မဲခေါင်၊ မတ် ၉
မူဆယ်မြို့တွင် ယမန်နေ့က ဈေးဆိုင်ပိုင်ရှင်တစ်ဦးကို ပြန်ပေးဆွဲသွားသည့် လက်နက်ကိုင်များကို ယနေ့နေ့လယ်ပိုင်းတွင် ဖမ်းဆီးရမိခဲ့ကြောင်း ဒေသခံများထံမှ သိရသည်။
ယနေ့ မတ်လ ၉ ရက်၊ နေ့လယ်ပိုင်းတွင် မူဆယ်မြို့၊ ဆွမ်စော်ရပ်ကွက်၌ ခိုအောင်းနေသည့် ပြန်ပေးသမား ၃ ဦးကို ဖမ်းဆီးရမိခဲ့ခြင်းဖြစ်ပြီး ပြန်ပေးဆွဲခံထားရသည့် ဆိုင်ရှင်အမျိုးသမီးကိုလည်း ဘေးကင်းစွာ ကယ်ဆယ်နိုင်ခဲ့ကြောင်း ဒေသခံများက ပြောသည်။
“ဖမ်းမိတဲ့သူတွေက ငတ်ပြတ်နေတဲ့ တရုတ်ကျားဖြန့်သမားတွေလို့ သိရတယ်။ အခုတော့ စစ်ဆေးနေတုန်းပဲမို့ အသေးစိတ်တော့ မသိရသေးဘူး” ဟု ဒေသတွင်း သတင်းရင်းမြစ်တစ်ခုက ပြောသည်။
ဖမ်းဆီးရမိစဉ်အတွင်း ၎င်းတို့အသုံးပြုခဲ့သည့် လက်နက်များနှင့် ကားများအပြင်၊ အနက်ရောင်ကားတစ်စီးကိုပါ ထပ်မံသိမ်းဆည်းရမိခဲ့ကြောင်း သိရသည်။
မဲခေါင်သတင်းဌာနက ရရှိထားသည့် ရုပ်သံမှတ်တမ်းတွင် ပြန်ပေးဆွဲခံရသူမှာ ခုတင်တွင် လက်ထိပ်ခတ်ခံထားရသည်ကို တွေ့ရပြီး ကယ်တင်သူများက ၎င်းအား “အားမေ” ဟု ခေါ်ဝေါ်ကာ စိတ်အေးအေးထားရန် ပြောကြားနေသည်ကို တွေ့ရသည်။
ယင်းပြန်ပေးဆွဲမှုသည် ယမန်နေ့ မတ်လ ၈ ရက်၊ ညနေ ၅ နာရီခွဲခန့်တွင် မူဆယ်မြို့၊ မင်္ဂလာမူဆယ်ရပ်ကွက်ရှိ “Wangcai” စူပါမားကက်ပိုင်ရှင်ကို ပြည်သူ့စစ်ယူနီဖောင်းဝတ် လက်နက်ကိုင် ၃ ဦးက ကားဖြင့် ဖမ်းဆီးခေါ်ဆောင်သွားခဲ့ခြင်း ဖြစ်သည်။
မူဆယ်မြို့တွင် ပြီးခဲ့သည့် ဇန်နဝါရီ ၅ ရက်ကလည်း ရန်ကုန်မှ အဆိုတော် ရှင်မင်းမြတ်နှင့် မိတ်ဆွေတစ်ဦး ကျားဖြန့်ဂိုဏ်း၏ ပြန်ပေးဆွဲခြင်းကို ခံခဲ့ရပြီး ကျပ်သိန်း ၃,၀၀၀ ကျော်ဖြင့် ပြန်လည်ရွေးထုတ်ခဲ့ရသည့် ဖြစ်စဉ်ရှိခဲ့ကာ ယင်းအမှုမှ ကျူးလွန်သူများကိုလည်း ဖမ်းဆီးရမိထားပြီးဖြစ်ကြောင်း သိရသည်။
တရုတ်နယ်စပ်မြို့ဖြစ်သည့် မူဆယ်မြို့တွင် ပြည်သူ့စစ်အဖွဲ့အများအပြား ရှိနေသကဲ့သို့ ကျားဖြန့်ရုံများ၊ လောင်းကစားဝိုင်းများနှင့် မူးယစ်ဆေးဝါး ရောင်းဝယ်မှုများကြောင့် နေ့စဉ်နှင့်အမျှ ရာဇဝတ်မှုများ ဖြစ်ပွားလျက်ရှိသည်။
#MeKongNews
#မူဆယ်မြို့
#ပြန်ပေးဆွဲမှု
#ကျားဖြန့်
#တရုတ်နိုင်ငံသား
#မင်္ဂလာရပ်ကွက်
