မဲခေါင်၊ မတ် ၁၆
ရှမ်းပြည်မြောက်ပိုင်းတွင် TNLA စိုးမိုးထားသည့် ဒေသများကို MNDAA က ထိုးစစ်ဆင်နေချိန်တွင် လားရှိုးမြို့ရှိ ဆင်နှစ်ကောင်ဟိုတယ်၌ စစ်ကောင်စီနှင့် ကိုးကန့်တပ် – MNDAA တို့ ယနေ့ မတ်လ ၁၆ရက် နံနက်ပိုင်းတွင် တွေ့ဆုံဆွေးနွေးနေကြောင်း ဒေသခံများထံမှ သိရသည်။
၎င်းတို့နှစ်ဖက်သည် ပုံမှန်အားဖြင့် တစ်လတစ်ကြိမ် တွေ့ဆုံလေ့ရှိသော်လည်း လက်ရှိတွင် MNDAA က တိုက်ပွဲဖော်ဆောင်နေသည့် ရှမ်းပြည်မြောက်ပိုင်း စစ်ရေးအခြေအနေများကြောင့် ယခုကဲ့သို့ အရေးပေါ်တွေ့ဆုံခြင်းဖြစ်သည်ဟု လားရှိုးဒေသခံတစ်ဦးက သုံးသပ်သည်။
“ကွတ်ခိုင်-သိန္နီ-လားရှိုး-မူဆယ် ပြည်ထောင်စုလမ်းမကြီး ပြန်ပွင့်ဖို့ ညှိနှိုင်းနေတယ်လို့ ကြားရတယ်။ ပြီးတော့ TNLA ဆီက သိမ်းထားတဲ့ နယ်မြေတွေကို စစ်ကောင်စီထံ ပြန်အပ်ဖို့ကိစ္စတွေလည်း ပါနိုင်တယ်။ တရုတ်အထူးကိုယ်စားလှယ် တိမ့်ရှီကျွင်းက နေပြည်တော်ကို ၁၃ ရက်နေ့မှာ ရောက်ပြီး၊ ၁၄ ရက်နေ့ကျတော့ တိုက်ပွဲတွေ စဖြစ်တာပဲ” ဟု ၎င်းက ဆိုသည်။
ကူမင်းဆွေးနွေးပွဲတွင် တရုတ်နိုင်ငံက TNLA အနေဖြင့် ကွတ်ခိုင်၊ နမ့်ခမ်းနှင့် နမ္မတူမြို့များကို စစ်ကောင်စီထံ ပြန်ပေးရန် တောင်းဆိုခဲ့သော်လည်း TNLA က ငြင်းပယ်ခဲ့ကြောင်း ထို့ကြောင့် တရုတ်နိုင်ငံက MNDAA ကို အသုံးချ၍ တိုက်ပွဲဖော်ဆောင်ခိုင်းခြင်းဖြစ်နိုင်ကြောင်း နိုင်ငံရေးလေ့လာသူတစ်ဦးက သုံးသပ်သည်။
“ကွတ်ခိုင်၊ နမ့်ခမ်း၊ နမ္မတူကနေ ဆုတ်ပေးဖို့ ငြင်းခဲ့ပေမဲ့ စစ်ကောင်စီက TNLA ကို ဗုံးတစ်ခါမှ မကြဲဘဲ ငြိမ်နေကတည်းက ရိပ်မိသင့်တာပါ။ အခု MNDAA ရဲ့ ထိုးစစ်မှာ စစ်ကောင်စီဘက်က လက်နက်ခဲယမ်း ပံ့ပိုးမှုတွေ ပါဝင်နိုင်တယ်လို့ ယူဆရတယ်။ ဒီစစ်မီးက နမ့်ခမ်းနဲ့ နမ္မတူအထိ ရောက်သွားနိုင်တယ်” ဟု ၎င်းက ပြောသည်။
ယနေ့ နမ့်ခမ်းဘက်သို့ ထိုးစစ်ဆင်နေသည့် MNDAA တပ်ဖွဲ့များသည် နမ့်ဖတ်ကာ-နမ့်ခမ်းလမ်းပိုင်းမှ မြေပြင်စစ်ကြောင်းဖြင့် ချီတက်သွားခဲ့ရာ ဖာလင်၊ မန်အောင်နှင့် ဆာလုကျေးရွာများအထိ ရောက်ရှိနေကြောင်း နမ့်ခမ်းဒေသခံများက ပြောသည်။
“နမ့်ခမ်း သာယာကုန်းဘက်ကို ဒရုန်းတွေ ရောက်လာနေပြီ။ TNLA ဘက်ကလည်း လူထုကို ရှောင်ခိုင်းတာမျိုးတွေ ရှိလာတယ်။ ပြေးရမလား၊ နေရမလား မသိသေးဘူး။ ကွတ်ခိုင်မှာတော့ လူထုအထိအခိုက် မရှိသလောက်မို့လို့ အခြေအနေကို စောင့်ကြည့်နေရတယ်” ဟု နမ့်ခမ်းဒေသခံတစ်ဦးက ဆိုသည်။
မတ်လ ၁၄ ရက်တွင် စတင်ခဲ့သည့် MNDAA ၏ ထိုးစစ်သည် မတ်လ ၁၅ ရက်တွင် ကွတ်ခိုင်မြို့ကို သိမ်းပိုက်နိုင်ခဲ့ပြီး ယနေ့ မတ်လ ၁၆ ရက်တွင် နမ့်ခမ်းမြို့အနီးသို့ ရောက်ရှိလာခြင်း ဖြစ်သည်။
#MeKongNews
#TNLA
#MNDAA
#လားရှိုး
#ဆင်နှစ်ကောင်ဟိုတယ်
#ရှမ်းမြောက်
ပုံအညွှန်း – တရုတ် အထူးကိုယ်စားလှယ် မစ္စတာတိန့်ရှီးကျွင်းနှင့် စစ်ကောင်စီနိုင်ငံခြားရေးဝန်ကြီးတို့ မတ်လ ၁၃ရက် နေပြည်တော်၌ တွေ့ဆုံစဉ်
