မဲခေါင်၊ မတ် ၈
ရှမ်းပြည်တောင်ပိုင်း၊ ပင်လောင်းမြို့နယ်၊ နန်းတုတ်ကျေးရွာတွင် စစ်ဘေးရှောင်ပြီး နေရပ်ပြန်လာသည့် ဒေသခံများထံမှ ပအိုဝ်းပြည်သူ့စစ် – PNO အဖွဲ့က ငွေ ကြေးကောက်ခံနေကြောင်း ဒေသခံများက ပြောသည်။
ဒေသတွင်းတွင် ယခင်က စစ်ရေးတင်းမာမှုများနှင့် လက်နက်ကြီး ပစ်ခတ်မှုများကြောင့် နန်းတုတ်ကျေးရွာသားများသည် နီးစပ်ရာ ကျေးရွာများနှင့် နောင်တရားမြို့ဘက်သို့ ထွက်ပြေးတိမ်းရှောင်ခဲ့ကြရသည်။
အခြေအနေ အနည်းငယ် တည်ငြိမ်လာပြီးနောက် အချို့အိမ်ထောင်စုများသည် အုပ်စုလိုက် နေရပ်သို့ ပြန်လည်ဝင်ရောက်လာနေကြောင်း သိရသည်။
သို့သော် နေရပ်ပြန်လာသော အိမ်ထောင်စုများအား တစ်အိမ်လျှင် ကျပ် ၅ သိန်းပေးရန် PNO က တောင်းခံနေကြောင်း ဒေသခံတစ်ဦးက ပြောသည်။
“ရွာသားတွေ နေရပ်ပြန်လာရင် တစ်အိမ်ကို ငွေ ၅ သိန်းပေးရမယ်လို့ ပြောထားတယ်။ မပေးရင် ရွာထဲ ပြန်နေခွင့် မရနိုင်ဘူးလို့လည်း ပြောတယ်။ အလုပ်အကိုင်တွေ မပြန်စနိုင်သေးဘူး။ အခုလို ငွေတောင်းတော့ ပိုပြီး ခက်ခဲနေတယ်” ဟု ဒေသခံတစ်ဦးက မဲခေါင်သို့ ပြောသည်။
ဒေသခံများ၏ ပြောကြားချက်အရ စစ်ဘေးရှောင် ကာလအတွင်း လယ်ယာလုပ်ငန်းများ ရပ်နားထားရခြင်း၊ ဝင်ငွေရင်းမြစ်များ မရှိတော့ခြင်းနှင့် နေအိမ်ပစ္စည်းများ ပျက်စီးဆုံးရှုံးမှုများကြောင့် အများစုမှာ စီးပွားရေးအခက်အခဲများနှင့် ရင်ဆိုင်နေရကြောင်း သိရသည်။
ထိုအခြေအနေတွင် နေရပ်ပြန်လာချိန်၌ တစ်အိမ်လျှင် ကျပ် ၅ သိန်းပေးဆောင်ရန် တောင်းခံခြင်းကြောင့် ဒေသခံများအတွက် ပိုခက်ခဲလာကြောင်း ဆိုသည်။
“စစ်ရှောင်နေရတဲ့ အချိန်မှာ ဝင်ငွေမရှိဘူး၊ အခုရွာပြန်လာတော့ အိမ်ပြင်ရ၊ လယ်ပြန်လုပ်ဖို့ ပြန်ရင်းနှီးရတာတွေရှိတယ်။ ဒီအချိန်မှာ ၅ သိန်းပေးရမယ်ဆိုတော့ တော်တော်ခက်ခဲတယ်” ဟု ဒေသခံတစ်ဦးက ပြောသည်။
အချို့ဒေသခံများမှာ ငွေကြေး မပေးနိုင်သေးသဖြင့် နေရပ်သို့ ပြန်လည်နေထိုင်နိုင်ခြင်း မရှိသေးကြောင်းနှင့် အချို့မှာလည်း အကြွေးယူကာ ပေးဆောင်ရသည့် အခြေအနေများနှင့် ကြုံတွေ့နေရကြောင်း ပြောသည်။
ထို့ပြင် ပင်လောင်းနှင့် ပအိုဝ်းဒေသအချို့တွင် PNO နှင့် စစ်ကောင်စီ ပူးပေါင်းတပ်များက ဒေသခံများထံမှ ငွေကြေးကောက်ခံခြင်း၊ စစ်သားအတင်း အဓမ္မစုဆောင်းခြင်း၊ စစ်တပ်အတွက် အစားအသောက် ပံ့ပိုးရန် ဖိအားပေးခြင်းများလည်း ပြုလုပ်နေကြောင်းဒေသတွင်း သတင်းရင်းမြစ်များက ပြောသည်။
#MeKongNews
#စစ်ရှောင်
#ပင်လောင်း
#နန်းတုတ်
#PNO
