မဲခေါင် ၊ မတ် ၃
ရှမ်းပြည်သူလူထုများကို ရှမ်းလက်နက်ကိုင်တပ်ဖွဲ့များက ကာကွယ်စောင့်ရှောက်နိုင်ခြင်း မရှိဘဲ တာဝန်များ ပျက်ကွက် လစ်ဟင်းနေသည်ဟု ရှမ်းလူငယ်များက ကြေညာလိုက်သည်။
မတ် ၁ ရက်တွင် ကျရောက်ခဲ့သော ရှမ်းလူငယ်နေ့၏ ထုတ်ပြန်ကြေညာချက်တွင် ရှမ်းလူငယ်များက ယင်းကဲ့သို့ ပြောဆိုလိုက်ခြင်းဖြစ်သည်။
“ယနေ့အချိန်အခါတွင် ရှမ်းလူထုများ မတရားဖိနှိပ် အနိုင်ကျင့်ခံနေရသည်ကို သိမြင်နေပါလျက် မည်သည့် ရှမ်းလက်နက်ကိုင် အဖွဲ့အစည်းကမှ ထိရောက်သော ကာကွယ်စောင့်ရှောက်မှုများ ပေးနိုင်ခြင်းမရှိဘဲ ရှမ်းလူထုအပေါ် အဓိကကျသော တာဝန်လုပ်ငန်းများ ပျက်ကွက်လစ်ဟင်းလျက် ရှိနေသည်မှာ လုံးဝ မဖြစ်သင့်ပါ။”ဟု ရှမ်းလူငယ်များက ထုတ်ပြန်ချက်တွင်ပြောသည်။
ထို့ကြောင့် ရှမ်းလူထုများ၏ တန်းတူရေး၊ ကိုယ်ပိုင်ပြဌာန်းခွင့်နှင့် လူမှုဘဝလုံခြုံရေးကို ကာကွယ် စောင့်ရှောက်ပေးရမည့် ရှမ်းလက်နက်ကိုင် အဖွဲ့အစည်းများအနေဖြင့် ရှမ်းလူထု၏ လူနေမှု ဘဝလုံခြုံရေးနှင့် အကျိုးစီးပွား ထိခိုက်နစ်နာမှုများကို အဓိကထား ကာကွယ်စောင့်ရှောက်ပြီး တာဝန်ယူ ဆောင်ရွက်ပေးကြရန်လည်း ရှမ်းလူငယ်များက တိုက်တွန်းထားသည်။
ထို့ပြင် ရှမ်းနိုင်ငံရေးပါတီများသည် ရှမ်းလူထုများ တွေ့ကြုံခံစားနေရသော ဒုက္ခများစွာအပေါ် လျစ်လျူရှုပြီး နှုတ်ဆိတ်နေကြသည်ဟုလည်း ထုတ်ပြန်ချက်တွင် ဖော်ပြထားသည်။
လက်ရှိ အခြေအနေတွင် ရှမ်းလူထုများသည် လူမှုစီးပွား ပျက်စီးထိခိုက်မှု ဒုက္ခများစွာ ခံစားနေရသည့်အပြင် လက်နက်ကိုင် အဖွဲ့အစည်းများ၏ မတရားအနိုင်ကျင့် ဗိုလ်ကျမှုများကိုလည်း ခံနေရသည်ဟု ရှမ်းလူငယ်များကဆိုသည်။
“ရွေးကောက်ပွဲကာလတွင် ရှမ်းနိုင်ငံရေး ပါတီများမှ လွှတ်တော်ကိုယ်စားလှယ်များသည် ရှမ်းလူထုများထံသို့ နိုင်ငံရေး ကတိကဝတ်များ ပေးခဲ့ကြသော်လည်း ယခုအချိန်တွင် ရှမ်းနိုင်ငံရေးပါတီများ အနေဖြင့် ရှမ်းလူထုများ တွေ့ကြုံခံစားနေရသော ဒုက္ခများစွာအပေါ် လျှစ်လျုရှုပြီး နှုတ်ဆိတ်နေကြသည်မှာ လုံးဝမဖြစ်သင့်ပါ။”ဟု ရှမ်းလူငယ်များက ပြောသည်။
ထို့ကြောင့် ရှမ်းလူထုများ၏ နိုင်ငံရေးအရ အခြေခံ တန်းတူရပိုင်ခွင့် အခွင့်အရေးနှင့် လူမှုစီးပွား ဖွံ့ဖြိုးတိုးတက်ရေးကို ဦးတည်ဖော်ဆောင်သည့် အဖွဲ့အစည်းများဖြစ်သည့် ရှမ်းနိုင်ငံရေးပါတီများ အနေဖြင့် ပြည်သူ့အခက်အခဲများကို နည်းလမ်းရှာဖွေ ကူညီပြီး အတူတကွ ရပ်တည် ဖြေရှင်းပေးရန် ရှမ်းလူငယ်များက ထုတ်ပြန်ချက်တွင် တိုက်တွန်းသည်။
ရှမ်းလက်နက်ကိုင်တပ်ဖွဲ့များတွင် ရှမ်းပြည်ပြန်လည်ထူထောင်ရေးကောင်စီ – RCSS/SSA နှင့် ရှမ်းပြည်တိုးတက်ရေးပါတီ – SSPP/SSA သည် ထင်ရှားသည့် အဖွဲ့များဖြစ်ပြီး နိုင်ငံရေးပါတီတွင် ရှမ်းတိုင်းရင်းသားများ ဒီမိုကရေစီအဖွဲ့ချုက် – SNLD နှင့် ရှမ်းနှင ့်တိုင်းရင်းသားများ ဒီမိုကရက်တစ်ပါတီ – SNDP တို့သည် ထင်ရှားသည့် အဖွဲ့များဖြစ်သည်။
#MeKongNews
#ရှမ်းလက်နက်ကိုင်တပ်ဖွဲ့
#ရှမ်းပါတီများ
#ပြည်သူလူထု
#တာဝန်ပျက်ကွက်
#ရှမ်းလူငယ်
