မဲခေါင်၊ မတ် ၂၅
အထီးကျန်ဖြစ်နေသော မြောက်ကိုရီးယားခေါင်းဆောင် ကင်ဂျုံအန်နှင့် ပူတင် တို့ အနီးဆုံး အပေါင်းအပါများအဖြစ် ပူးပေါင်းခြင်း နောက်ဆက်တွဲ အကျိုးဆက်အရ မြောက်ကိုရီးယား ပြည်သူ တစ်သိန်ဝန်းကျင်သည် ရုရှားတွင် တစ်လမှ ၁၀ ဒေါ်လာသာရပြီး ကျွန်ပြုခိုင်းစေခံနေရသည်။
နိုင်ငံတကာ လူ့အခွင့်အရေးဖောင်ဒေးရှင်း – Global Rights Compliance ၏ မြောက်ကိုရီးယားဆိုင်ရာ အတိုင်ပင်ခံ ယီဂျီကင်မ်က ယူကရိန်းစစ်ပွဲသို့ စေလွှတ်ရသဖြင့် သေဆုံးဒဏ်ရာရသူ များပြားလွန်းခဲ့သည့်အတွက် ပူတင်သည် ရုရှားပြည်တွင်း ထုတ်ကုန်စွမ်းအားစုများတွင် အလုပ်လုပ်နိုင်မည့် ပြည်ပနိုင်ငံသားများအဖြစ် စျေးအပေါဆုံးနှင့် တခြားရွေးစရာလမ်းရှိသော မြောက်ကိုရီးယားလုပ်သားများကို ပစ်မှတ်ထားခေါ်ယူအသုံးပြုရာ မြောက်ကိုရီးယားလုပ်သား တစ်သိန်းဝန်းကျင်သည် တစ်ရက်လျှင် ၁၄ နာရီမှ ၁၆ နာရီကြား၊ တစ်ပတ်လုံး နားရက်မရဘဲ တစ်လမှ ၁၀ ဒေါ်လာသာရရှိပြီး ကျွန်ပြုခိုင်းစေခံနေရသည်ဟု အစီရင်ခံစာ ထုတ်ပြန်ခဲ့သည်။
ပုံမှန်အားဖြင့် ရုရှားသည် ပြည်ပအလုပ်သမားတစ်ဦးအတွက် အနည်းဆုံး တစ်လ ဒေါ်လာ ၄၀၀ မှ ၇၅၀ ကြားပေးသော်လည်း ကင်ဂျုံအန်အစိုးရသို့သာ ထိုငွေများ တိုက်ရိုက်ပေးရပြီး တကယ်အလုပ်လုပ်သူများမှာ တစ်လ ၁၀ ဒေါ်လာသာရသဖြင့် မိသားစုထောက်ပံ့ရန်ပင် မတတ်နိုင်ဘဲ ကင်ဂျုံအန်ကသာ ဇိမ်ခံပစ္စည်းများစွာ သုံးစွဲခြင်းဖြင့် ဂုတ်သွေးစုပ်နေသည်ဟု ဆိုသည်။
လက်တွေ့ ရုရှားတွင် အစိုးရစပွန်ဆာ ကျွန်ပြုခံနေရသော မြောက်ကိုရီးယားသား ၂၁ ဦးအား Global Rights Compliance အဖွဲ့ အကြီးအကဲ လာရာစထရိန့်ဝေးစ်က သေချာမေးမြန်းပြီး ထိုအစီရင်ခံစာ ထုတ်ပြန်နိုင်ခဲ့ခြင်းဖြစ်ကာ တချို့လုပ်သားများသည် ရုရှားသို့ အလုပ်သွားလုပ်ရန် အေးဂျင့်ခ၊ ပွဲစားခ၊ လေယာဉ်ခများကိုလည်း ပြန်နှုတ်သဖြင့်တစ်လ ၁၀ ဒေါ်လာပင်မရဘဲ မသေထမင်း၊ မသေဟင်းသာ စားရကာ နေရသည်ကလည်း အင်းဆက် ပိုးမွှားများ ပြည့်နှက်နေသည့် ကွန်တိန်နာများထဲတွင် နေရကြောင်း၊ ရေချိုးခန်း၊ အိပ်သာလည်း မရှိကြောင်း၊ တစ်ချိန်လုံး စပိုင်လုပ် စောင့်ကြည့်နေသူများကြောင့် လှုပ်ပင် မလှုပ်ရဲဘဲ နေထိုင်ကြရသလို ကိုရီးယားကေပေါ့၊ အပြာကားများ ကြည့်လျှင် ဌာနေနိုင်ငံသို့ အကြောင်းကြားပြီး ပြန်ခေါ်ယူကာ အပြစ်ပေးကြောင်း လက်တွေ့ကြုံရသူများနှင့် အင်တာဗျူးအရ သိရှိခဲ့ရသည်။
သို့ရာတွင် မြောက်ကိုရီးယားနိုင်ငံသားများအတွက် တခြားရွေးချယ်စရာ လမ်းမရှိသောကြောင့် ၂၀၂၃ ခုနှစ်က ရုရှားသို့ သွားပြီး ကျွန်သဖွယ် အလုပ်လုပ်ရသည့် ဦးရေသည် အဆဒါဇင်ချီ မြင့်တက်လာရာမှ ၂၀၂၅ တွင် တစ်သိန်းအထိ ရောက်ရှိလာခြင်းဖြစ်သည်ဟု ဆိုသည်။
ကိုကလင်း
Ref:Thesun
#MeKongNews
#မြောက်ကိုရီးယား
#သိန်းချီ
#ရုရှား
#ကျွန်ပြုခံ
