ မိုးဗြဲနဲ့ ဖယ်ခုံအနောက်ဖက်ကို လှုပ်ရှားလာနိုင်တယ်လို့ ဒေသခံတွေကြား ပြောဆိုနေကြတယ်” ဟု ဒေသခံတစ်ဦးက မဲခေါင်သို့ ပြောသည်။
လက်ရှိ မိုးဗြဲဒေသအတွင်း စစ်ရေးတင်းမာမှုများ ဆက်လက်ရှိနေပြီး စစ်ကောင်စီဘက်မှ လက်နက် ကြီးပစ်ခတ်မှုနှင့် စစ်ရေးလှုပ်ရှားမှုများကြောင့် ဒေသခံအချို့မှာ နေရပ်စွန့်ခွာ တိမ်းရှောင်နေရဆဲဖြစ်ကြောင်း သိရသည်။
မိုးဗြဲဒေသသည် ကရင်နီပြည်နယ်နှင့် ရှမ်း – ကရင်နီအစပ်ရှိ စစ်ရေးအရ အရေးပါသည့် နေရာတစ်ခုဖြစ်ပြီး တော်လှန်ရေးတပ်ဖွဲ့များနှင့် စစ်ကောင်စီတပ်များအကြား တိုက်ပွဲများ မကြာခဏ ဖြစ်ပွားလေ့ရှိသည်။
ယခု ပင်လောင်းနယ်စပ်ဘက်တွင် လူအင်အား အများအပြား စုဝေးလာမှုကြောင့် ဒေသတွင်း စစ်ရေး ပိုမို တင်းမာလာနိုင်ကြောင်း စစ်ရေးစောင့်ကြည့်သူများက သုံးသပ်နေကြသည်။
“အရင်ကတည်းက မိုးဗြဲဖက် စစ်ရေး မတည်ငြိမ်သေးဘူး။ အခု လူအင်အားတွေ ထပ်စုလာတော့ ဒေသခံတွေ ပိုစိုးရိမ်လာတယ်” ဟု မိုးဗြဲဒေသခံတစ်ဦးက ဆိုသည်။
လတ်တလော စစ်ရေးအခြေအနေကြောင့် ပင်လောင်း – ဖယ်ခုံ – မိုးဗြဲ လမ်းပိုင်းတစ်လျှောက် သွားလာရေးနှင့် ကုန်စည် စီးဆင်းမှုများတွင်လည်း အခက်အခဲများ ပိုမိုဖြစ်ပေါ်လာနိုင်ကြောင်း ဒေသခံများက ပြောသည်။
#MeKongNews
#ပင်လောင်း
#PNO
#စစ်ကောင်စီတပ်
#မိုးဗြဲဒေသ
