မဲခေါင်၊ မတ် ၂၀
ပင်လယ်ကွေ့မှ စွမ်းအင်လုပ်ငန်း နေရာများအား တိုက်ခိုက်မှုကို လက်ခံနိုင်စရာမရှိဟု အိန္ဒိယက ရှုတ်ချလိုက်ပြီး ထိုသို့တိုက်ခိုက်မှုများက ကမ္ဘာလုံးဆိုင်ရာ စွမ်းအင်စီးဆင်းများကို ပိုမို ဆိုရွားသွားစေနိုင်ကြောင်းလည်း သတိပေး ပြောကြားသည်။
အီရန်၏ အကြီးဆုံး ဆောက်ပါးစ် ဓာတ်ငွေ့လုပ်ကွက်အား အစ္စရေးက တိုက်ခိုက်ခဲ့ပြီးနောက် အီရန်က ကာတာနိုင်ငံရှိ ကမ္ဘာ့အကြီးဆုံး သဘာဝဓာတ်ငွေ့အရည် (LNG) စက်ရုံကို ပစ်မှတ်ထားတိုက်ခိုက်ခဲ့ရာ ယင်းစက်ရုံ၏ ထုတ်လုပ်မှုစွမ်းရည် ၁၇ ရာခိုင် နှုန်းခန့် ကျဆင်းသွားစေခဲ့သည်။
ကာတာနိုင်ငံမှ Ras Laffan စက်ရုံအားတိုက်ခိုက်မှုကြောင့် အိန္ဒိယအပါအဝင် ဒေသတစ်ဝန်း လောင်စာထောက်ပံ့မှုများကို ပိုမိုကျယ်ပြန့်စွာ ထိခိုက်နိုင်သည်ဟူသော စိုးရိမ်မှုများလည်း မြင့်တက်လာခဲ့သည်။
အိန္ဒိယနိုင်ငံသည် ၎င်းတို့၏ LNG လိုအပ်ချက် ၄၀ ရာခိုင်နှုန်းအတွက် ကာတာကို အားကိုးနေရပြီး သဘာဝဓာတ်ငွေ့အရည်များသည် အိန္ဒိယနိုင်ငံ၏ လျှပ်စစ်လုပ်ငန်း၊ စက်မှုလုပ်ငန်း၊ ဓာတ်မြေဩဇာလုပ်ငန်းနှင့် နေအိမ်နှင့် စားသောက်ဆိုင်များ၌ ချက်ပြုတ်ရေးအတွက် အလွန်အရေးပါသည်။
နောက်ဆုံး ဖြစ်ပေါ်လာသော တိုက်ခိုက်မှုများသည် လက်ခံနိုင်စရာ မရှိကြောင်းနှင့် ရပ်တန့်ရန်လိုအပ်သည်ဟု အိန္ဒိယနိုင်ငံခြားရေးဝန်ကြီးဌာနက ထုတ်ပြန်ပြောကြားပြီး စွမ်းအင်လုပ်ငန်း အခြေခံအဆောက်အအုံများကို မတိုက်ခိုက်ရေး နယူးဒေလီ၏ တောင်းဆိုချက်ကို ထပ်မံပြောကြားသည်။
ဒေသတစ်ဝန်း မတူညီသော နေရာများမှ စွမ်းအင်လုပ်ငန်း အဆောက်အအုံများအပေါ် မကြာသေးမီက တိုက်ခိုက်မှုများ သည် အလွန်ပင် စိတ်အနှောက်အယှက်ဖြစ်စရာ ကောင်းပြီး တစ်ကမ္ဘာလုံးတွင် မရေမရာ ဖြစ်နှင့်ပြီးသော စွမ်းအင်လုပ်ငန်းကို ထပ်မံ၍ မတည်မငြိမ်ဖြစ်စေခဲ့ကြောင်း အိန္ဒိယနိုင်ငံခြားရေးက ထုတ်ပြန်ပြောကြားသည်။
ကာတာနိုင်ငံသည် အမေရိကန်၊ ရုရှား၊ ဩစတြေးလျတို့နှင့်အတူ ကမ္ဘာပေါ်တွင် သဘာဝဓာတ်ငွေ့အရည် အများဆုံးထုတ်လုပ်သည့် နိုင်ငံများတွင် ပါဝင်သည်။
အေးကျော်
Ref: AFP
#MeKongNews
#ပင်လယ်ကွေ့
#စွမ်းအင်လုပ်ငန်း
#တိုက်ခိုက်မှု
#အိန္ဒိယ
