မဲခေါင်၊ မတ် ၃၀
ရှမ်းပြည်အရှေ့ပိုင်း၊ ကျိုင်းတုံမြို့တွင် အွန်လိုင်းငွေလိမ်ဂိုဏ်း – ကျားဖြန့် မှ တရုတ်နိုင်ငံသားများအတွက် မှတ်ပုံတင်၊ Smart Card နှင့် Passport များကို ယွမ်ငွေ ၂ သိန်းကျော် (ဘတ် ၁ သန်းကျော်) ရယူကာ ၁၀ ရက်အတွင်း အပြီးလုပ်ဆောင်ပေးနေကြောင်း မဲခေါင်သတင်းဌာနက စုံစမ်းသိရှိရသည်။
ပန်းခင်းစီမံချက်ဖြင့် ဒေသခံတိုင်းရင်းသားများကို ကျေးရွာများအထိ ကွင်းဆင်းကာ မှတ်ပုံတင်ပြုလုပ်ပေးနေသည့် အစီအစဉ်ကို အခွင့်ကောင်းယူ၍ အိမ်ထောင်စုစာရင်းတွင် လူဦးရေတိုးကာ တရုတ်နိုင်ငံသားများကို မှတ်ပုံတင်ပြုလုပ်ပေးနေခြင်း ဖြစ်ကြောင်း သတင်းရင်းမြစ်များက ပြောသည်။
ယင်းသို့ မှတ်ပုံတင်နှင့် Passport များ ထုတ်ပေးရာတွင် ပွဲစားနှင့် လဝက ဝန်ထမ်းအချို့ ပူးပေါင်းကာ တစ်ဦးလျှင် ယွမ် ၂၆၀,၀၀၀ (နှစ်သိန်းခြောက်သောင်း) နှုန်းဖြင့် ၁၀ ရက်အတွင်း အပြီးလုပ်ဆောင်ပေးနေခြင်းဖြစ်ပြီး မတ်လအတွင်းမှာပင် တရုတ်နိုင်ငံသား ၅ ဦးခန့် လုပ်ဆောင်ပြီးစီးသွားပြီဖြစ်ကြောင်း လဝကရုံးနှင့် နီးစပ်သည့် သတင်းရင်းမြစ်တစ်ဦးက ပြောသည်။
“အဓိက သိန်းနိုင်ဆိုတဲ့ ပွဲစားက လဝက ဝန်ထမ်းတွေနဲ့ ပေါင်းလုပ်ပေးနေတာ။ တာချီလိတ်က ကျားဖြန့်တရုတ်တွေကို သူကိုယ်တိုင် ကားနဲ့ ကျိုင်းတုံကို ခေါ်သွားပြီး ရုံးမှာ အပြီးအစီး လုပ်ပေးတာ။ ၁၀ ရက်တည်းနဲ့ အပြီးလုပ်တာ” ဟု ၎င်းက ပြောသည်။
ယင်းသို့ လုပ်ဆောင်ပေးရာတွင် လဝကမှ ရှမ်းပြည်အရှ့ပိုင်း ဒုတိယပြည်နယ်ဦးစီးမှူး ဦးအောင်မြတ်သာ၊ ကျိုင်းတုံခရိုင်ဦးစီးမှူး ဦးဝင်းအောင်၊ လဝကမှူး ဦးဝေလင်းနှင့် လဝကမှူး ဦးဆမ်ဆိုက်တို့ အဓိက ပါဝင်ပတ်သက်နေကြောင်း စုံစမ်းသိရသည်။
ရှမ်းပြည်အရှေ့ပိုင်းရှိ မြို့နယ်များအတွက် မှတ်ပုံတင် ထွက်ရှိပြီးပါက Smart Card နှင့် Passport အတွက် လိုအပ်သည့် ကိုယ်ရေးအချက်အလက် (Bio Data) ကောက်ယူခြင်းကို ကျိုင်းတုံရုံးတွင် အပြီးအစီး လုပ်ဆောင်ပေးနေခြင်း ဖြစ်သည်။
မြန်မာနိုင်ငံသား Passport ရရှိရန်အတွက် ပထမဆုံး စရန်ငွေအနေဖြင့် ယွမ် ၁ သိန်း ပေးချေရပြီး ၃ ရက်အကြာတွင် မှတ်ပုံတင် ရရှိကာ၊ တစ်ပတ်အကြာတွင် ကျန်ငွေ ယွမ် ၁ သိန်း ၆ သောင်း ထပ်မံပေးချေရကြောင်း သိရသည်။ ယင်းနောက် ၁၀ ရက်အတွင်း Smart Card နှင့် Passport များ ရရှိခြင်းဖြစ်သည်။
ယင်းတရုတ်နိုင်ငံသားများကို မှတ်ပုံတင်ပြုလုပ်ပေးနေသည့် ပွဲစား သိန်းနိုင်သည် လွန်ခဲ့သည့် လပိုင်းကလည်း ၎င်းပြုလုပ်ပေးလိုက်သည့် တရုတ်နိုင်ငံသားအချို့ ထိုင်းနိုင်ငံ၊ ဘန်ကောက်လေဆိပ်တွင် ဖမ်းဆီးခံခဲ့ရဖူးကြောင်း သိရသည်။
လက်ရှိတွင်လည်း လာမည့်လအတွင်း တရုတ်နိုင်ငံသား ၂၀ ဦးခန့်အတွက် Passport များ ထပ်မံပြုလုပ်ပေးရန် လဝက ဦးစီးအရာရှိတစ်ဦးနှင့် ချိတ်ဆက်ထားကြောင်း စုံစမ်းသိရှိရသည်။
#MeKongNews
#ကျိုင်းတုံ
#လဝက
#တရုတ်နိုင်ငံသား
#မှတ်ပုံတင်
#သိန်းနိုင်
