မဲခေါင်၊ ဇန်နဝါရီ ၂၉
တောင်ပေါ်ဒေသများမှ မုန်ညင်းစိမ်း လာရောက်ရောင်းချသည့် တောင်သူများကို စုံစမ်းမေးမြန်းမှုအပေါ် အခြေခံပြီး စစ်ကောင်စီရဲချုပ်က ရှမ်းပြည်အတွင်း ဘိန်းဧက ၁၀၀၀ ကို ထပ်မံဖျက်ဆီးရန် အမိန့်ထုတ်ခဲ့ကြောင်း မူးယစ်တပ်ဖွဲ့နှင့် နီးစပ်သူများထံမှ သိရသည်။
စစ်ကောင်စီရဲချုပ် ဒုရဲဗိုလ်ချုပ်ကြီး ဝင်းဇော်မိုးသည် ပြီးခဲ့သည့် ဇန်နဝါရီ ၂၀ ရက်ဝန်းကျင်က နမ့်စန်မြို့သို့ ရောက်ရှိစဉ် တောင်ပေါ်မုန်ညင်းပင်များ လာရောက်ရောင်းချသည့် တောင်သူများကို မေးမြန်းရာမှတစ်ဆင့် ဘိန်းခင်းများအကြောင်း သိရှိသွားခြင်း ဖြစ်ကြောင်း ရဲတပ်ဖွဲ့နှင့် နီးစပ်သူတစ်ဦးက ပြောသည်။
“ဘိန်းခင်းတွေထဲမှာ မုန်ညင်းစိမ်းတွေ ထည့်စိုက်ကြတာ။ အပင်လည်းထွား၊ အရသာလည်း ပိုရှိတော့ အရောင်းအဝယ် သွက်တယ်။ အဲဒါကို ရဲချုပ်က မုန်ညင်းတွေ ဘယ်လိုစိုက်လဲ မေးရင်းနဲ့ တောင်သူတွေက ဘိန်းခင်းတွေ အများအပြားရှိကြောင်း ပြောပြမိလို့ စစ်ဆေးပြီး ထပ်ဖျက်ခိုင်းတာ” ဟု ၎င်းက မဲခေါင်သို့ ပြောသည်။
ထပ်မံဖျက်ဆီးရမည့် နေရာများမှာ ရှမ်းပြည်တောင်ပိုင်း နမ့်စန်ခရိုင်တွင် ဧက ၅၀၀ နှင့် ရှမ်းပြည်အရှေ့ပိုင်းရှိ တာချီလိတ်၊ မိုင်းတုံ၊ မိုင်းဆတ်ခရိုင်များတွင် ဧက ၅၀၀ တို့ ဖြစ်ကြောင်း သိရသည်။ သို့သော် လက်ရှိတွင် ဘိန်းခင်းအားလုံးနီးပါး အစေးထုတ်ပြီးချိန် ဖြစ်နေသဖြင့် ဘိန်းစိုက်ရာသီ ကုန်ဆုံးခါနီးမှ စီမံချက်ဖြင့် ဖျက်ဆီးခိုင်းခြင်းအပေါ် ဝေဖန်မှုများရှိနေသည်။
“အားလုံး ရှုပ်နေကြပြီ။ အခုက ဘိန်းခင်းအားလုံးလိုလို အစေးထုတ်ပြီးကြပြီ။ ဘိန်းစိုက်ရာသီလည်း ကုန်သလောက်ဖြစ်တော့ မခြစ်ရသေးတဲ့အခင်း နည်းနည်းလောက်ပဲ ကျန်တော့မယ်။ အခုက စစ်ကြောင်းလိုက် စီမံချက်နဲ့ ဖျက်ရတော့မယ်” ဟု ရဲတပ်ဖွဲ့နှင့် နီးစပ်သူက ဆိုသည်။
ပုံမှန်အားဖြင့် ဧက ၁၀၀ ဝန်းကျင်သာ ဖျက်ဆီးလေ့ရှိရာမှ ယခုအခါ ဧက ၁၀၀၀ အထိ တိုးမြှင့်ဖျက်ဆီးရန် အမိန့်ထုတ်ခဲ့ခြင်း ဖြစ်သည်။
မူးယစ်တပ်ဖွဲ့ဝင်ဟောင်းတစ်ဦးကမူ “နမ့်စန်တင် မဟုတ်ပါဘူး၊ ပအိုဝ်းဒေသတစ်ခုလုံးနဲ့ လွိုင်လင်ခရိုင်မှာ ဧက သိန်းချီရှိတာပါ။ ရဲချုပ်ဟောင်း ဦးခင်ရီလက်ထက်က ရာသီအစမှာ ထုနဲ့ထည်နဲ့ ဖျက်လို့ တောင်သူတွေ အထိနာပြီး သတ်သေတဲ့အထိ ဖြစ်ခဲ့ဖူးတယ်။ အခုကတော့ အစေးခြစ်ပြီးမှဆိုတော့ တောင်သူတွေ အထိနည်းပါလိမ့်မယ်။ UNODC က ဂြိုဟ်တုပုံတွေနဲ့ အနီးကပ်ထောက်ပြနေတော့ ရှောင်လို့မရလို့ လုပ်ပြရတဲ့ သဘောပါ” ဟု သုံးသပ်သည်။
မြန်မာနိုင်ငံသည် ၂၀၂၃ ခုနှစ်မှစတင်ကာ အာဖဂန်နစ္စတန်နိုင်ငံကို ကျော်ဖြတ်ပြီး ကမ္ဘာပေါ်တွင် ဘိန်းစိုက်ပျိုးထုတ်လုပ်မှု အများဆုံးနိုင်ငံ ဖြစ်လာခဲ့သည်။
၂၀၂၅ ခုနှစ် ဘိန်းစိုက်ရာသီတွင်လည်း တစ်ကမ္ဘာလုံး ဘိန်းထုတ်လုပ်မှု၏ ၈၈ ရာခိုင်နှုန်းဖြင့် အများဆုံးနိုင်ငံအဖြစ် ဆက်လက်ရပ်တည်နေကြောင်း ကုလသမဂ္ဂ မူးယစ်ဆေးဝါးနှင့် ရာဇဝတ်မှုဆိုင်ရာရုံး (UNODC) က ထုတ်ပြန်ထားသည်။
#MeKongNews
#ဘိန်းစိုက်ရာသီ
#ရဲချုပ်
#ဘိန်းခင်း
#ရှမ်းပြည်
