မဲခေါင်၊ မတ် ၁၅
ရှမ်းပြည်မြောက်ပိုင်း၊ ကွတ်ခိုင်မြို့ကို ယနေ့ မတ်လ ၁၅ ရက် ညနေပိုင်းတွင် ကိုးကန့်တပ် (MNDAA) က ထိန်းချုပ်လိုက်ပြီဖြစ်ကြောင်း ဒေသခံများထံမှ သိရသည်။
ယနေ့ နံနက် ၅ နာရီခန့်မှစ၍ မွန်းလွဲ ၁ နာရီဝန်းကျင်အထိ မြို့ပေါ်တိုက်ပွဲများ ပြင်းထန်ခဲ့ပြီးနောက် TNLA တပ်ဖွဲ့သည် ၎င်းတို့တပ်စွဲထားသည့် ဗျူဟာကုန်းနောက်ဘက်သို့ ဆုတ်ခွာသွားသဖြင့် မြို့ပေါ်ကို MNDAA က ထိန်းချုပ်လိုက်နိုင်ခြင်း ဖြစ်သည်ဟု ကွတ်ခိုင်ဒေသခံတစ်ဦးက ပြောသည်။
“ညနေ ၃ နာရီလောက်မှာ မြို့တွင်းဧရိယာထဲ ပစ်ခတ်သံ မကြားရတော့ပေမဲ့ တပ်တွင်းနဲ့ တပ်အလွန်က တောစပ်တွေမှာတော့ ဆက်ပြီး ပစ်ခတ်နေကြတုန်းပဲ။ ဒရုန်းတွေလည်း ခေါက်တုံ့ခေါက်ပြန် ပျံသန်းတိုက်ခိုက်နေတာဆိုတော့ မြို့နဲ့ အတန်သင့်ဝေးတဲ့နေရာမှာ ထိတွေ့တိုက်ပွဲဖြစ်နေတဲ့ သဘောပါ” ဟု ၎င်းက ဆိုသည်။
ပြီးခဲ့သည့် မတ်လ ၁၄ ရက် နံနက်ပိုင်းမှစ၍ ကွတ်ခိုင်မြို့တွင်းရှိ TNLA တပ်စခန်းများကို MNDAA က စတင်ထိုးစစ်ဆင်ခဲ့ခြင်းဖြစ်ပြီး ယနေ့ ညနေပိုင်းအထိ တိုက်ပွဲများ ဖြစ်ပွားခဲ့ခြင်း ဖြစ်သည်။
နှစ်ရက်တာ တိုက်ပွဲအတွင်း ဒေသခံများသည် နေအိမ်များအတွင်း၌သာ ခိုလှုံနေကြပြီး တိုက်ပွဲကြောင့် ခရစ်ယာန်ဘုရားရှိခိုးကျောင်း (Church) တစ်ကျောင်းနှင့် နေအိမ်အချို့ ဒရုန်းဗုံး ထိမှန်ပျက်စီးခဲ့ကာ ဒေသခံအချို့ ထိခိုက်ဒဏ်ရာရမှုများ ရှိခဲ့ကြောင်း သိရသည်။
MNDAA သည် ဖေဖော်ဝါရီ ၁၃ ရက်က စတင်ခဲ့သည့် အပြန်အလှန် ပစ်ခတ်မှုဖြစ်စဉ် တစ်လပြည့်သည့် မတ်လ ၁၄ ရက်တွင် TNLA တပ်စခန်းများဖြစ်သည့် မန်ပြိန်း၊ ကောင်းခါးလမ်းခွဲရှိ စခန်းများကို လက်နက်ကြီး၊ လက်နက်ငယ်နှင့် ဒရုန်းဗုံးများဖြင့် စတင်တိုက်ခိုက်ခဲ့ခြင်းဖြစ်သည်။
ထို့ပြင် ကွတ်ခိုင်ရှိ ဗျူဟာတပ်ကုန်း၊ ရှုခင်းသာရှိ ကာကင်းကုန်းနှင့် လွိုင်ဆမ်ဆစ် တောင်ကုန်းစခန်းများကိုလည်း ဒရုန်းများဖြင့် တိုက်ခိုက်ခဲ့ကြောင်း TNLA က သတင်းထုတ်ပြန်ထားသည်။
ယင်းအပြင် မူဆယ် ၁၀၅ မိုင် ကျင်စန်းကျော့ဂိတ်ရှိ TNLA တပ်ဖွဲ့ဝင် ၄၇ ဦးနှင့် လက်နက် ၄၈ လက်ကို MNDAA က ဖမ်းဆီးသိမ်းယူခဲ့ကြောင်းလည်း TNLA ၏ ထုတ်ပြန်ချက်အရ သိရသည်။
၎င်းအပြင် ကွတ်ခိုင်မြို့နယ်အတွင်းရှိ မုံးစီး၊ မုံးဟွမ်၊ ရှောက်ဟော်၊ လွယ်ကန်၊ မန်ဂျယ်နှင့် နမ့်ဖတ်ကာရွာရှိ တပ်စခန်းများကိုလည်း ဒရုန်းဖြင့် ဗုံးကြဲတိုက်ခိုက်ခဲ့သည်ဟု ဆိုသည်။
MNDAA အနေဖြင့် ကွတ်ခိုင်-နမ့်ခမ်းနယ်စပ်ရှိ ၁၂ မိုင်ကုန်းကိုလည်း တိုက်ခိုက်ထားသဖြင့် စစ်မီးသည် နမ့်ခမ်းမြို့အထိ ကူးစက်လာနိုင်သဖြင့် စောင့်ကြည့်နေကြကြောင်း စစ်ရေးလေ့လာသူများက ဆိုသည်။
MNDAA ဘက်ကမူ TNLA က စတင်ပစ်ခတ်သဖြင့် ပြန်လည်ခုခံတိုက်ခိုက်ရခြင်းဖြစ်ကြောင်း ထုတ်ပြန်ထားသည်။
#MeKongNews
#ကွတ်ခိုင်
#ရှမ်းမြောက်
#TNLA
#ကိုးကန့်
#ညီနောင်မဟာမိတ်၃ဖွဲ့
