မဲခေါင်၊ ဧပြီ ၂၈
ရှမ်းပြည်အရှေ့ပိုင်း၊ တာချီလိတ်မြို့နှင့် မြို့အချို့တွင် လေပြင်းတိုက်ခတ်ပြီး မိုးရွာသွန်းမှုကြောင့် သစ်ပင်သစ်ကိုင်းအများအပြား ကျိုးကျကာ လမ်းပိတ်ဆို့မှုများနှင့် အဆောက်အအုံများ ပျက်စီးမှုများ ရှိခဲ့ကြောင်း ဒေသခံများထံမှ သိရသည်။
ယမန်နေ့ ဧပြီလ ၂၇ ရက်၊ ည ၇ နာရီခွဲခန့်တွင် တိုက်ခတ်ခဲ့သည့် လေပြင်းကြောင့် တာချီလိတ်မြို့နယ်အတွင်းရှိ ဆွတ်ဆိုင်ကျေးရွာ၊ ပါလျှံ (၂) ဝေဠုဝန်ကျောင်းလမ်း၊ ချစ်ကြည်ရေးလမ်းမပေါ်ရှိ ရှမ်းရိုးမကွင်းရှေ့၊ ဆန်ဆိုင်း (က) နှင့် အမှတ် (၁) ချစ်ကြည်ရေးတံတားပေါ်တို့တွင် သစ်ပင်ကြီးများ ကျိုးကျပျက်စီးခဲ့သည်။
ပုန်းထွန်ရပ်ကွက်အတွင်း၌လည်း ပျက်စီးမှုများရှိခဲ့သလို၊ နမ္မလင်းရွာ မယ်ဆိုင်ချောင်းဘေး လမ်းပေါ်တွင် ရပ်ထားသည့် သုံးဘီးဆိုင်ကယ်တစ်စီးမှာ လေပြင်းကြောင့် ချောင်းထဲသို့ ပြုတ်ကျသွားသဖြင့် မီးသတ်ဌာနက ဆယ်ယူပေးခဲ့ရကြောင်း သိရသည်။
တာချီလိတ်တွင် ပြီးခဲ့သည့် ဧပြီ ၁၈ ရက်က လေပြင်းတိုက်ခတ်ပြီးနောက် ၉ ရက်အတွင်း ၂ ကြိမ်မြောက်အဖြစ် ယခုကဲ့သို့ လေအပြင်းအထန် ထပ်မံတိုက်ခတ်ခြင်းဖြစ်သည်။
လေပြင်းတိုက်ခတ်စဉ်အတွင်း မိုးခြိမ်းခြင်းနှင့် မိုးကြိုးပစ်ခြင်းများလည်း ရှိခဲ့ကာ ဆိုင်းဘုတ်အချို့ ပြိုလဲခြင်း၊ ဓာတ်တိုင်များ မီးလောင်ခြင်းတို့ကြောင့် တစ်မြို့လုံး နာရီပိုင်းအကြာ လျှပ်စစ်မီး ပြတ်တောက်ခဲ့ရသည်။
ထိုင်းနိုင်ငံဘက်မှ ရယူထားသည့် (၁၁၅-ကေဗီ) ဓာတ်အားလိုင်းမှာ သစ်ပင်သစ်ကိုင်းများ ကျိုးကျမှုကြောင့် ည ၈ နာရီခန့်တွင် ပြတ်တောက်သွားပြီး ည ၉ နာရီခွဲတွင် ဓာတ်အား ပြန်လည်ပေးနိုင်ခဲ့ကြောင်း သိရသည်။ လေပြင်းကြောင့် တာချီလိတ် – မယ်ဆိုင် အမှတ် (၁) ချစ်ကြည်ရေးတံတားနှင့် မယ်ဆိုင်မြို့အတွင်း၌လည်း ထိခိုက်မှုများရှိခဲ့ပြီး၊ ဦးအောင်ဇေယျဘုရားရှိ ထီးတော်များ မြေခပျက်စီးမှုများလည်း ရှိခဲ့သည်။
အလားတူ ရှမ်းပြည်အရှေ့ပိုင်းရှိ ကျိုင်းတုံ၊ မိုင်းဖြတ်၊ မိုင်းတုံနှင့် မိုင်းဆတ်မြို့တို့တွင်လည်း လေပြင်းကျကာ မိုးရွာသွန်းမှုများ ရှိခဲ့သည်။
မိုင်းဆတ်မြို့နယ်တွင် ညနေ ၆ နာရီ ၃၅ မိနစ်ခန့်က တိုက်ခတ်သည့် လေပြင်းကြောင့် မယ်နင်ကျေးရွာအုပ်စု၊ ကာနကျေးရွာရှိ မိုင်းဆတ်-မိုင်းတုံသွား ကားလမ်းပေါ်တွင် သစ်ပင်လဲကျပြီး လမ်းပိတ်ဆို့မှု ဖြစ်ပွားခဲ့ရာ မီးသတ်တပ်ဖွဲ့ဝင်များက သွားရောက်ရှင်းလင်းခဲ့ရကြောင်း သိရသည်။
#MeKongNews
#တာချီလိတ်
#ရှမ်းအရှေ့
#လေပြင်းတိုက်
#ဦးအောင်ဇေယျဘုရား
