မဲခေါင်၊ မတ် ၄ ရက်
ရှမ်းပြည်တောင်ပိုင်း၊ ဆီဆိုင်မြို့နယ်အတွင်းရှိ ကျေးရွာအချို့တွင် ပအိုဝ်းပြည်သူ့စစ် – PNO က ကျေးရွာအဝင်အထွက် ဂိတ်များ၌ ကင်းစောင့်နေပြီး ညအချိန်မတော် ပြန်လာသည့် ဒေသခံ ရွာသားများကို အချိန်နောက်ကျသည်ဟု အကြောင်းပြကာ ငွေညှစ်တောင်းခံမှုများ ပြုလုပ်နေကြောင်း ဒေသခံများထံမှ သိရသည်။
ပြီးခဲ့သည့် ရက်ပိုင်းက ဆီဆိုင်မြို့နယ်၊ နားဆမ်ကျေးရွာအုပ်စု၊ ပင်လဲင်းကျေးရွာရှိ ကျောင်းသား၊ ကျောင်းသူများသည် ဘောလုံးပြိုင်ပွဲတွင် ပထမဆုရရှိသဖြင့် အင်းလေးဒေသသို့ အပန်းဖြေခရီး သွားရောက်ခဲ့ကြသည်။
၎င်းတို့အဖွဲ့ ပြန်လာချိန်တွင် ညမိုးချုပ်သွားသဖြင့် ကျေးရွာအဝင်တွင် ဂိတ်ချစောင့်နေသော PNO အဖွဲ့ဝင်များက တားဆီးကာ ငွေကျပ် ၃ သောင်း ပေးဆောင်ရန် အကျပ်ကိုင်တောင်းခံခဲ့ခြင်း ဖြစ် သည်။
“ဟုတ်တယ်၊ ကျနော်တို့ ဆရာလည်းပါတယ်။ ကားဆရာက ညှိလို့မရတော့ ၃ သောင်းပေးလိုက်ရတယ်။ သူတို့လက်ထဲ လက်နက်တွေနဲ့ဆိုတော့ မပေးလို့လည်း မရဘူးလေ။ ဒါက အခုမှမဟုတ်ဘူး၊ အရင်နှစ် တန်ဆောင်တိုင်တုန်းကလည်း သွားပြီး ပြန်လာတာ နောက်ကျလို့ဆိုပြီး အခုလိုပဲ ပေးခဲ့ရတာမျိုးတွေ ရှိတယ်” ဟု ယင်းခရီးစဉ်တွင် ပါဝင်ခဲ့သည့် သတင်းရင်းမြစ်တစ်ဦးက ပြောသည်။
ဆီဆိုင်မြို့နယ်အတွင်း စစ်ရေးပဋိပက္ခများ ဖြစ်ပွားပြီးနောက် ပိုင်း PNO သည် ကျေးရွာ အဝင် အထွက်များတွင် စစ်ဆေးရေးဂိတ်များ ပိုမိုတိုးမြှင့် ချထားပြီး ယခုကဲ့သို့ အကြောင်းအမျိုးမျိုး ပြကာ ငွေကြေးကောက်ခံမှုများ ဆက်တိုက်ရှိနေကြောင်း ဒေသခံများက ဆိုသည်။
ယခုကဲ့သို့ ငွေကြေးတောင်းခံမှုသည် စစ်ဘေးဒဏ်နှင့် ကုန် ဈေးနှုန်းဒဏ် ခံနေရသည့် ဒေ သခံ ရွာသားများအတွက် ဝန် ထုပ်ဝန်ပိုး ဖြစ်နေပြီး လုံခြုံရေးအ ကြောင်းပြကာ ကိုယ်ကျိုး ရှာနေသည့် လုပ်ရပ်အဖြစ် ဝေဖန်မှုများ ထွက်ပေါ်နေသည်။
ယင်းငွေကြေးတောင်းခံမှုများ သည် တရားဝင် သတ်မှတ်ထားသည့် ဒဏ်ကြေးများ မဟုတ်ဘဲ ဂိတ်စောင့်တပ်သားများက စိတ်ထင်သလို တောင်းခံနေခြင်းဖြစ်သည်ဟု ဆိုသည်။
ထို့ကြောင့် အဖွဲ့အစည်း တာဝန်ရှိသူများ အနေဖြင့် အောက်ခြေတပ်သားများ၏ လုပ်ရပ်ကို အ ရေးယူဆောင်ရွက်ပေးနိုင်ရန်လည်း ဒေသခံများက မျှော်လင့်နေကြသည်။
#MeKongNews
#ဆီဆိုင်
#ရွာသားများ
#PNO
#အဓမ္မ
#ငွေညှစ်နေ
