မဲခေါင်၊ ဖေဖော်ဝါရီ ၂၇
အာဖဂန်နစ္စတန်နိုင်ငံ အရှေ့ပိုင်းနှင့် အရှေ့တောင်ပိုင်းရှိ ပါကစ္စတန် နယ်စပ်စခန်းများကို လက်တုံ့ပြန် တိုက်ခိုက်မှုများ ပြုလုပ်ခဲ့ပြီး ပါကစ္စတန်တပ်ဖွဲ့ဝင် ၅၀ ကျော်ကို သတ်ဖြတ်နိုင်ခဲ့သည်ဟု အာဖဂန် တာလီဘန် အာဏာပိုင်များက အခိုင်အမာ ပြောသည်။
အာဖဂန်တပ်ဖွဲ့ဝင်များက ပါကစ္စတန် နယ်စပ်စခန်း ၁၉ ခုကို ဖျက်ဆီးနိုင်ခဲ့ပြီး ပါကစ္စတန်စစ်သား အချို့ကိုလည်း ဖမ်းဆီး ထိန်းသိမ်းထားကြောင်း တာလီဘန်အစိုးရ ပြောရေးဆိုခွင့်ရှိသူ ဇာဘီဟူလာမူဂျာဟစ်က BBC သို့ ပြောသည်။
သို့သော် ထိုကိန်းဂဏန်းများနှင့် ပတ်သက်၍ သီးခြား အတည်ပြုနိုင်ခြင်း မရှိသေးပေ။
တစ်ချိန်တည်းမှာပင် ပါကစ္စတန်ဘက်ကမူ ၎င်းတို့သည် အာဖဂန်တာလီဘန်တို့၏ နယ်စပ်စခန်း ၂၇ ခုကို ဖျက်ဆီးခဲ့ပြီး တာလီဘန်တပ်ဖွဲ့ဝင်များ အပြင်းအထန် ထိခိုက်သေဆုံးခဲ့ကြောင်း ပြောကြားထားသည်။
ယနေ့အစောပိုင်းတွင် အာဖဂန်နစ္စတန်နှင့် ပါကစ္စတန်နိုင်ငံတို့အကြား အဓိကနယ်စပ်ဖြတ်ကျော်ဝင်ပေါက်တစ်ခု၌ သေနတ်သံများနှင့် လက်နက်ကြီးပစ်ခတ်သံများ ကြားခဲ့ရကြောင်း AFP သတင်းဌာနက ဖော်ပြခဲ့သည်။
ပါကစ္စတန်နိုင်ငံ တော်ခမ်မြို့နှင့် အာဖဂန်နစ္စတန်နိုင်ငံ နန်ဂါဟာပြည်နယ်တို့ကို ဆက်သွယ်ထားသည့် ယင်း တော်ခမ်နယ်စပ်ဂိတ်သည် ၂ နိုင်ငံအကြား လူနှင့်ကုန်စည်များ ကူးသန်းသွားလာရာ အဓိက လမ်းကြောင်းတစ်ခုဖြစ်သည်။
ပြီးခဲ့သည့် အောက်တိုဘာလက နယ်စပ်တိုက်ပွဲများ စတင်ဖြစ်ပွားခဲ့ပြီးနောက်ပိုင်း ၂ နိုင်ငံအကြား ကုန်းလမ်းနယ်စပ်များကို အများအားဖြင့် ပိတ်ထားခဲ့သော်လည်း၊ ဖွင့်လှစ်ထားဆဲဖြစ်သည့် အနည်းငယ်သော နေရာများတွင် တော်ခမ်နယ်စပ်ဂိတ်လည်း ပါဝင်သည်။
ပါကစ္စတန်နိုင်ငံအတွင်း ဖိအားပေးမှုများနှင့် ဆိုးရွားလာသော နေထိုင်မှု အခြေအနေများကြောင့် နေရပ်ပြန်ကြသည့် အာဖဂန်နိုင်ငံသား အများအပြားသည် ယင်းနယ်စပ်ဂိတ်ကို အသုံးပြု၍ အာဖဂန်သို့ ပြန်လည် ဝင်ရောက်ခဲ့ကြသည်။
နယ်စပ်ဂိတ်အနီးရှိ နေရပ်ပြန်သူများ ခိုလှုံရာစခန်းတစ်ခု အတွင်းသို့ ညတွင်းချင်းပင် မော်တာကျည်တစ်လုံး ကျရောက် ပေါက်ကွဲခဲ့ရာ ဒုက္ခသည် ၇ ဦး ဒဏ်ရာရရှိခဲ့ပြီး ၎င်းတို့အနက် တစ်ဦးမှာ ဒဏ်ရာ ပြင်းထန်ကြောင်း ပြည်နယ် တာဝန်ရှိသူတစ်ဦးက AFP သို့ ပြောကြားခဲ့သည်။
နေရပ်ပြန် အာဖဂန် နိုင်ငံသားတစ်ဦးကလည်း ၎င်းအနေဖြင့် သွေးကွက်များနှင့် ဒဏ်ရာရရှိထားသည့် ကလေးငယ်များနှင့် အမျိုးသမီးများကို မြင်တွေ့ခဲ့ရကြောင်း ပြောကြားခဲ့ပြီး၊ အခြားတစ်ဦးကမူ လူတိုင်း အထိတ်တလန့် ထွက်ပြေးခဲ့ကြရကြောင်း ဆိုသည်။
Ref: BBC
#MeKongNews
#ပါကစ္စတန်စစ်သား
#သတ်ဖြတ်
#တာလီဘန်
