မဲခေါင်၊ မတ် ၂၉
အီရန်နိုင်ငံမှ စစ်ရေးပစ်မှတ် ၁၁၀၀၀ ကို ချေမှုန်းပစ်လိုက်သည်ဟု အီရန်အပေါ် အမေရိကန်နှင့်အစ္စရေးတို့၏ စစ်ဆင်ရေးတစ်လကျော်ကြာမြင့်လာချိန်တွင် အမေရိကန်အလယ်ပိုင်းစစ်ဌာနချုပ် – CENTCOM က ပြောကြားသည်။
တိုက်ခိုက်ခဲ့သော ပစ်မှတ်များတွင် အီရန် တော်လှန်ရေးအစောင့်တပ်ဖွဲ့၏ စခန်းများနှင့် အီရန် ပဲ့ထိန်းဒုံးကျည်စခန်းများလည်း ပါဝင်သည်။
အီရန်၏ ရေတပ်သင်္ဘော အစီး ၁၅၀ ကျော်လည်း လုံးဝပျက်စီး သို့မဟုတ် တစ်စိတ်တစ်ပိုင်း ပျက်စီးသွားခဲ့ကြောင်းလည်း CENTCOM ၏ စနေနေ့ ထုတ်ပြန်ချက်က ဖော်ပြသည်။
ထိုအတောအတွင်းမှာပင် အမေရိကန် ကမ်းတက်တိုက်ရေယာဉ် USS Tripoli အုပ်စုသည် သောကြာနေ့က အလယ်ပိုင်းကွပ်ကဲရေးဧရိယာသို့ ရောက်ရှိလာခဲ့ပြီ ဖြစ်ကြောင်းလည်း ကွပ်ကဲရေးဌာနက လူမှုမီဒီယာပေါ်တွင် ပြောကြားသည်။
ဂျပန်နိုင်ငံ နာဂါဆာကီစီရင်စု ဆာဆီဘိုမြို့တွင် မိခင်စခန်းအဖြစ် အခြေစိုက်ထားခဲ့သည့် USS Tripoli ရေယာဉ်အုပ်စုတွင် သင်္ဘောသား ၃၅၀၀ နှင့် အိုကီနာဝါတွင်အခြေစိုက်ထားသည့် အမှတ် ၃၁ မရိန်းအထူးတပ်ဖွဲ့ဝင် များလိုက်ပါခဲ့ကြောင်း သိရသည်။
ထိုအတောအတွင်းမှာပင် အစ္စရေးသို့ ဒုံးကျည်ဖြင့် ပစ်ခတ် တိုက်ခိုက်ခဲ့ကြောင်း အီရန်ထောက်ပံ့မှု ရရှိထားသည့် ယီမင်အခြေစိုက် ဟူသီသူပုန်များက ပြောကြားသည်။
မိမိတို့ ကြေညာထားသော ရည်မှန်းချက်များ အားလုံး ပေါက်မြောက်သည်အထိ၊ တော်လှန်ရေးအုပ်စု အားလုံးအပေါ် ရန်လိုတိုက်ခိုက်မှုများ ရပ်စဲသွားသည့် အချိန်အထိ ၎င်းတို့အဖွဲ့၏ စစ်ဆင်ရေးများကို ဆက်လုပ်သွားမည် ဖြစ်ကြောင်း ဟူသီအဖွဲ့ ပြောခွင့်ရသူ ယာယာ ဆာရီယာက ပြောကြားသည်။
ဟူသီအဖွဲ့သည် ယခင်က ပင်လယ်နီဖြတ် သင်္ဘောများကို တိုက်ခိုက်ခဲ့သော်လည်း အီရန်အား အမေရိကန်နှင့် အစ္စရေးက တိုက်ခိုက်ပြီးနောက်ပိုင်း ယခုအချိန်မှ စတင်၍ စစ်ပွဲအတွင်း ပါဝင်လာခြင်းဖြစ်သည်။
တစ်ဖက်တွင်လည်း အီရန်သမ္မတ မာဆွတ်ပီဇက်ကီယန် နှင့် ဖုန်းဖြင့်တစ်နာရီကျော်ကြာ စကားပြောခဲ့သည်ဟု အီရန်အရေး ကြားဝင်စေ့စပ်ပေးရန် ကမ်းလှမ်းထားသည့် ပါကစ္စတန်ဝန်ကြီးချုပ် ရှီဘက်ဇ်ရှာရစ်ဖ်က လူမှုကွန်ရက်ပေါ်မှ ထုတ်ပြန်ပြောကြားခဲ့သည်။
အေးကျော်
Ref: NHK
#MeKongNews
#အီရန်
#စစ်ရေးပစ်မှတ်
#ချေမှုန်း
#အမေရိကန်
