မဲခေါင်၊ ဖေဖော်ဝါရီ ၃
စံကားဒေသမှ ရေမြုပ်ပြောင်းခြံ ၈၉၉ ဧကအတွက် ထောက်ပံ့ကြေးကို ညောင်ရွှေမြို့နယ်မှူး ဦးကျော်စွာလင်းနှင့် စံကားရပ်ကျေးအုပ်ချုပ်ရေးမှူးများက တောင်သူများထံ တစ်ပြားတစ်ကျပ်မျှ မပေးကြောင်း ဒေသခံများက မဲခေါင်သို့ ပြောသည်။
ပြီးခဲ့သည့်မိုးရာသီတွင် စံကားဒေသ၌ ရေမြုပ်ပြီး ပျက်စီးသွားသော ဒေသခံများ၏ ပြောင်းခြံများ အားလုံးအတွက် စစ်ကောင်စီအုပ်ချုပ်ရေးက ဧကအလိုက်ဖြင့် ထောက်ပံငွေပေးအပ်ထားသည်ကို မြို့နယ်အုပ်ချုပ်ရေးမှူးနှင့် ရွာလူကြီးများက တောင်သူများထံ မပေးဘဲ ဝေစားမျှစားပြုလုပ်နေကြကြောင်း ဒေသခံတစ်ဦးက ပြောသည်။
“ပျက်စီးသွားတဲ့ ပြောင်းခြံ တစ်ဧကကို တစ်သိန်းစီ ပြန်ထောက်ပံ့တယ်။ အဲဒါ ရွာသားတွေကို မပေးဘဲနဲ့ သူတို့အထက်ပိုင်းက အချင်းချင်းဘဲ ညှိပြီး ပိုက်ဆံအိတ်ထဲပဲ အကုန် ထည့်ကြတယ်။ ဝေးစားမျှစားလုပ်တဲ့ အချိန်လည်း ရတာ မညီမျှကြလို့ ရန်တွေဖြစ်ကြတယ်။ တကယ် အရှက်မရှိတဲ့လူကြီးတွေ။ ပြည်သူကို စာနာမယ် မရှိဘူး” ဟု ၎င်းကပြောသည်။
ပြီးခဲ့သည့် မိုးရာသီတွင် စံကားဒေသ ရေနစ်မြုပ်ခြင်းကြောင့် ဒေသခံတောင်သူများစိုက်ပျိုးထားသော ပြောင်းခြံ ၈၉၉ ဧက ပျက်စီးသွားခဲ့ရကြောင်း ဒေသခံများကပြောသည်။
“ပျက်စီးသွားတာက ၈၉၉ ဧကဆိုတော့ ငွေ ၈၉၉ သိန်း ဖြစ်တယ်။ အဲဒီငွေတွေကို သူတို့က ပြည်သူကို တစ်ပြားတစ်ကျပ်မှမပေးဘူး။ ဒီငွေမရခင် စာရင်းကောက်တုန်းကျတော့ အတိအကျနဲ့ သူတို့ဆီ လာတင်ပါ၊ ပုံနဲ့တကွ လာတင်ပါ၊ စာရင်းတောင်းထားပြီး ငွေရတဲ့အခါကျတော့ သူတို့ဘဲအကုန် ယူသွားတယ်”ဟု ဒေသခံက ဆက်ပြောသည်။
ဝေစားမျှစားလုပ်နေသူများမှာ ညောင်ရွှေမြို့နယ်မှူး ကျော်စွာလင်း၊ စံကားအင်းတန်းအုပ်စုမှ အုပ်ကြီးဦးအောင်မြ၊ လုံကန်အုပ်စုမှ အုပ်ကြီးဦးပညာဖြူ၊ လွယ်ခေါအုပ်စုမှ PNOတပ်ဖွဲ့ဝင် အုပ်ကြီး ခွန်ဇော်ဝင်းတို့ ဖြစ်ကြောင်း ဒေသခံများက ပြောသည်။
ယင်းရပ်ကျေးအုပ်ချုပ်ရေးမှူးများသည် စံကားဒေသတွင် ဒေသခံပြည်သူများထံ စစ်သားအတင်းအဓ္ဓစုဆောင်းခြင်းနှင့် ငွေကောက် ခြင်းတို့ ပြုလုပ်နေပြီး စစ်ကောင်စီနှင့် ပအိုဝ်းပြည်သူ့စစ် -PNO အကြိုက် လုပ်ဆောင်ပေးနေသူများဖြစ်ကြကြောင်းဒေသခံများထံမှသိရသည်။
#MeKongNews
#ညောင်ရွှေမြို့နယ်
#ပြောင်းခြံ
#စံကားဒေသ
#ထောက်ပံ့ကြေး
#အုပ်ချုပ်ရေးမှူး
