မဲခေါင်၊ ဧပြီ ၂၅
ထိုင်းနိုင်ငံ ကန်ချနာဘူရီ ပြည်နယ်၊ ဆန်ခလာဘူရီ ဒေသရှိ ဝဇီရာလောင်ကွန်းဆည်အား ပြုပြင်ထိန်းသိမ်းမှုလုပ်ရန် ၂၀၂၆ ခုနှစ်တွင် ဆည်ရေများ လွှတ်ချလိုက်ပြီး ရေများ ခန်းခြောက်သွားချိန်တွင် ကြာရှည်စွာ ပျောက်ကွယ်နေခဲ့သော ဒုတိယကမ္ဘာစစ် ရထားလမ်းနေရာတစ်ခု ပြန်ပေါ်လာကာ လွန်ခဲ့သော ၄၂ နှစ်ခန့်က သမိုင်းကို လှစ်ဟခွင့် ရရှိခဲ့သည်။
ရေအားလျှပ်စစ်ထုတ်ရန် နှင့် စိုက်ပျိုးရေးလုပ်ငန်းများ အတွက် တည်ဆောက်ခဲ့ပြီး ၁၉၈၄ ခုနှစ်တွင် ပြီးစီးခဲ့သော ဆည်သည် ပုံမှန်အားဖြင့် ယခု ပေါ်ထွက်လာသော နေရာများကို ရေအောက်တွင် ဖုံးကွယ်ထားခဲ့သည်။
Nithe ဘူတာရုံသည် ဒုတိယကမ္ဘာစစ်အတွင်းက တည်ဆောက်ခဲ့သော သေမင်းတမန်ရထားလမ်း တစ်လျှောက်ရှိ ဘူတာ ၆ ခုအနက် အရေးပါသော နေရာတစ်ခုဖြစ်ကာ မြန်မာနိုင်ငံထဲသို့ ဆက်သွားမည့် ရထားများ ဆီဖြည့်ပြီး သောက်သုံးရေ ဖြည့်တင်းသောနေရာလည်း ဖြစ်သည်။
ယခုအခါ အပေါ်စီးမှ ရိုက်ကူးထားသော မြင်ကွင်းများတွင် ရထားလမ်းဟောင်းနှင့် ရထားပြေးဆွဲမှု၊ ပြုပြင်ထိန်းသိမ်းမှုအတွက် အဓိကကျခဲ့သော ဗဟိုချက်နေရာတစ်ခု တည်ဆောက်ထားပုံများကို မြင်တွေ့လာရသည်။
အထင်ရှားဆုံး တွေ့ရှိရသောနေရာတစ်ခုမှာ ရထားများ ခေါင်းလှည့်သည့်နေရာ၌ စစ်ဆေးသည့်နေရာကို တွေ့ရခြင်းဖြစ်ကာ ယင်းနေရာ၌ အပေါ်ပိုင်း ကွန်ကရစ်ဖြင့် လုပ်ထားသည့် အစိတ်အပိုင်း ရှိနေသေးသော်လည်း ၎င်း၏ အောက်မှ သစ်သားများဖြင့် တည်ဆောက်ထားသည့် အစိတ်အပိုင်းများမှာ ကြာရှည်စွာကပင် ဆွေးမြေ့ ပျက်စီးသွားခဲ့ရပြီ ဖြစ်သည်။
ထိုစစ်ဆေးမှု လုပ်သောနေရာသည် ရှားရှားပါးပါး ကျန်ရှိသော စခန်းဖြစ်သည်ဟု သမိုင်းပညာရှင်များက ယူဆထားကာ အခြားနေရာများမှ အလားတူ စစ်ဆေးရေးရုံများမှာ ဖြိုဖျက်ခံရခြင်း၊ ပြန်လည် တည်ဆောက်မှုများကြောင့် ပျောက်ကွယ်သွားကြပြီး ဖြစ်သည်။
ယင်းနှင့်အတူ Nithe ဘူတာရုံ ယာယီပြန်လည် ပေါ်ထွက်လာခြင်းသည် စစ်ပွဲသမိုင်းကို စိတ်ဝင်စားသူများအတွက် သေမင်းတမန် ရထားလမ်း အကြွင်းအကျန်များကို လေ့လာရန် ထူးခြားသော အခွင့်အရေး ဖြစ်သည်။
၎င်းနေရာသည် ခရီးသွားနေရာတစ်ခုသာမက စစ်ပွဲကြောင့် လူသားများ သေကြေပျက်စီးမှု နှင့် အချိန်ကြာလာသည်နှင့်အမျှ မေ့မေ့ပျောက်ပျောက် ဖြစ်သွားနိုင်သည့် အရောင်မှိန်လာသော သမိုင်းတစ်ကွေ့ကို ဖော်ကျူးနေသော နေရာအဖြစ် တည်ရှိနေသည်။
အေးကျော်
Ref: The Nation
#MeKongNews
#ထိုင်း
#ဆည်ရေ
#သေမင်းတမန်ရထားလမ်း
#အစိတ်အပိုင်းများ
