မဲခေါင်၊ ဖေဖော်ဝါရီ ၂၃
လာမည့် တပေါင်းလပြည့်နေ့ (မတ်၂ ရက်) တွင် ကျရောက်မည့် ပအိုဝ်းအမျိုးသားနေ့ အခမ်းအနားအတွက် ငွေကောက်ခံပြီး ဖြစ်သည့်ပြင် တောင်ကြီးတမြို့နယ်လုံးရှိ ပြည်သူများ တစ်အိမ် အနည်းဆုံး ထမင်း ၅ ထုပ် ချက်ပို့ပေးရမည်ဟု စစ်ကောင်စီလက်အောက်ခံ PNO ပြည်သူ့စစ်က ထပ်မံ အမိန့်ထုတ်ထားသည်ဟု ဒေသခံပြည်သူများထံမှ သိရသည်။
တောင်ကြီးမြို့တွင် ကျင်းပမည့် ပအိုဝ်းအမျိုးသားနေ့ပွဲသို့ လာရောက်သူများအား ကျွေးမွေးရန် ဟုဆိုကာ တစ်အိမ် အနည်းဆုံး ထမင်း ၅ ထုပ် ချက်ပို့ရမည်ဖြစ်ပြီး မနက် ၁၀ နာရီအရောက် ကိုယ့်အစီစဉ်နှင့်ကိုယ် လာပို့ရမည်ဟု PNO က အမိန့်ထုတ်ခြင်း ဖြစ်ကြောင်း သတင်းရင်းမြစ်များထံမှ သိရသည်။
“အမျိုးသားနေ့အတွက် တစ်အိမ်ထမင်းငါးထုပ် အနည်းဆုံး ချက်ပေးဖို့ အမိန့်ပေးလာတာပါ။ အမျိုးသား နေ့အတွက်မလို့ ထမင်းချက်ပို့ပေးဖို့က စေတနာရှိပါတယ်။ ဒါပေမယ့် အမျိုးသားနေ့အတွက် ကျနော် တို့ရွာမှာ PNO အုပ်ချုပ်ရေးမှူးတွေက ငွေ ၃ သောင်းလည်းကောက်တယ် အဲဒါကျတော့ လွဲနေတယ်လို့ ခံစားရတယ်ပေါ့နော်။ ထမင်းထုပ်လည်း ပို့ရမယ်ဆိုတော့ ငွေ ၃ သောင်းကကော ဘာလုပ်ဖို့လဲ သိချင်တယ်”ဟု တောင်ကြီး မြောက်ဘက်ရှိ ဒေသခံတစ်ဦးက ပြောသည်။
ပြည်သူများအနေဖြင့် အမျိုးသားနေ့အတွက် ထမင်းချက်ပို့ပေးရန်မှာ ဝန်မလေးသော်လည်း ပွဲတော်အတွက် ကောက်ထားသည့် ငွေများကိုမူ စာရင်းရှင်းတမ်း ထုတ်ပြန်ပေးစေလိုကြောင်း တောင်ကြီး သတင်းရင်းမြစ်တစ်ဦးက ပြောသည်။
“ကျနော်တို့ရွာကတော့ တပေါင်းကွင်းကို စုပြီးပို့ရမှာပေါ့နော်၊ အရင်ခေတ်ကလည်း ချက်ပို့ဖူးပါတယ်။ ဒီအပေါ်မှာတော့ စေတနာက ရှိပါတယ်။ ဗဟိုက ငွေမကောက်ဘူး ပြောပြီး အောက်က အွိုင်စား (အုပ်ချုပ်ရေးမှူး)တွေက ငွေကောက်နေတယ်။ ဒါကြောင့်မို့ ပြည်သူ တယောက်အနေနဲ့ ပွဲပြီးတဲ့အခါ ပွဲအတွက်ဆိုပြီး ကောက်ထားတဲ့ ပိုက်ဆံတွေကို အားလုံးသိအောင် ရှင်းတမ်း ထုတ်ပြန်စေချင်တာပဲ ရှိပါတယ်”ဟု တောင်ကြီး ဒေသခံတစ်ဦးက ပြောသည်။
PNO ၏ အမိန့်အရ တောင်ကြီးမြို့နယ် မြောက်ဘက်ခြမ်းရှိ ကျေးရွာများသည် ထမင်းထုပ်များကို တောင်ကျောင်းကြီးကျောင်းတိုက်သို့ ပို့ဆောင်ရမည်ဖြစ်ပြီး တောင်ဘက်ခြမ်းရှိ ကျေးရွာများမှာ ပအိုဝ်း တပေါင်းကွင်းသို့ ပို့ဆောင်ပေးရမည် ဖြစ်သည်။
စစ်ကောင်စီလက်အောက်ခံ PNO ပြည်သူ့စစ်သည် ပွဲလမ်းသဘင်များတွင် သာမက စစ်ရေးတွင်လည်း ဒေသခံလူထုကို ထမင်းထုပ် ချက်ပို့ခိုင်းခြင်း၊ ရှေ့တန်းစရိတ်ဟုဆိုကာ တစ်အိမ် ၅ သောင်းထက်မနည်း လစဉ် ဆက်ကြေးတောင်းခြင်းများ ပြုလုပ်လျက်ရှိသည်။
#MeKongNews
#တောင်ကြီး
#ပအိုဝ်းအမျိုးသားနေ့
#PNO
#ငွေတောင်း
#ထမင်း
