မဲခေါင်၊ ဖေဖော်ဝါရီ ၁၉
ရှမ်းပြည်တောင်ပိုင်း မိုင်းပွန်တွင် စစ်ကောင်စီနှင့်PNO ပြည်သူ့စစ်က ရှမ်းပြည်တိုးတက်ရေးပါ တီ/ ရှမ်း ပြည်တပ်မတော် – SSPP/SSA ကို တပ်ဆုတ်ခိုင်းသဖြင့် နှစ်ဖက်အဖွဲ့ကြား တင်းမာနေသည်ဟု ဒေသခံ သတင်းရင်းမြစ်များထံမှ သိရသည်။
မိုင်းပွန်မြို့ မြောက်ဘက်ရှိ ခိုင်မိုင်းသက်၊ ကုန်းသွီ စသည့် ကျေးရွာများတွင် တပ်စွဲထားသည့် SSPP တပ်ဖွဲ့ကို စစ်ကောင်စီနှင့် PNO က ဖေဖော်ဝါရီ ၁၆ ရက်တွင် တပ်ဆုတ်ခိုင်းရာမှ တင်းမာနေခြင်းဖြစ်သည်ဟု ဒေသခံ သတင်းရင်းမြစ်က ဆိုသည်။
“ရွာတွေပေါ်ကို ဒရုန်းတွေ အကြာကြီးပဲ ဝဲနေတာ ဘယ်ဖက်ဒရုန်းလဲ မသိဘူး၊ ရွာတွေထဲကနေ ဆုတ်သွားဖို့ စစ်တပ်နဲ့ PNO က ရှမ်းစိမ်းတပ် (SSPP) ကို ပြောလာတာ။ ဒီကောင်ကန်မိန်းတကြောကနေ ဆုတ်ခိုင်းတာ မိုင်းပွန် မြောက်ဘက်ပေါ့”ဟု ၎င်းက ဆိုသည်။
လက်ရှိတွင် စစ်ကောင်စီနှင့် PNO က တပ်ဆုတ်ခိုင်းခြင်းကြောင့် SSPP တပ်ဖွဲ့က ကျေးရွာအချို့မှ ထွက်ခွာကာ ပြောင်းရွှေ့ နေရာယူထားသည်ဟုလည်း သတင်းရင်းမြစ်များထံမှ သိရသည်။
“ရှမ်းအဖွဲ့လည်း ရွာထဲ မနေတော့ဘူး။ ခိုင်မိုင်းသက်၊ လုံးဒါရွာဖက်မှာလည်း ရွာထဲကို မနေတော့ဘူး ရွာပြင်ပဘက်တွေကို ပြောင်းသွားပြီ။ ဆက်နေရင် ပစ်မယ်လို့ စစ်တပ်ကပြောလာလို့”ဟု နောက်ထပ် ဒေသခံတစ်ဦးက ပြောသည်။
ယခု ဖြစ်ပေါ်နေသည့် တင်းမာမှုများနှင့် ပတ်သက်ပြီး နှစ်ဖက်အဖွဲ့အစည်းများက မည်သည့် သတင်းထုတ်ပြန်မှုမှ မရှိသေးသော်လည်း တိုက်ပွဲဖြစ်ပွားမည်ကို ဒေသခံများက စိုးရိမ်နေကြသည်။
လက်ရှိ တင်းမာမှု ဖြစ်ပွားနေသည့် နေရာကို ယခင်နှစ်များတွင်လည်း စစ်ကောင်စီက စစ်ကြောင်းထိုး ဝင်ရောက်ရန် စီစဉ်ခဲ့သော်လည်း မအောင်မြင်ခဲ့ပေ။
သို့သော် စစ်မှုထမ်း အများအပြား ခေါ်ယူပြီးနောက် အင်အား ပြန်လည် ဖြည့်တင်းလာနိုင်သည့် စစ်ကောင်စီသည် လက်အောက်ခံ PNO ပြည်သူ့စစ်နှင့် ပေါင်းကာ မိုင်းပွန်မြောက်ဘက်နှင့် ပင်လုံမြို့ အနောက်ဘက်ရှိ တောင်တန်းများပေါ်သို့ လက်ရှိတွင် နယ်မြေစိုးမိုးမှု ရရှိရန် ပြန်လည် လုပ်ဆောင်လာခြင်းဖြစ်သည်။
#MeKongNews
#မိုင်းပွန်
#စစ်ကောင်စီ
#PNO
#SSPP
#စစ်ရေးတင်းမာ
