မဲခေါင်၊ ဖေဖော်ဝါရီ ၃
ဖမ်းဆီးမိထားသည့် စစ်ကောင်စီသုံ့ပန်း ၅၀၀ ကို ပြန်လွှတ်ပေးမည်ဟု MNDAA က ပြီးခဲ့သည့် ဇန်နဝါရီ ၂၅ ရက်က ဆိုခဲ့သော်လည်း သီတင်းတစ်ပတ်ကျော်ကြာ ယနေ့အထိ ၂၀၆ ဦးသာ ပြန်လွှတ်ပေးသေးကြောင်း စစ်ရေး သတင်းအရင်းအမြစ်အရ သိရသည်။
MNDAA မှ ပြန်လွှတ်ပေးခဲ့သူများမှာ ကျန်းမာရေးမကောင်းသူများနှင့် သက်ကြီးပိုင်းများ အများဆုံးပါဝင်ပြီး ၁၀၂၇ ကာလက ချင်းရွှေဟော်ဘက်တွင်လက်နက်ချခဲ့သူများ ဖြစ်ကြောင်း သိရသည်။
“ရမခ၊ ခလရ ၆၈ နဲ့ သိန္နီအခြေစိုက် ခမရ ၃၂၃ က အဖွဲ့တွေ အများဆုံး ဖြစ်ပါတယ်၊ နောက်ထပ် အသုတ်လိုက် ရောက်မယ်လို့လည်း သိရပါတယ်”ဟု စစ်ရေးသတင်းမြစ်က ပြောသည်။
ယခုနှစ်အတွက် တရုတ်နှစ်သစ်ကူးနေ့မှာ ဖေဖော်ဝါရီ ၁၆ ရက်တွင် ကျရောက်သဖြင့် ၎င်းနေ့မတိုင်မီ ကျန်သည့် အရေအတွက်ကို ပြန်လည်လွှတ်ပေးဖွယ် ရှိကြောင်း သိရသည်။
‘တာကျောင်’ မဟာပူဇော်ပွဲ ကာလအတွင်း စစ်သုံ့ပန်း ၅၀၀ ကို ပြန်လည်လွှတ်ပေးမည် ဖြစ်ကြောင်း ပြီးခဲ့သည့် ဇန်နဝါရီ ၂၅ ရက်တွင် MNDAA က ပြောကြားထားသည်။
၂၀၂၃ ခုနှစ်၊ အောက်တိုဘာ ၂၇ ရက်က ဖော်ဆောင်ခဲ့သည့် ၁၀၂၇ စစ်ဆင်ရေးအတွင်း စစ်ကောင်စီသုံ့ပန်း ထောင်ချီကို MNDAA က ဖမ်းဆီးမိခဲ့သည်။
နောက်ပိုင်းတွင် ဖမ်းမိခဲ့သော စစ်သုံ့ပန်းများနှင့် မိသားစုဝင်များကို MNDAA က ဆက်တိုက် ပြန်လွှတ်ပေးလျက်ရှိသည်။
ယခုနှစ် ဇန်နဝါရီ ၁၄ ရက်တွင်လည်း စစ်သုံ့ပန်း ၈၀ ဦးကို ပြန်လွှတ်ပေးခဲ့သည်။
ထို့နောက် ၁၀၂၇ စစ်ဆင်ရေးများအတွင်း ဖမ်းမိသော စစ်သုံ့ပန်း ၅၀၀ နှင့် အကျဉ်းသား ၉ ဦးကို ပြန်လည် လွှတ်ပေးလိုက်ပြီး ၄၉ ဦးကို ပြစ်ဒဏ်မှ လျှော့ပေါ့ပေးလိုက်သည်ဟု MNDAA က ဇန်နဝါရီ ၂၅ ရက်တွင် ထုတ်ပြန် ခဲ့သည်။
ယင်းမတိုင်ခင် ပြီးခဲ့သည့်နှစ်၊ အောက်တိုဘာ ၁၅ ရက်နှင့် နိုဝင်ဘာ ၁၅ ရက်၌လည်း ၁၀၂၇ စစ်ဆင်ရေးကာလက ဖမ်းဆီးခဲ့သည့် စစ်ဆင်ရေးကွပ်ကဲမှုဌာနချုပ်၊ စကခ – ၁၄ လက်အောက်ခံတပ်ရင်း ခလရ – ၂၇၇ မှ ဗိုလ်မှူး ကျော်ဇေယျ၊ စကခ – ၁ မှ ဗိုလ်မှူး အောင်မြင့်ထူးအပါအဝင် သုံ့ပန်း ၂၅၀ စစ်ခန့်ကိုလည်း MNDAA က ပြန်လွှတ်ပေး ခဲ့သေးသည်။
၂၀၂၄ ခုနှစ်၊ ဇန်နဝါရီ ၅ ရက်က လောက်ကိုင်ဒကစကို တိုက်ခိုက် သိမ်းပိုက်ချိန်၌ လက်နက်ချ အညံ့ခံခဲ့သည့် လောက်ကိုင် ဒကစမှူး ဗိုလ်မှူးချုပ် မိုးကျော်သူ၊ ဗိုလ်မှူးချုပ် ထွန်းထွန်းမြင့် အပါအဝင် ဗိုလ်မှူးချုပ် ၆ ဦး၊ အရာရှိ ၂၂၈ ဦး၊ အခြားအဆင့် ၁၈၉၅ ဦးကို ဖမ်းပြီးနောက် MNDAA က ပြန်လွှတ်ပေးခဲ့သည်။
လားရှိုးမြို့၊ အရှေ့မြောက်တိုင်း စစ်ဌာနချုပ်ကို သိမ်းသည့် တိုက်ပွဲတွင်လည်း တိုင်းမှူးဟောင်း ဗိုလ်ချုပ် စိုးတင့်၊ စစ်ဆင်ရေးကွပ်ကဲမှု ဌာနချုပ်(၁) ဗိုလ်မှူးချုပ် မျိုးမင်းထွေး၊ ရမခတိုင်း စစ်ဦးစီးချုပ် ဗိုလ်မှူးချုပ် သန့်ထင်စိုးတို့ကို လည်း MNDAAက ဖမ်းမိခဲ့ပြီး စစ်ကောင်စီထံ ပြန်လွှဲပေးခဲ့သည်။
#MeKongnews
#စစ်ကောင်စီသုံ့ပန်း
#ပြန်လွှတ်
#၂၀၀ကျော်
#MNDAA
