မဲခေါင်၊ မတ် ၁၀
အီရန်ကို ၁၁ ရက်မြောက် တိုက်ခိုက်မှုများဆက်တိုက်လုပ်ဆောင်အပြီး တီဟီရန်မြို့လည်း မီးဟုန်းဟုန်း တောက်လောင်ပျက်စီးနေချိန် စစ်ပွဲအနိုင်ရကာ အဆုံးသတ်ပြီလားဟု အမေရိကန်သမ္မတ ဒေါ်နယ်ထရမ့်အား မီဒီယာများက မေးမြန်းရာတွင် လုံလောက်သော စစ်အောင်ပွဲ မရသေးကြောင်း၊ ယခုတစ်ပတ်အစောပိုင်းတွင် စစ်ပြီးနိုင်ဦးမည်မဟုတ်သော်လည်း မကြာမီ အမြန်ဆုံး စစ်ပြီးဆုံးမည်ဟု ပြန်လည်ဖြေကြားသွားခဲ့သည်။
အီရန် နိုင်ငံခြားရေးဝန်ကြီး အဘက်စ်အရပ်ဂ်ချီက ထရမ့်သည် အီရန်အား ၃ ရက်နှင့် အပြတ်တိုက်ကာ အစိုးရ လဲလှယ်ရန်ချမှတ်ခဲ့သော Plan -A ကြီး မအောင်မြင်ကြောင်း၊ မိမိတို့ဘက်မှ တန်ပြန်တိုက်ခိုက်မှုများ ဆက်လက်လုပ်ဆောင်ရန် အင်အားရှိနေသေးသည်ဟု ထုတ်ပြန်ခဲ့ရာ ဒေါ်နယ်ထရမ့်က ဟောမုဇ် ရေလက်ကြားမှ ရေနံတင်သင်္ဘောများဖြတ်ခွင့်ပိတ်ထားဦးမည်ဆိုပါက အီရန်ကို အဆ ၂၀ မက ပြင်းထန်သည့် တိုက်ခိုက်မှုအသစ်ကြီး လာမည်ဟု ဒေါ်နယ်ထရမ့်က ခြိမ်းခြောက်သတိပေးခဲ့ပြန်သည်။
လက်ရှိတွင် အီရန်၌ လေတပ်မရှိ၊ ရေတပ်စစ်သင်္ဘော ၅၁ စီးလုံး ဖျက်ဆီးလိုက်နိုင်ပြီဖြစ်သောကြောင့် မည်သည့် အင်အားမျှ မရှိတော့ဘဲ သိပ်မကြာမီ စစ်ပွဲပြီးပြတ်ကာ ကမ္ဘာကြီးဘေးကင်းတော့မည်ဟု ပြောသွားခဲ့သည်။
ထရမ့်ပြောစကားအတိုင်ပင် ဗြိတိန်ဝန်ကြီးချုပ် စတာမာသည် အီရန်အား တိုက်ခိုက်ရေးအတွက် ပါဝင် အားဖြည့်ကူညီမည်ဟု ကတိပြန်ပြုကာ ယူကေရှိ လေဆိပ်များကို အသုံးပြုခွင့်ပေးလိုက်ပြီးနောက် အမေရိကန်၏ လက်နက်တန်ချိန် ၃၁ တန်အထိ တင်ဆောင် ပစ်ခတ်နိုင်သော B-52 မဟာဗျူဟာ ဗုံးကြဲလေယာဉ်ကြီး ၃ စီး ဗြိတိန်ရှိ ဂလူဆက်စတာရှိုင်းယားရှိ ဗြိတိန်တော်ဝင်လေတပ် ဖဲဖို့ဒ်လေယာဉ်ကွင်းသို့ မတ် ၁၀ ရက်တွင် ဆိုက်ရောက်လာကာ ပြင်ဆင်မှုများလုပ်ဆောင်နေသည်ကို မြင်တွေ့ရသည်။
ရှေ့ရက်များကတည်းက B-1 Lancer ဗုံးကြဲလေယာဉ်များ ဖဲဖို့ဒ်လေယာဉ်ကွင်းသို့ ရောက်ရှိနေကာ ပြင်ဆင်နေသဖြင့် ထပ်ရောက်ရှိလာနေသည့် B-52 လေယာဉ်များနှင့်ပေါင်းလျှင် စုစုပေါင်း ဗုံးကျဲ လေယာဉ်ကြီး ၈ စီးရှိမည်ဖြစ်သည်။
B-52 ဗုံးကြဲလေယာဉ်တစ်စီးတန်ကြေးသည် ပေါင် ၂ ဘီလီယံ ရှိကာ မိုင် ၁၅၀၀ အကွာအဝေးအထိ ဒုံးကျည်ဖြင့် လေယာဉ်ပေါ်မှ ပစ်ခတ်နိုင်သလို မိုင်းများ၊ ဗုံးများလည်း အများအပြားကြဲချနိုင်မည်ဖြစ်သည်။
ထိုလေယာဉ်ပေါ်တွင် နျူကလီးယားလက်နက်ထိပ်ဖူး များ တင်ဆောင်ပစ်ခတ်စွမ်းလည်း ရှိသဖြင့် ထရမ့်ပြောသလို အီရန်အား နောက်ဆုံးသော အကြီးမားဆုံး တိုက်ခိုက်အဆုံးသတ်မှုသည် ရက်ပိုင်းအတွင်း ဖြစ်လာနိုင်မည်ဟု ဗြိတိန်မီဒီယာများက သုံးသပ်နေကြသည်။
ကိုကလင်း
Ref: Thesun
#MeKongNews
#အမေရိကန်
#အီရန်
#အစ္စရေး
#တီဟီရန်
