မဲခေါင်၊ ဖေဖော်ဝါရီ ၂
ပြီးခဲ့သည့် ဇန်နဝါရီ ၃၀ ရက်တွင် ကမ္ဘောဒီးယားဘက်က ပစ်ခတ်မှုများ ထိုင်းနိုင်ငံအတွင်းသို့ ကျရောက်ခဲ့သည့် ဖြစ်ရပ် ဖြစ်ပေါ်ခဲ့ပြီးနောက် ထိုင်း – ကမ္ဘောဒီးယား နယ်စပ်အရေးကို ဆွေးနွေးရန် လမ်းကြောင်းများ ရှိနေဆဲဖြစ်ကြောင်း ထိုင်းနိုင်ငံခြားရေးဝန်ကြီး သီဟာဆက်ဖွမ်ခက်ကောက ယနေ့ ပြောကြားသည်။
အပစ်အခတ်ရပ်စဲမှု တည်မြဲပြီး တင်းမာမှု အရှိန်မြင့်တက်ခြင်းများ မရှိစေရန် ထိုင်းနိုင်ငံက ကမ္ဘောဒီးယား နှင့်အတူ လုပ်ဆောင်နေသည်ဟု သီဟာဆက်က ပြောသည်။
သို့သော် တမင်တကာ ရန်စသလို ပစ်ခတ်မှုများ ရှိလာခဲ့ပါက ၎င်းတို့၏ အချုပ်အခြာကို ကာကွယ်သွားရန် ထိုင်းစစ်တပ်တွင် တာဝန်ရှိကြောင်း ၎င်းက ဆက်ပြောသည်။
နှစ်ဖက် ယုံကြည်မှု တည်ဆောက်ရေးမှာ ဦးစားပေးဖြစ်ပြီး ဒေသဆိုင်ရာအဆင့်၌ ဆွေးနွေးမှုများ လုပ်ဆောင်နေသည်ဟု ၎င်းက ဆိုသည်။
အချို့ဖြစ်ရပ်များမှာ နားလည်မှု လွဲမှားခြင်းများမှ ထွက်ပေါ်လာတတ်ကြောင်း သို့သော် စိုးရိမ်စရာ ဖြစ်ပေါ် မှုများကို ဆက်သွယ်ပြောဆိုမှု၊ အချက်အလက် စိစစ်မှုများဖြင့် ဖြေရှင်းရမည်ဟု ၎င်းက ဆက်ပြောကာ လက်ရှိ ယန္တရားများ အလုပ်ဖြစ်နေသည်ဟုလည်း ဆိုသည်။
မည်သို့ပင်ဆိုစေ မြေပြင်တွင်ဖြစ်စေ၊ ထုတ်ပြန်ချက်များတွင် ဖြစ်စေ ငြိစွန်းမှုများ၊ ရန်စမှုများ မရှိသော ရေရှည်တည်မြဲသည့် အပစ်ရပ်မှု လိုအပ်ကြောင်း သီဟာဆက်က အလေးပေး ပြောသည်။
ထိုင်းနိုင်ငံတွင် ရွေးကောက်ပွဲ ကျင်းပမည့် ဖေဖော်ဝါရီ ၈ ရက်အထိ မလိုလားအပ်သော ဖြစ်ရပ်များ မဖြစ်ပေါ် စေရန် အာမခံနိုင်ပါသလားဟု မေးမြန်းချိန်တွင်လည်း ထိုသို့ မဖြစ်ရေး သေချာရန်နှင့် အပစ်ရပ်မှုကို စစ်မှန်စွာ ထိန်းသိမ်းထားနိုင်ရန် ကမ္ဘောဒီးယားနှင့် ဆက်လက်၍ ထိတွေ့ဆက်ဆံမှုများ ရှိသည်ဟု ထိုင်းနိုင်ငံခြားရေးဝန်ကြီးက ပြောသည်။
တစ်ဖက်တွင်လည်း တပ်ဖွဲ့များနှင ့်လက်နက်များ ဖြည့်တင်းခြင်း၊ ကတုတ်ကျင်းတူးခြင်း သတင်းများ အပါအဝင် ကမ္ဘောဒီးယားဘက်ခြမ်းမှ လှုပ်ရှားမှုများကို ထိုင်းအာဏာပိုင်များက စောင့်ကြည့်နေသည်ဟု သီဟာဆက်က ပြောသည်။
ထိုင်းပိုင်နက်ကို ထိပါးလာခြင်း၊ သို့မဟုတ် တမင် ရည်ရွယ်ချက်ရှိရှိ လုပ်ဆောင်ခြင်းမျိုး ရှိလာခဲ့ပါက ထိုင်းဘက်ကလည်း လိုက်ဖက်စွာ တုံ့ပြန်သွားရလိမ့်မည်ဟု ၎င်းက ပြောသည်။
ထို့ပြင် ဝင်ရောက်စွက်ဖက်မှုဟု ရှုမြင်နိုင်သော မှတ်ချက်များကို သတိထားရန် ကမ္ဘောဒီးယားကို သတိပေးထားသည်ဟုလည်း သီဟာဆက်က ဆိုကာ ထိုင်းဘက်ကလည်း ၎င်းတို့ ထုတ်ပြန်ချက်များတွင် ထိုသို့ ပြောဆိုမှုများကို ရှောင်ရှားသည်ဟုလည်း ပြောသည်။
အေးကျော်
Ref: The Nation
#MeKongNews
#ကမ္ဘောဒီးယား
#ရန်စ
#ပစ်ခတ်
#ထိုင်းစစ်ဘက်
#တုံ့ပြန်
