မဲခေါင်၊ ဖေဖော်ဝါရီ ၂၃

စိတ်ကြွဆေးများနှင့် တရားမဝင်ပစ္စည်းများ လက်ဝယ်တွေ့ရှိ၍ ဖမ်းဆီးခဲ့သည့် အမှုကို လားရှိုးခရိုင်တရားရုံးက ကျပ်သိန်း ၆ ထောင်ယူ၍ ချုပ်ရက် ၃ လမပြည့်မီတွင်ပင် လွှတ်မိန့်ချခဲ့သည် ဟုဆိုကာ ဒေသခံအချို့က ဝေဖန်နေကြကြောင်း သတင်းရင်းမြစ်များထံမှ သိရသည်။

ယမန်နှစ်၊ နိုဝင်ဘာ ၂ ရက် နံနက်ပိုင်း၌ သတင်းအရ စစ်ကောင်စီ တပ်ဖွဲ့ဝင်များက ရှမ်းပြည်မြောက်ပိုင်း၊ လားရှိုးမြို့၊ ရပ်ကွက်(၅) ရှိ နေအိမ်အတွင်း ဝင်ရောက်ရှာဖွေခဲ့ရာ လိုင်စင်မဲ့ကား တစ်စီး၊ တရားမဝင် သိမ်းဆည်းထားသည့် ပြောက်ကျားစစ်ဖိနပ် အရန်များစွာနှင့် စိတ်ကြွဆေးပြား အများအပြားကို ဖမ်းဆီးမိခဲ့ကြောင်း ဒေသခံများထံမှ သိရသည်။

ထို့နောက် အိမ်ရှင်ဒေါ် ထန်ရှန်းရင်ကို သက်သေခံပစ္စည်းများ နှင့်အတူ လားရှိုးမြို့မရဲစခန်း၌ ထိန်းသိမ်းခဲ့ကာ လားရှိုးခရိုင်တရားရုံးတွင် သက်ဆိုင်ရာ ပုဒ်မများဖြင့် တရားစွဲခဲ့ကြောင်း သိရသည်။

ထိုသို့ တရားစွဲခဲ့သည့် အမှုများအား ပြီးခဲ့သည့် ဖေဖော်ဝါရီ ၉ ရက်၌ လားရှိုးခရိုင်တရားရုံးက လွတ်မိန့် ချပေးခဲ့ကြောင်း သိရသည်။

“ဒေါ်ထန်ရှန်းရင်ကို တရားသူကြီးက ရုံးရှေ့ လွှတ်စေ အမိန့်ချလိုက်တာလို့ ပြောနေကြတယ်။ ပြီးခဲ့တဲ့ ဖေဖော်ဝါရီ ၉ ရက်က အိမ်ကိုပြန်လာတာ တွေ့လို့ သွားနှုတ်ဆက်ရင်း သူ့အိမ်မှာ ပြောနေကြတာကို ကြားခဲ့တာပါ။ သူ့အမှုတွေ အားလုံးကို စစ်ဆေးကြားနာပြီး ဒေါ်ထန်ရှန်းရင်အပေါ် အပြစ်မရှိကြောင်းကို တရားသူကြီးက သတ်မှတ်လို့ အခုလို လွတ်ဖို့ အမိန့်ချတာဖြစ်မှာပေါ့”ဟု ဒေါ်ထန်ရှန်းရင်နှင့် တစ်ရပ် ကွက်ထဲနေ အိမ်နီးချင်းတစ်ဦးက ပြောသည်။

လွတ်မြောက်လာသူ ဒေါ်ထန်ရှန်းရင်၏ အမျိုးသားမှာ ဦးမောင်မောင်နိုင် ဆိုသူဖြစ်ပြီး အမှုမှလွတ်ရန် ကျပ်သိန်း ၆ ထောင်ကျော် ကုန်ကျခဲ့ကြောင်း ၎င်း၏ အသိုင်းအဝိုင်းကြားတွင် ကြွားဝါ ပြောဆိုနေသည်ဟု သတင်းရင်းမြစ်များက ဆိုသည်။

ထို့ကြောင့် စိတ်ကြွဆေးများနှင့် တရားမဝင် ပစ္စည်းများအား သက်သေနှင့်တကွ ဖမ်းမိသည့် ၎င်းအား တရားရုံးက လွှတ်ပေးခဲ့သည့်အပေါ် ယင်းဖြစ်စဉ်အား သိရှိထားသည့် ဒေသခံအချို့က မေးခွန်းထုတ် ဝေဖန်နေကြကြောင်း သိရသည်။

ထိုအမှုအား ကိုင်တွယ်ခဲ့သူမှာ လားရှိုးခရိုင် ဒုတရားသူကြီး ဦးခိုင်ဇော်အောင် ဖြစ်ကြောင်း သတင်းရင်း မြစ်များထံမှ သိရသည်။

ဖမ်းဆီးမိသည့်အထဲတွင် စိတ်ကြွဆေးပြား ၂ ထောင်၊ စစ်ဖိနပ်အရန် ၈ ထောင်နှင့် လိုင်စင်မဲ့ကားတစ်စီး ပါဝင်ပြီး လားရှိုးရဲစခန်းက မူးယစ်မှုနှင့် ပို့ကုန်သွင်းကုန်ဥပဒေများဖြင့် အမှုဖွင့်ခဲ့ကြောင်း သိရသည်။

#MeKongNews
#စိတ်ကြွဆေး
#တရားမဝင်ပစ္စည်း
#လက်ဝယ်မိ
#လားရှိုးတရားရုံး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)