မဲခေါင်၊ ဖေဖော်ဝါရီ ၂၃
အရက်မူး၍ ဆိုင်ကယ်စီးလာစဉ် ထော်လာဂျီကို ဝင်တိုက်မိပြီး PNA ခေါင်းဆောင် ဆရာဖေ သေဆုံးခဲ့သည့်ဖြစ်စဉ်တွင် ထော်လာဂျီပိုင်ရှင်နှင့် မိသားစုဝင်များကို PNA ပြည်သူ့စစ်အဖွဲ့က ဖမ်းဆီးနှိပ်စက်ကာ ငွေကျပ်သိန်း ၈၀၀ ဖြင့် ပြန်လည်ရွေးခိုင်းခဲ့ကြောင်း နယ်မြေခံသတင်းရင်းမြစ်များထံမှ သိရသည်။
ညောင်ရွှေမြို့နယ်၊ အင်းလေးဒေသတွင် ဖေဖော်ဝါရီ ၁၇ ရက်က ထော်လာဂျီမောင်းနှင်သူမှာ ဘုရားဖြူကျေးရွာမှ ဖြစ်ပြီး သလဲဦးကျေးရွာမှ ပျိုးပင်များဝယ်ယူ၍ အပြန်တွင် ယင်းယာဉ်တိုက်မှု ဖြစ်ပွားခဲ့ခြင်းဖြစ်သည်။
ဆရာဖေ သေဆုံးပြီးနောက် ပအိုဝ်းပြည်သူ့စစ် – PNA အဖွဲ့သည် အခင်းဖြစ်ပွားရာ၌ ကျကျန်ရစ်သည့် ပျိုးခြင်းမှတစ်ဆင့် လိုက်လံစုံစမ်းရာမှ ထော်လာဂျီပိုင်ရှင်ကို ရှာဖွေတွေ့ရှိသွားခဲ့ခြင်း ဖြစ်ကြောင်း ဒေသခံများက ပြောသည်။
ဖေဖော်ဝါရီ ၂၁ ရက် ည ၆ နာရီခန့်တွင် PNA အဖွဲ့ဝင်များသည် ထော်လာဂျီပိုင်ရှင်နှင့် ဇနီးဖြစ်သူ အပါအဝင် မိသားစုဝင် ၃ ဦးကို ဖမ်းဆီးရိုက်နှက်ကာ ညောင်ရွှေမြို့နယ်၊ ရေပူကျေးရွာသို့ ခေါ်ဆောင်သွားပြီး နှိပ်စက်ခဲ့ကြကြောင်း ဒေသခံများထံမှ သိရသည်။
ထော်လာဂျီပိုင်ရှင်အနေဖြင့် အသက်ရှင်လိုပါက ငွေကျပ်သိန်း ၁,၀၀၀ ပေးရမည်ဟု PNA ဘက်က ခြိမ်းခြောက်ခဲ့သဖြင့် နောက်ဆုံးတွင် ငွေကျပ်သိန်း ၈၀၀ ပေးဆောင်ကာ ယမန်နေ့က ပြန်လည်လွတ်မြောက်လာခဲ့ခြင်း ဖြစ်ကြောင်း၊ ပြန်လည်လွတ်မြောက်လာသည့် မိသားစုဝင်များသည် PNA အဖွဲ့၏ နှိပ်စက်မှုကြောင့် ရရှိထားသော ဒဏ်ရာများကို ဆေးခန်း၌ပင် သွားရောက်မပြရဲဘဲ အလွန်အမင်း ထိတ်လန့်ကြောက်ရွံ့နေကြကြောင်း ဒေသခံတစ်ဦးက မဲခေါင်သို့ပြောသည်။
“မှားတာက အရက်မူးပြီး မောင်းလာတဲ့ ဆရာဖေပါ။ သူက ဝင်တိုက်ပြီး ခေါင်းကွဲသေတာ။ ချက်ချင်းသေတာမဟုတ်ဘူး၊ ဒါပေမဲ့ သူမှန်းသိလို့ ဘယ်သူမှ မကူညီရဲကြတာ။ ထော်လာဂျီသမားကလည်း ကြောက်လို့ ထွက်ပြေးတာပေါ့။ အခုတော့ ငွေပေးနိုင်လို့သာ အသတ်ခံရမယ့်ဘေးက လွတ်လာတာ။ ရဲတွေကလည်း ဘာမှဝင်မလုပ်ပေးဘူး” ဟု ၎င်းက ပြောသည်။
ယင်းဖြစ်စဉ်တွင် လမ်းကြောင်းမှန်အတိုင်း မောင်းနှင်လာသည့် ထော်လာဂျီကို အရက်မူးနေသည့် PNA ဆရာဖေက ဝင်တိုက်ခဲ့ခြင်းဖြစ်သော်လည်း ယခုကဲ့သို့ မိသားစုကို ဖမ်းဆီးနှိပ်စက်ကာ ငွေညှစ်ခဲ့ခြင်းမှာ တရားလက်လွှတ် လုပ်ဆောင်သည့် အဓမ္မမှုသာဖြစ်ကြောင်း ဒေသခံများက ပြောဆိုလျက်ရှိသည်။
#MeKongNews
#ညောင်ရွှေမြို့နယ်
#အင်းလေးဒေသ
#ဆရာဖေ
#ထော်လာဂျီ
