မဲခေါင်၊ မတ် ၂၅
ရှမ်းပြည်မြောက်ပိုင်း၊ မူဆယ် ၁၀၅ မိုင် နယ်စပ်ကုန်သွယ်ရေးစခန်းတွင် ကိုးကန့်တပ်ဖွဲ့ – MNDAA က ဖြုတ်ချလိုက်သည့် တအာင်းအလံကို ပြန်လည်လွှင့်ထူထားသော်လည်း တအာင်းတပ်ဖွဲ့ – TNLA ကိုမူ MNDAA က တပ်စွဲခွင့်မပြုကြောင်း သတင်းရင်းမြစ်များထံမှ သိရသည်။
၂ ဖက်ခေါင်းဆောင်များ ဆွေးနွေးပြီးနောက် ညီနောင်မဟာမိတ်များ ဖြစ်သည့် ရခိုင်တပ်ဖွဲ့ – AA၊ တအာင်းတပ်ဖွဲ့ – TNLA၊ ကိုးကန့်တပ်ဖွဲ့ – MNDAA တို့ ပူးပေါင်း သိမ်းပိုက်ထားသည့် မူဆယ် ၁၀၅ မိုင်တွင် ကိုးကန့်တပ်ဖွဲ့က ဖယ်ရှားလိုက်သည့် တအာင်းအလံကို ယမန်နေ့ မတ် ၂၄ ရက်တွင် ပြန်လည်လွှင့်ထူပေးခဲ့သည်။
“တအာင်းအလံကိုလည်း ကိုးကန့်ပဲ ပြန်လိုက်တပ်ပေးတာ။ အလံ ပြန်တပ်ပေးပေမယ့် တအာင်းတပ်ကိုတော့ ပြန်မပေးထိုင်ဘူး ပြောတယ်။ အခွန်ကတော့ ကိုးကန့်က ပြန်ခွဲပေးသလောက် TNLA ရသင့်ရထိုက်တာ ရမယ်လို့တော့ ပြောတယ်” ဟု သတင်းရင်းမြစ်တစ်ဦးက ပြောသည်။
ယင်းကိစ္စနှင့် ပတ်သက်ပြီး ၂ ဖက်တပ်ဖွဲ့ ပြောရေးဆိုခွင့်ရှိသူများကို မဲခေါင်က ဆက်သွယ်မေးမြန်းနေဆဲဖြစ်သည်။
MNDAA နှင့် နီးစပ်သည့် သတင်းရင်းမြစ်တစ်ဦးကမူ မူဆယ် ၁၀၅ မိုင်ကို MNDAA နှင့် AA က ဆက်လက်၍ အတူထိန်းချုပ်လျက်ရှိပြီး TNLA နှင့်မူ အတူပူးတွဲ တပ်ထိုင်ခြင်းများ မရှိတော့ကြောင်း ဆိုသည်။
“၂ ဖက်ဆွေးနွေးပွဲမှာလည်း မဟာမိတ်အဖြစ် ဆက်ရှိမယ်ဆိုတဲ့ အချက်က ပါတဲ့အခါကျတော့ တအာင်းအလံတွေကို ပြန်ထောင်ပေးတဲ့သဘော တွေ့ရတာပေါ့လေ။ TNLA တပ်ဖွဲ့ဝင်တွေတော့ ဒီမှာ အတူထိုင်တာတွေ မရှိတော့ဘူး။ အခုက အလံပြန်တပ်ပေးတာ တစ်ခုပဲ ရှိသေးတယ်” ဟု သတင်းရင်းမြစ်က ပြောသည်။
မူဆယ် ၁၀၅ မိုင်ကို ၁၀၂၇ စစ်ဆင်ရေးအတွင်း ညီနောင်မဟာမိတ် ၃ ဖွဲ့က အတူတိုက်ခိုက်သိမ်းပိုက်ခဲ့သော်လည်း မတ် ၁၄ ရက်တွင် ကိုးကန့်တပ်က တအာင်းတပ် ထိန်းချုပ်ထားသည့် ကွတ်ခိုင်မြို့ကို အချင်းချင်း ပြန်လည်တိုက်ခိုက် သိမ်းပိုက်ချိန်တွင် မူဆယ် ၁၀၅ မိုင်ရှိ TNLA တပ်ဖွဲ့များကိုပါ MNDAA က ဖမ်းဆီးနှင်ထုတ်ခဲ့သည်။
ထို့သို့ အချင်းချင်းကြား တိုက်ပွဲဖြစ်ပွားပြီးနောက် ၂ ဖက်ခေါင်းဆောင်များ ဆွေးနွေးချက်များအရ အပစ်ခတ် ရပ်စဲနိုင်ခဲ့သော်လည်း TNLA ထိန်းချုပ်နယ်မြေ အများအပြားကို MNDAA က သိမ်းပိုက် ထိန်းချုပ်ခဲ့သည်။
#MeKongNews
#မူဆယ်
#၁၀၅မိုင်
#တအာင်းအလံ
#TNLA
#MNDAA
