မဲခေါင်၊ မတ် ၂၉
လက်ရှိအချိန်တွင် သဘာဝပတ်ဝန်းကျင်အတွင်း တွေ့ရှိနိုင်သော ကမျဉ်းနီကောင်များ အကိုက်ခံရမှုကြောင့် ဖြစ်ပွားနိုင်သည့် ဖျားနာရောဂါအပေါ် ပြည်သူများအနေဖြင့် အထူးသတိပြုကြရန် ပလောင်ပြည်နယ်လွတ်မြောက်ရေးတပ်ဦး / တအာင်းအမျိုးသားလွတ်မြောက်ရေးတပ်မတော်- PSLA / TNLA က အသိပေး ထုတ်ပြန်ထားသည်။
ထို့ပြင် ကမျဉ်းနီကောင် အကိုက်မခံရရေး ကာကွယ်ရေးနည်းလမ်းများကို လိုက်နာဆောင်ရွက်ကြရန်လည်း TNLA က တိုက်တွန်းထားသည်။
ကမျဉ်းနီကောင်များ အကိုက်ခံရမှုကြောင့် ဖြစ်ပွားသည့် ဖျားနာရောဂါကို Scrub Typhus ရောဂါဟု ခေါ်ပြီး ထိုရောဂါသည် ကျေးလက်ဒေသများတွင် အများဆုံး တွေ့ရှိရသော ကမျဉ်းနီကောင်များ အကိုက်ခံရခြင်းမှတစ်ဆင့် လူသို့ ကူးစက်နိုင်သည့် ပြင်းထန်သော ကူးစက်ရောဂါတစ်မျိုး ဖြစ်သည်။
“ရောဂါကို အချိန်မီသိရင် ကုရလွယ်ပါတယ်။ မသိရင်တော့ လူနာက ဘာဖြစ်မှန်းမသိ သိပ်ကို ခံစားရပါတယ်။ နောက်ပြီး သေတတ်ပါတယ်။ ၃၀ ရာခိုင်နှုန်းလောက်က အချိန်မီ မကုနိုင်ဘူးဆို နောက်ဆက်တွဲ ရောဂါတွေ ဝင်ပြီး အသက်ဆုံးရှုံးတတ်ပါတယ်။ နောက်ဆက်တွဲတွေကတော့ အသည်းရောင်တာ အစာအိမ်နဲ့ အူလမ်းကြောင်းမှာ သွေးယိုတာ သွေးလန့်ပြီး ရှော့ရတာ စတာတွေပဲ ဖြစ်ပါတယ်”ဟု ဒေါက်တာဝိုင်ကေက သုံးသပ်သည်။
ထို့ပြင် ပြည်သူများအနေဖြင့် ကမျဉ်းနီကောင်များ အရှိများသည့် အုပ်ဆိုင်းနေရာများ ဖြစ်သော ခြုံပုတ်များ၊ မြက်ခင်းများ စသည့်နေရာတို့တွင် သွားလာလှုပ်ရှားပါက သတိပြုကြရန် လိုအပ်ကြောင်း ပညာရှင်များက သတိပေးထားသည်။
ကမျဉ်းနီကောင် အကိုက်ခံရပြီးနောက် လူနာများတွင် အဖြစ်များသော ရောဂါလက္ခဏာများမှာ တုပ်ကွေး၊ ငှက်ဖျား တို့ကဲ့သို့ ဖျားခြင်း၊ ချမ်းတုန်ခြင်း၊ ပြင်းထန်စွာ ခေါင်းကိုက်ခြင်းနှင့် ကိုယ်လက်များ ကိုက်ခဲခြင်းတို့ ဖြစ်သည်။
ထို့ပြင် ကမျဉ်းနီကောင် အကိုက်ခံရသည့် နေရာတွင် ညိုမဲသော အနာဖေးကွက်ဖြစ်ပေါ်လာခြင်း ဖြစ်ပါသည်။
“အကောင်ကိုက်ခံရပြီး ၁၀ ရက်လောက်နေရင် ရောဂါလက္ခဏာ စပြပါတယ်။ အနာဖေးတက်သလို အနာမဲမဲလေး ရှိတယ်။ ဒါတွေ့ရင် scrub typhus ဖြစ်ဖို့ သေချာသလောက်ပါပဲ။ အဖျားကလည်း ၁၀၂ လောက်ထိ တက်တယ်။ သာမန်လူဖျားရင် ဘေးက လူတွေဝိုင်းတွဲရလောက်တဲ့အထိ ဖျားဖို့ခက်ပေမယ့် ဒီကောင်ကိုက်လို့ ဖျားတဲ့သူတွေက ဘေးလူက ဝိုင်းတွဲရလောက်တဲ့ထိ ဖျားပါတယ်” ဟု ဒေါက်တာ ဝိုင်ကေက ပြောသည်။
ထို့ပြင် ယခုအချိန်အထိ Scrub Typhus ရောဂါအတွက် ကာကွယ်ဆေး မရှိသေးသောကြောင့် ကမျဉ်းနီကောင်များနှင့် ထိတွေ့မှု မရှိစေရန် သတိပြုနေထိုင်ခြင်းသည် အရေးကြီးဆုံး ကာကွယ်ခြင်းဖြစ်ပြီး ခြုံနွယ်ထူထပ်သည့် နေရာများကို အထူး ရှောင်ကြဉ်ရန် လိုအပ်သကဲ့သို့ အိမ်အပြင်ဘက် သွားလာရာတွင် EPA အသိအမှတ်ပြု DEET ပါဝင်သော အရေပြားဖျန်းဆေး (သို့မဟုတ်) လိမ်းဆေးများကို အသုံးပြုသင့်သည်ဟု TNLA ထုတ်ပြန်ချက်တွင်ဖော်ပြသည်။
ထို့ကြောင့် အဝတ်အစားများကို လုံခြုံစွာ ဝတ်ဆင်ခြင်းဖြင့် အကိုက်ခံရခြင်းမှ ကာကွယ်နိုင်သည်ဟု TNLA ကျန်းမာရေးဌာနက အသိပေးထားသည်။
ပြည်သူများအနေဖြင့် သွားလာလှုပ်ရှားရာတွင် ကမျဉ်းနီကောင် အကိုက်ခံရမှုမဖြစ်စေရန် ကြိုတင်ကာကွယ်ရေး နည်းလမ်းများကို လိုက်နာဆောင်ရွက်ကြရန်နှင့် ဖျားနာခြင်းကဲ့သို့ အထက်ပါ လက္ခဏာများ ပေါ်ပေါက်လာပါက နီးစပ်ရာ ကျန်းမာရေးဌာနများသို့ အချိန်မီ သွားရောက်ကာ ဆေးကုသမှု ခံယူကြရန် TNLA က တိုက်တွန်းထားသည်။
#MeKongNews
#ကမျဉ်းနီကောင်
#ဖျားနာရောဂါ
#TNLA
#အသိပေး
