မဲခေါင်၊ ဖေဖော်ဝါရီ ၃
ပြည်သူ့ပါတီသာ အစိုးရဖွဲ့ခဲ့ပါက စစ်အာဏာသိမ်းမှု ဖြစ်လာလိမ့်မည်ဟု နိုင်ငံရေးသမားတစ်ဦးက ပြောဆိုနေပုံရသည့် အသံဖိုင် လူမှုမီဒီယာပေါ်တွင် ပျံ့နှံ့နေခဲ့ပြီးနောက် ယင်းအသံဖိုင်၏ မူလအစကို အတည်မပြုရသေးသလို စစ်တပ်၏ ရပ်တည်မှုကိုလည်း မည်သည့်နည်းနှင့်မျှ ကိုယ်စားပြုခြင်း မရှိကြောင်း ထိုင်းတော်ဝင်တပ်မတော် ပြောရေးဆိုခွင့်ရှိသူ ဗိုလ်ချုပ် ဝင်းထိုင်းဆူဝါရီက ယမန်နေ့တွင် ပြောကြားသည်။
ကနဦး နားထောင်ကြည့်ရာ၌ အသံဖိုင်သည် နိုင်ငံရေး ဆွေးနွေးမှုတစ်ခု ဖြစ်ပုံရကြောင်း ဝင်းထိုင်းဆူဝါရီးက ပြောသည်။
ပြောဆိုမှုအချို့မှာ ပုဂ္ဂိုလ်ရေးထင်မြင်ချက်များ ဖြစ်နိုင်သော်လည်း အသံဖိုင်ထဲတွင် ကြားရသူများသည် ထိုင်းစစ်တပ်ကို ကိုယ်စားပြုသူများ မဟုတ်သလို တိုက်ရိုက် ဆက်စပ်မှုလည်း မရှိကြောင်း၊ ထို့ကြောင့် ပြောဆိုမှုများသည် ယုံကြည်စိတ်ချနိုင်မှုမရှိဟု ၎င်းက ဆက်ပြောသည်။
ရွေးကောက်ပွဲကာလတွင် နားလည်မှု လွဲမှားခြင်းနှင့် အပြည့်အစုံ မဟုတ်သော သတင်းများ ပျံ့နှံ့သွားခြင်းမှ ကာကွယ်ရန် ရင်းမြစ်အမျိုးမျိုးမှ သတင်းများကို ကြားသိ နားထောင်ရာတွင် ချင့်ချိန်ပိုင်းဖြတ်မှု လုပ်ရန် ဝင်းထိုင်းက ပြည်သူလူထုကို တိုက်တွန်းခဲ့သည်။
ထို့ပြင် စစ်ဘက်အကြီးအကဲများ၏ မူဝါဒအရ ရွေးကောက်ပွဲကာလအတွင်း စစ်ဘက်ရာထူးအဆင့် အားလုံးမှ တပ်ဖွဲ့ဝင်များအနေဖြင့် နိုင်ငံရေး လှုပ်ရှားမှုများတွင် ပါဝင်ပတ်သက်ကြမည် မဟုတ်ဟု ၎င်းကထပ်လောင်း အတည်ပြု ပြောကြားသည်။
ယင်းအစား ၎င်းတို့အနေဖြင့် လက်အောက်ခံ တပ်ဖွဲ့ဝင်များအား ဖွဲ့စည်းပုံ အခြေခံဥပဒေအရ ရပိုင်ခွင့်နှင့် တာဝန်ရှိသည့် ထိုင်းနိုင်ငံသားများပီပီ ဒီမိုကရေစီ လုပ်ထုံးလုပ်နည်းများနှင့်အညီ ရိုးသားဖြောင့်မတ်ပြီး ပွင့်လင်းမြင်သာမှုရှိစွာ မဲပေးကြရန် တိုက်တွန်းအားပေးခြင်းကိုသာ အဓိကအာရုံစိုက် ဆောင်ရွက်သွားမည်ဟု ဆိုသည်။
အေးကျော်
Ref:The Nation
#MeKongnews
#ပြည်သူ့ပါတီ
#အနိုင်ရ
#စစ်အာဏာသိမ်း
#ခြိမ်းခြောက်မှု
#ထိုင်းစစ်တပ်
