မဲခေါင်၊ ဧပြီ ၂၈

ယမန်နေ့နံနက်ပိုင်းက ထိုင်းနိုင်ငံ၊ နခွန်ရက်ချာစီမာခရိုင်ရှိ ရွှေဆိုင်တစ်ဆိုင်အား ဗြောင်ကျကျ ဝင်ရောက်လုယက်ပြီး ဘတ် ၃ သိန်းခန့် တန်ဖိုးရှိ ရွှေလက်စွပ်များကို ခိုးယူထွက်ပြေးသွားသည့် တရုတ်အမျိုးသားနှစ်ဦးကို ရဲတပ်ဖွဲ့က ဖမ်းဆီးလိုက်ပြီဖြစ်သည်။

ယင်းဖြစ်စဉ်သည် ယမန်နေ့ ဧပြီ ၂၇ ရက်၊ နံနက် ၁၀ နာရီကျော်တွင် ချော့ချိုင်းခရိုင်၊ ဒန်ကွီယန်တိုက်နယ်ရှိ ရွှေဆိုင်တစ်ဆိုင်၌ ဖြစ်ပွားခဲ့ခြင်းဖြစ်ပြီး ဆိုင်အတွင်း အမျိုးသမီးဝန်ထမ်း ၂ ဦး ရှိနေစဉ် မျက်နှာဖုံးစွပ်ထားသည့် အမျိုးသား ၂ ဦး ဝင်ရောက်လာခဲ့ခြင်း ဖြစ်သည်။

အနက်ရောင်လက်ရှည်အင်္ကျီ၊ ဘောင်းဘီတိုနှင့် မျက်နှာဖုံးများ တပ်ထားသည့် ထိုအမျိုးသားများကို မြင်တွေ့ရသည်နှင့် ဆိုင်ဝန်ထမ်းများက ဆိုင်အနောက်ဘက်သို့ ထွက်ပြေး တိမ်းရှောင်ခဲ့ကြကြောင်း ရဲတပ်ဖွဲ့က ပြောကြားသည်။

လုယက်သူများသည် သံဆန်ခါများကြောင့် ရွှေဆွဲကြိုးများကိုမူ မယူနိုင်ခဲ့ဘဲ ရွှေလက်စွပ်များ ထည့်ထားသည့် မှန်ဗီဒိုကို မာကျောသော အရာတစ်ခုဖြင့် ရိုက်ခွဲကာ ရွှေထည်များကို အမြန်ယူဆောင်၍ ထွက်ပြေးသွားခဲ့ကြခြင်း ဖြစ်သည်။

လုယက်မှုတစ်ခုလုံးမှာ စက္ကန့် ၃၀ ခန့်သာ ကြာမြင့်ခဲ့ပြီး ၎င်းနောက် အမျိုးသား ၂ ဦးသည် နံပါတ်ပြား မတပ်ထားသည့် အဖြူရောင်Toyota Yaris အမျိုးအစား ကားဖြင့် ထွက်ပြေးလွတ်မြောက်သွားခဲ့သဖြင့် ရဲတပ်ဖွဲ့က တစ်နိုင်ငံလုံး အတိုင်းအတာဖြင့် အရေးပေါ် သတိပေးချက်ထုတ်ပြန်ကာ လိုက်လံရှာဖွေခဲ့ရသည်။

တာဝန်ရှိသူများ၏ နောက်ဆက်တွဲ အတည်ပြုချက်အရ ဖမ်းဆီးရမိသူ ၂ ဦးမှာ တရုတ်နိုင်ငံသားများဖြစ်ကြပြီး ကွမ်တုံပြည်နယ်မှ အသက် ၂၇ နှစ်အရွယ် ဇူကင်တောင် နှင့် စီချွမ်းပြည်နယ်မှ အသက် ၁၉ နှစ်အရွယ် ဆောင်းဟောင်လုံတို့ ဖြစ်ကြောင်း သိရသည်။

လုယက်မှုတွင် အသုံးပြုခဲ့သည့် ကားကို စုံစမ်းစစ်ဆေးရာမှတစ်ဆင့် ကားငှားရမ်းသည့် ကုမ္ပဏီသို့ နောက်ကြောင်းပြန် ခြေရာခံနိုင်ခဲ့ပြီးနောက် ၎င်းနေ့မှာပင် ဘန်ကောက်မြို့၊ ပရာဝက်ခရိုင်ရှိ ကားငှားရမ်းသည့် ဆိုင်တစ်ခုတွင် ၎င်းတို့ ၂ ဦးကို ဖမ်းဆီးမိခဲ့ခြင်း ဖြစ်ကြောင်း ရဲတပ်ဖွဲ့က ထုတ်ပြန်ထားသည်။

ရဲတပ်ဖွဲ့သည် လူဝင်မှုကြီးကြပ်ရေးရဲတပ်ဖွဲ့၊ ဒေသခံ လုံခြုံရေးတပ်ဖွဲ့များနှင့် ပူးပေါင်းကာ တရားခံများကို ခြေရာခံနိုင်ခဲ့ပြီးနောက် ၎င်းတို့နှင့်အတူ လုယက်ထားသည့် ရွှေလက်စွပ်များကိုပါ သိမ်းဆည်းရမိခဲ့သည်။

ဖမ်းဆီးစဉ်အတွင်း လက်နက်တစ်စုံတစ်ရာ မတွေ့ရဘဲ ၎င်းတို့ထွက်ပြေးစဉ် လမ်း၌ စွန့်ပစ်ခဲ့သည်ဟု တရားခံများက ထွက်ဆိုထားကြောင်း သိရသည်။

ရဲတပ်ဖွဲ့၏ ကနဦးစုံစမ်းစစ်ဆေးချက်များအရ ၎င်းတို့နှစ်ဦးသည် ထိုင်းနိုင်ငံသို့ ကမ္ဘာလှည့်ခရီးသွား ဗီဇာဖြင့် ဝင်ရောက်လာသူများဖြစ်ပြီး နှစ်ဦးစလုံးတွင် ထိုင်းလူမျိုး ချစ်သူများရှိကြောင်း သိရသည်။

၎င်းတို့သည် ငွေကြေး ပြတ်လပ်သွားရာမှ ယခုကဲ့သို့ ရွှေဆိုင်လုယက်ရန် စီစဉ်ခဲ့ခြင်းဖြစ်ကြောင်း တာဝန်ရှိသူများက ဖြည့်စွက် ပြောကြားသည်။

လက်ရှိတွင် နခွန်ရက်ချာစီမာ ခရိုင်ရဲတပ်ဖွဲ့မှ စုံစမ်းစစ်ဆေးရေးအဖွဲ့က တရားခံများကို ခရိုင်အတွင်းသို့ ခေါ်ဆောင်ကာ ဆက်လက် စစ်ဆေးမေးမြန်းရန် သွားရောက်နေပြီဖြစ်ပြီး ဥပဒေအရ အရေးယူနိုင်ရေးအတွက် သက်သေအထောက်အထားများကို စုဆောင်းလျက်ရှိကြောင်း သိရသည်။

Ref: Khaosod

#MeKongNews
#ထိုင်း
#ရွှေဆိုင်
#ဝင်လုသည့်
#တရုတ်နိုင်ငံသား

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)