မဲခေါင်၊ မတ် ၁၈
ရှမ်းပြည်တောင်ပိုင်း၊ တောင်ကြီးမြို့ရှိ ရပ်ကွက်အုပ်ချုပ်ရေးမှူးအားလုံးကို စစ်ကောင်စီက အသစ်လဲလှယ်ခန့်အပ်မည်ဖြစ်ကြောင်း အထွေထွေအုပ်ချုပ်ရေးဦးစီးဌာန သတင်းရင်းမြစ်များထံမှ သိရသည်။
လက်ရှိ တာဝန်ထမ်းဆောင်နေသည့် ရပ်ကွက်အုပ်ချုပ်ရေးမှူးများသည် ၂၀၂၄ ခုနှစ်အတွင်းက ခန့်အပ်ခံထားရသူများဖြစ်ပြီး နောက်တက်အစိုးရလက်ထက် စတင်သည်နှင့်တစ်ပြိုင်နက် အသစ်များ ပြောင်းလဲခန့်အပ်ရန် စီစဉ်နေခြင်းဖြစ်သည်ဟု ထွေအုပ်အသိုင်းအဝိုင်းက ပြောသည်။
“အခုရှိနေတဲ့ အုပ်ချုပ်ရေးမှူးတွေ အကုန်ဖြုတ်ခံရမှာပါ။ သူတို့အများစုက နာမည်ပျက်နေကြတာ။ အထူးသဖြင့် စစ်မှုထမ်းကိစ္စတွေမှာ ငွေကြေးကောက်ခံတာတွေကြောင့် နာမည်ဆိုးထွက်နေတာ” ဟု သတင်းရင်းမြစ်က ဆိုသည်။
တောင်ကြီးမြို့နယ်တွင် ရပ်ကွက် ၂၂ ရပ်ကွက်ရှိသည့်အနက် ရတနာသီရိရပ်ကွက်မှ ဦးသားအို၊ စိန်ပန်းရပ်ကွက်မှ ဦးသောင်းရွှေနှင့် ရွှေတောင်ရပ်ကွက်မှ ပျူစောထီးခေါင်းဆောင်ဟု လူသိများသူ ဦးသန်းရွှေတို့မှာ နာမည်အဆိုးဆုံးဖြစ်ကြောင်း ဒေသခံများက ပြောသည်။
“နောက်တက်မယ့် လူလည်း အတူတူပဲ ဖြစ်မှာပါ။ စစ်တပ်ကပဲ ယူနီဖောင်းဝတ်တာနဲ့ ချွတ်တာပဲ ကွာခြားမှာ။ ဦးသောင်းရွှေနဲ့ ဦးသန်းရွှေတို့ဆိုရင် ငွေညှစ်တာ၊ လက်နက်ရောင်းတာ၊ မူးယစ်ဆေးဝါး ရောင်းခိုင်းတာတွေအထိ လုပ်နေတာတောင် အခုထိ မပြုတ်ခဲ့ဘူး။ လူသစ်တွေ တက်လာရင်လည်း ‘နောက်ဘုန်းကြီး နှစ်ချက်ခေါက်’ ဆိုသလို ပိုဆိုးလာမှာပဲ စိုးရိမ်ရတယ်” ဟု စိန်ပန်းရပ်ကွက်နေသူတစ်ဦးက ပြောသည်။
မြို့နယ်ထွေအုပ်ရုံးဘက်မှလည်း လက်ရှိအုပ်ချုပ်ရေးမှူးများကို လုပ်လက်စအလုပ်များ ဖြတ်ထားကြရန် ကြိုတင်ပြောကြားထားကြောင်း သိရသည်။
မြို့ခံများအနေဖြင့်မူ လက်ရှိထက် အခြေအနေများ ပိုမိုကောင်းမွန်လာရန် မျှော်လင့်နေကြကြောင်းလည်း စုံစမ်းသိရှိရသည်။
#MeKongNews
#တောင်ကြီး
#ရပ်ကွက်အုပ်ချုပ်ရေးမှူး
#စိန်ပန်းရပ်ကွက်
#ရွှေတောင်ရပ်ကွက်
