မဲခေါင်၊ ဧပြီ ၁၁
အာရက္ခတပ်တော်- AA သည် အတုယူဖွယ် သက်သေပြယုဂ်တစ်ရပ် ဖြစ်သည်ဟု တအာင်းတပ်ဖွဲ့-TNLA နှင့် ကိုးကန့်တပ်ဖွဲ့- MNDAA က ပြောသည်။
ထို့ပြင် ညီနောင်မဟာမိတ်တပ်ဖွဲ့အနေဖြင့် တော်လှန်ရေးရည်မှန်းချက် ရောက်သည်အထိ အတူတကွ ကြိုးပမ်းဆောင်ရွက်သွားရန် ကတိသစ္စာပြုသည်ဟုလည်း မဟာမိတ်၂ ဖွဲ့က ဆိုသည်။
ဧပြီလ ၁၀ ရက်တွင် ကျရောက်ခဲ့သည့် အာရက္ခတပ်တော် – AA ဖွဲ့စည်းတည်ထောင်ခြင်း ၁၇ နှစ်ပြည့်သို့ ပေးပို့သည့် သဝဏ်လွှာတွင် TNLA နှင့် MNDAA က ယင်းကဲ့သို့ ထည့်သွင်း ပြောဆိုခြင်းဖြစ်သည်။
လက်ရှိအချိန်တွင် အာရက္ခတပ်တော်သည် ရက္ခိုင်ပြည်ရှိ ပြည်သူလူထု တစ်ရပ်လုံးအတွက် ပိုမိုကောင်းမွန်သည့် စီမံအုပ်ချုပ်မှု နှင့် လုံခြုံစိတ်ချရသည့် လူမှုဘဝကို ပေးစွမ်းနိုင်ရန် တော်လှန်ရေးလောကဓံအား ကြံ့ကြံ့ခံ၍ မြို့နယ်အားလုံးနီးပါးကိုလည်း သိမ်းပိုက် အုပ်ချုပ်ထားနိုင်ခဲ့ပြီဟု မဟာမိတ် ၂ ဖွဲ့က ပြောသည်။
“ဤသည်မှာ ‘စည်းလုံးခြင်းသည် အင်အား’ ဟူသည့် အာရက္ခတပ်တော် နှင့် ရက္ခိုင်ပြည်သူလူထုတို့၏ ခိုင်မာသော မျှော်မှန်းချက်တို့နှင့်အတူ ဥမကွဲသိုက်မပျက် ကြိုးပမ်းအားထုတ်မှု၊ စွန့်လွှတ်အနစ်နာခံမှု နှင့် စည်းလုံးညီညွတ်မှု ရလဒ်ဖြစ်ပြီး မြန်မာနိုင်ငံရှိ တိုင်းရင်းသားအသီးသီးတို့အတွက် အတုယူဖွယ် သက်သေပြယုဂ် တစ်ရပ်ပင် ဖြစ်သည်” ဟု သဝဏ်လွှာတွင် ဖော်ပြသည်။
ထို့ပြင် လွတ်လပ်၍ တရားမျှတမှုပြည့်ဝသော အေးချမ်းကြွယ်ဝသော ဒေသပေါ်ထွန်းလာစေရေးတို့အတွက် “ရည်မှန်းချက်တူလျှင် မဟာမိတ်တည်” ဆိုသကဲ့သို့ ညီနောင်မဟာမိတ်ပီပီ ချစ်ကြည်ရင်းနှီးမှု မပျက်ဘဲ အချင်းချင်းဖေးမတွဲကူ၍ တော်လှန်ရေးမျှော်မှန်းချက် ရောက်ရှိသည်အထိ အတူတကွ ကြိုးပမ်းသွားကြရန် ကတိသစ္စာပြုသည်ဟု မဟာမိတ် ၂ ဖွဲ့၏ သဝဏ်လွှာတွင် ဆိုထားသည်။
မဟာမိတ် AA တပ်တော်သည် အဘက်ဘက်မှ နိုင်ငံရေး၊ စစ်ရေးဖိအားများကို ရင်ဆိုင်ကျော်လွှားကာ ရက္ခိုင်ပြည်သူများအားလုံး အတွက်သာမက မြန်မာပြည်သူလူထု တစ်ရပ်လုံး လွတ်မြောက်ရေးအတွက် အခက်အခဲစိန်ခေါ်မှုကြားကပင် ကျားကုတ်ကျားခဲ ကူညီဖြည့်ဆည်း ပေးနိုင်ခဲ့သည်ကိုလည်း တွေ့မြင်ရသည်ဟု ဆိုသည်။
အာရက္ခတပ်တော် – AA ကို ဗိုလ်ချုပ် ထွန်းမြတ်နိုင် ဦးဆောင်ကာ ၂၀၀၉ ခုနှစ်၊ ဧပြီ ၁၀ ရက်တွင် ကချင်လွတ်လပ်ရေးအဖွဲ့ – KIO ဌာနချုပ် လိုင်ဇာ၌ စတင် ဖွဲ့စည်းခဲ့ခြင်း ဖြစ်သည်။
AA ၁၇ နှစ်ပြည့်သို့ ညီနောင်မဟာမိတ်အဖွဲ့ဝင်ဖြစ်သည့် TNLA က သီးခြားအနေဖြင့် ဦးစွာသဝဏ်လွှာ ပေးပို့ခဲ့ပြီးနောက် ၂ နာရီခန့်အကြာတွင် အခြား ညီနောင်မဟာမိတ်အဖွဲ့ဝင် ဖြစ်သည့် MNDAA နှင့် ပူးတွဲ၍လည်း သဝဏ်လွှာ ထပ်မံပေးပို့ခဲ့သည်။
သဝဏ်လွှာ ၂ ခုတွင်ပါသည့် အကြောင်းအရာမှာမူ အတူတူပင် ဖြစ်သည်။
ညီနောင်မဟာမိတ်ဖြစ်ကြသည့် AA ၊ TNAL ၊ MNDAA တို့သည် ၁၀၂၇ စစ်ဆင်ရေးကို အတူတကွ ဖော်ဆောင်ပြီး မြို့အများအပြားကို သိမ်းပိုက်နိုင်ခဲ့သော်လည်း TNLA က သိမ်းပိုက်ထားသည့် ကွတ်ခိုင်မြို့တွင် အချင်းချင်းကြား ပြဿနာဖြစ်ပွားကာ MNDAA က TNLA ကို ပြန်လည်ထိုးစစ်ဆင်ပြီး ကွတ်ခိုင်မြို့ကို သိမ်းပိုက်ခဲ့သည့်အပြင် မုံးကိုး မူဆယ်တွင်ရှိသည့် TNLA တပ်ဖွဲ့ကို ဖမ်းဆီးနှင်ထုတ်ခဲ့သည်။
#MeKongNews
#AA
#TNLA
#MNDAA
#တော်လှန်ရေးရည်မှန်းချက်
#ကတိပြု
