မဲခေါင်၊ ဧပြီ ၂၈

ရှမ်းပြည်မြောက်ပိုင်း၊ လားရှိုးမြို့ရှိ အရှေ့မြောက်တိုင်းစစ်ဌာနချုပ် (ရမခ) သို့ ယနေ့တွင် MNDAA က လွှတ်လိုက်ပေးသည့် စစ်သုံ့ပန်း ၆၈ ဦး ပြန်လည်ရောက်ရှိလာကြောင်း နယ်မြေ သတင်းအရင်းအမြစ်များအရ သိရသည်။

MNDAA မှ ပြန်လည်လွှတ်ပေးခဲ့သည့် ယင်းစစ်သုံပန်း ၆၈ ဦးမှာ ယနေ့ ဧပြီ ၂၈ ရက် နံနက်ပိုင်းက MNDAA ထိန်းချုပ် မယ်ဟန်ဘက်မှ စစ်ကောင်စီထိန်းချုပ် လားရှိုးမြို့အတွင်းရှိ ရမခသို့ ရောက်ရှိလာခြင်းဖြစ်သည်ဟု ဆိုသည်။

“ဘယ်တပ်တွေ ဘယ်အဆင့်တွေ ပါတယ် မသိရသေးဘူး၊ လောက်ကိုင်၊ ချင်းရွှေဟော်ဘက်ကလို့လည်းသိရတယ်။ ကြားတာတော့ နောက်ထပ်လက်ကျန်တွေ မေလထဲ အကုန်ပြန်လွှတ်မယ်ပြောတယ်”ဟု သတင်းရင်းမြစ်က ဆိုသည်။

လားရှိုးမှ တပ်တွင်းသတင်းရင်းမြစ်တစ်ဦးကလည်း ယမန်နေ့က လွတ်မည် ထင်သော်လည်း ယနေ့ ဧပြီ ၂၈ ရက်မှသာ ၆၀ ကျော် လွတ်မြောက်လာကြောင်း၊ တိုင်းတစ်နေရာမှာထားပြီး မကြာမီအခြားတစ်နေရာသို့ ရောက်ရှိလျှင် မိသားစုများနှင့် ပြန်လည် တွေ့ဆုံနိုင်မည်ဖြစ်သဖြင့် ဖုန်းများဖွင့်ထားကြရန် tiktok မှပြောကြားထားသည်ကို တွေ့ရသည်။

MNDAA သည် ပြီးခဲ့သည့် မတ် ၁၈ ရက်ကလည်း ချင်းရွှေဟော်ဘက်မှ စစ်သုံ့ပန်း ၁၀၀ ကျော်ကို လွှတ်ပေးခဲ့သေးသည်။

“ပြန်လွတ်လာပေမယ့် တပ်က ထွက်ခွင့်မရဘူး၊ ဆေးကုပြီးတာနဲ့ ရှေ့တန်းပြန်လွှတ်နေတာ။ စစ်တပ်က အသက်ရှင်လျက် ထွက်မရဘဲ သေမှ ထွက်ရမှာဖြစ်လို့ လုံးဝ စိတ်မချမ်းသာဘူး”ဟု ပြန်လည် လွတ်မြောက်လာသည့် တပ်ကြပ်တစ်ဦး၏ မိသားစုဝင်တစ်ဦးက ပြောသည်။

MNDAA သည် ပြီးခဲ့သည့် ဖေဖော်ဝါရီ ၂၈ ရက်ကလည်း လောက်ကိုင်နှင့် ကွမ်းလုံဘက်မှ စစ်သုံ့ပန်း ၂၀၀ ကျော်ကို လွှတ်ပေးခဲ့သေးသည်။

၁၀၂၇ စစ်ဆင်ရေးအတွင်း စစ်ကောင်စီသုံ့ပန်းနှင့် မိသားစုဝင် ထောင်နှင့်ချီ၍ ဖမ်းဆီးရမိခဲ့သော်လည်း MNDAA က ပြန်လည် လွှတ်ပေးလျက်ရှိရာ မဲခေါင်မှ မှတ်တမ်းတင်ထားချက်အရ အနီးစပ်ဆုံး လူဦးရေ ၃ ထောင်ဝန်းကျင်အထိ ပြန်လည် လွှတ်ပေးခဲ့ပြီး ဖြစ်သည်။

မဲခေါင်မှ မှတ်သားထားသည့်စာရင်းများအရ ယခုနှစ် ဇန်နဝါရီ ၁၄ ရက်တွင် စစ်သုံ့ပန်း ၈၀ ဦးနှင့် ဇန်နဝါရီ ၃၁ ရက်က ၂၀၆ ဦး ပြန်လွှတ်ပေးခဲ့သည်။

ထို့ပြင် ပြီးခဲ့သည့် ၂၀၂၅ ခုနှစ်၊ အောက်တိုဘာ ၁၅ ရက်နှင့် နိုဝင် ဘာ ၁၅ ရက်၌လည်း ၁၀၂၇ စစ်ဆင်ရေးကာလက ဖမ်းဆီးခဲ့သည့် စစ်ဆင်ရေးကွပ်ကဲမှုဌာ နချုပ် – စကခ (၁၄) လက်အောက်ခံတပ်ရင်း ခ လရ (၂၇၇) မှ ဗိုလ်မှူး ကျော်ဇေယျ၊ စကခ (၁) မှ ဗိုလ်မှူးအောင်မြင့်ထူး အပါအဝင် သုံ့ပန်း၂၅၀ ခန့်ကိုလည်း MNDAA က ပြန်လွှတ်ပေးခဲ့သေးသည်။

ထို့နောက် ၂၀၂၄ ခုနှစ်၊ ဇန်နဝါရီ ၅ ရက်က လောက်ကိုင်ဒကစကို တိုက်ခိုက် သိမ်းပိုက်ချိန်၌ လက်နက် ချ အညံ့ခံခဲ့သည့် လောက်ကိုင်ဒကစမှူး ဗိုလ်မှူးချုပ်မိုးကျော်သူ၊ ဗိုလ်မှူးချုပ် ထွန်းထွန်းမြင့် အပါအဝင် ဗိုလ်မှူးချုပ် ၆ ဦး၊ အရာရှိ ၂၂၈ ဦး၊ အခြားအဆင့် ၁၈၉၅ ဦးကို ဖမ်းပြီးနောက် MNDAA က ပြန်လွှတ် ပေးခဲ့သည်။

လားရှိုးမြို့၊ အရှေ့မြောက်တိုင်းစစ်ဌာနချုပ်ကို သိမ်းသည့် တိုက်ပွဲတွင်လည်း တိုင်းမှူးဟောင်း ဗိုလ်ချုပ်စိုးတင့်၊ စစ်ဆင်ရေးကွပ်ကဲမှု ဌာနချုပ်(၁) ဗိုလ်မှူးချုပ် မျိုးမင်းထွေး၊ ရမခတိုင်း စစ်ဦးစီးချုပ် ဗိုလ်မှူးချုပ် သန့်ထင်စိုးတို့ကိုလည်း MNDAA က ဖမ်းမိခဲ့ပြီး စစ်ကောင်စီထံ ပြန်လွှဲပေးခဲ့သည်။

MNDAA သည် ၁၀၂၇ စစ်ဆင်ရေး စတင်ခဲ့ပြီး လားရှိုး၊ လောက်ကိုင်၊ ချင်းရွှေဟော်၊ မုံးကိုး၊ ဖောင်းဆိုင်၊ ကုန်းကြမ်း၊ ပန်လုံ၊ ကွမ်းလုံ၊ သိန္ဒီ၊ တာမိုးညဲ၊ ပန်ဆိုင်းမြို့များကို သိမ်းပိုက်ခဲ့သည်။

ထို့နောက် လားရှိုးမြို့ကိုမူ တရုတ်နိုင်ငံ၏ ဖိအားကြောင့် စစ်ကောင်စီထံ MNDAA က ပြန်လည် လွှဲပြောင်းပေးခဲ့သည်မှာ ယခု ဧပြီ ၂၄ ရက်တွင် တစ်နှစ်ပြည့်ခဲ့ပြီ ဖြစ်သည်။

#MeKongNews
#MNDAA
#လွှတ်ပေး
#စစ်သုံပန်း
#ရမခ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)