မဲခေါင်၊ ဖေဖော်ဝါရီ ၁၁
စစ်ကောင်စီလက်အောက်ခံ PNO ပြည်သူ့စစ်အဖွဲ့က တောင်ကြီးမြို့နယ်၊ ကက္ကူကျေးရွာတွင် တစ်အိမ်လျှင် ကျပ်တစ်သိန်းကျော် ဆက်ကြေး တောင်းနေကြောင်း ဒေသခံ သတင်းရင်းမြစ်များထံမှ သိရသည်။
လက်ရှိတွင် PNO စစ်ဦးစီးချုပ် ခွန်မြင့်အောင် နေထိုင်သည့် ရှမ်းပြည်တောင်ပိုင်း၊ ကက္ကူကျေးရွာတွင် ဖေဖော်ဝါရီလအတွက် စစ်သားရှေ့တန်းကြေးဟုဆိုကာ တအိမ်လျှင် တစ်သိန်းသုံးသောင်းကျပ် ဆက်ကြေး တောင်းနေခြင်း ဖြစ်သည်။
“အရင်လတွေက ပုံမှန် PNOနဲ့ စစ်တပ်အတွက် တစ်လ ၄ သောင်းကျပ် ကောက်တာ၊ ဒီ ၂ လပိုင်းကျမှ တစ်အိမ် တစ်သိန်းသုံးသောင်းကျပ်အထိ စစ်သားရှေ့တန်းကြေးဆိုပြီး တိုးကောက်လာတာ။ စစ်ဦးစီးချုပ် နေတဲ့ရွာလည်း ပြောသေးတယ်၊ ဆက်ကြေးက ပိုတောင် ထည့်ရသေးတယ်။ တချို့ ပြည်သူတွေဆို မရှိလို့ မျက်ရည်ပါ ကျနေရတယ်။ ပြည်သူတွေကို အနိုင်ကျင့်လိုက်တာဗျာ”ဟု ကက္ကူကျေးရွာ ဒေသခံတစ်ဦးက ပြောသည်။
ကက္ကူကျေးရွာတွင် ယခင်လများက ဆက်ကြေးအဖြစ် တစ်လ ၃ သောင်းမှ ၅ သောင်း ကျပ်အထိသာ ကောက်ခံနေရာမှ ယခု ဖေဖော်ဝါရီလအတွက် ရုတ်တရက် တစ်သိန်းကျော်အထိ ဆက်ကြေး ကောက်ခံလာခြင်းကြောင့် တောင်သူလယ်သမားများသာ ဖြစ်သည့် ကျေးရွာပြည်သူများမှာ ဆက်ကြေး အပြည့်အဝပေးရန် အခက်အခဲ ဖြစ်နေသည်ဟုလည်း သတင်းရင်းမြစ်များက ပြောသည်။
“တစ်နေ့လုပ် တစ်နေ့စားသမားတွေက ဘယ်လိုလုပ် ထည့်နိုင်မလဲဗျာ။ အခွန်ဆက်ကြေးကလည်း ဒီ တစ်ခုတည်းရှိတာမှ မဟုတ်တာ၊ အခုက တစ်နှစ်ကို ၁၂ မှုမဟုတ်တော့ဘူး။ တလကို ၁၂မှုဖြစ်နေပြီ”ဟု ကက္ကူ ဒေသခံတစ်ဦးက ပြောသည်။
ကက္ကူကျေးရွာသည် နာမည်ကျော် ကက္ကူမွေတော်ဘုရား တည်ရှိရာနေရာဖြစ်ပြီး ခရီးသွားများ အဓိက လာရောက် လည်ပတ်သည့် နေရာဖြစ်သည်။
ယင်းကျေးရွာတွင် PNO စစ်ဦးစီးချုပ် ခွန်မြင့်အောင် နေထိုင်သကဲ့သို့ PNO အဖွဲ့က ကျေးရွာပိုင်မြေများကို သိမ်းပိုက်ကာ မွေတော်ဘုရားရှေ့တွင် လိုင်ကွန်းဟိုတယ်ကို ဖွင့်လှစ်ထားသည်။
လက်ရှိတွင် PNO ပြည်သူ့စစ်သည် စစ်ကောင်စီတပ်နှင့် ပူးပေါင်းကာ တော်လှန်ရေးတပ်ဖွဲ့များကို တိုက်ခိုက်နေပြီး၊ အသက်မပြည့်သေးသည့် ကလေးသူငယ်များကိုပါ အတင်းအဓမ္မ စစ်သားစုဆောင်းကာ ရှေ့တန်းတိုက်ခိုက်ရေး တပ်သားများအဖြစ် အသုံးပြုနေကြောင်း သိရသည်။
#MeKongnews
#ကက္ကူ
#တစ်အိမ်
#ကျပ်တစ်သိန်းကျော်
#PNO
#ဆက်ကြေး
