မဲခေါင်၊ မတ် ၁၁
တာချီလိတ်လေဆိပ် မန်နေဂျာ ဦးမြသန်းဝင်း၊ ဒုမန်နေဂျာ ဦးကျော်ဇောဝင်းနှင့် လေကြောင်းရဲတပ်ဖွဲ့ ရဲမှူးအောင်ဆန်းဦးတို့မှာ တာချီလိတ်လေဆိပ်ရှိ VIP ခန်းကို အသုံးပြုကာ အထောက်အထားမဲ့ နိုင်ငံခြားသားများကို တင်ဆောင်ပေးခြင်း၊ အခွန်မဆောင်ထားသည့် နိုင်ငံခြားအရက်များ ဖာလိုက်ပို့ဆောင်ခြင်းများ လုပ်ဆောင်နေကြောင်း တာချီလိတ်လေဆိပ်နှင့် နီးစပ်သူများထံမှ သိရသည်။
အရက်ဖာများ ပို့ဆောင်ခြင်းကို လေကြောင်းရဲတပ်ဖွဲ့ ရဲမှူးအောင်ဆန်းဦးက အဓိက လုပ်ဆောင်ပြီး ကျန်ကုန်များနှင့် VIP ခန်း အသုံးပြုခြင်းများကို လေဆိပ်မန်နေဂျာ ဦးမြသန်းဝန်းနှင့် ဒုမန်နေဂျာ ဦးကျော်ဇောဝင်းတို့က အဓိက လုပ်ဆောင်ကြောင်း လေဆိပ်သတင်းရင်းမြစ်တစ်ဦးက ပြောသည်။
“အရက်က တစ်နေ့ကို ၁၀ ဖာဝန်းကျင်ရှိတယ်။ နိုင်ငံခြားအရက်တွေပဲ။ X-ray မှာ ပုလင်းပြား ပုံစံတွေ တွေ့ရတယ်။ အခုမန်နေဂျာက ငွေအတော်ရှာတယ်။ တရုတ်တစ်ယောက်ကို ဘယ်သူကို ဘယ်လောက်ပေးရတယ်ဆိုတာ အတိအကျရှိတယ်” ဟု ၎င်းက ပြောသည်။
နိုင်ငံခြားအရက်ဖာများကို ရန်ကုန်၊ မန္တလေးနှင့် နေပြည်တော်လေဆိပ်များသို့ အခြားကုန်စည်များနှင့် ရောနှော၍ ပို့ဆောင်လျက်ရှိပြီး ၂၀၂၄ ခုနှစ်နောက်ပိုင်းတွင် မြေပြင်ကုန်သွယ်ရေးလမ်းကြောင်း၌ အစစ်အဆေးနှင့် အဖမ်းအဆီးများ များပြားလာသည့်အတွက် တရားမဝင်ကုန်စည်အချို့ကို တန်ဆာခပေးဆောင်ကာ လေဆိပ်မှ မှောင်ခိုပို့ဆောင်နေကြခြင်း ဖြစ်သည်။
ပြည်တွင်းသို့ နိုင်ငံခြားအရက်ဖာများကို မှောင်ခိုပို့ဆောင်သည့်အပြင် Happy Water အထုပ်များကိုလည်း ပို့ဆောင်မှုများရှိကြောင်း လေဆိပ်နှင့် နီးစပ်သူများထံမှ သိရှိရသည်။
လွန်ခဲ့သော ၂ နှစ်ခန့်က တာချီလိတ်လေဆိပ်၌ တာဝန်ကျနေသည့် ရဲအရာရှိတစ်ဦးသည် Happy Water ပို့ဆောင်ခြင်းကို စစ်ဆေးတွေ့ရှိခဲ့သောကြောင့် ဖမ်းဆီးခံရပြီး ပြစ်ဒဏ်ကျခံနေရကြောင်း သိရှိရသည်။
#MeKongNews
#တာချီလိတ်လေဆိပ်
#မန်နေဂျာ
#VIP
#တရားမဝင်နိုင်ငံခြားသား
#ဦးမြသန်းဝင်း
