မဲခေါင်၊ ဇန်နဝါရီ ၂၈
အနည်းဆုံး လူ ၄ ဦး သေဆုံးခဲ့သည်ဟု ဒေသခံအရာရှိများက ပြောကြားသည့် ခရီးသည်တင် ရထားတစ်စီးအား ရုရှားက ဒရုန်းများဖြင့် တိုက်ခိုက်ခြင်းကို အကြမ်းဖက်မှုအဖြစ် ယူကရိန်းသမ္မတ ဗိုလိုဒီမာဇီလန်စကီးက ရှုတ်ချ ပြောဆိုလိုက်သည်။
ယူကရိန်းနိုင်ငံ အရှေ့မြောက်ပိုင်း ကာကိဗ်ဒေသတွင် ယမန်နေ့က လူပေါင်း ၂၀၀ ကျော် လိုက်ပါခဲ့သောရထား တိုက်ခိုက်ခံရပြီးနောက် အခြားလူ ၄ ဦးလည်း ပျောက်ဆုံးနေသည်ဟု ဇီလန်စကီးက ပြောကြားသည်။
အရပ်သား ရထားတစ်စီးအား ဒရုန်းဖြင့် တိုက်ခိုက်ခြင်းအား မည်သည့်နိုင်ငံတွင်မဆို အကြမ်းဖက်မှုအဖြစ် တူညီစွာ သဘောထားကြမည် ဖြစ်ကြောင်း ၎င်းက လူမှုကွန်ရက်ပို့စ်တွင် ရေးသားခဲ့သည်။
အရပ်သားများကို ပစ်မှတ်ထားခြင်းဖြင့် စစ်ရေးအရ တရားမျှတမှုရှိသည်ဟု မဆိုနိုင်ကြောင်းလည်း ယူကရိန်းသမ္မတက ဆက်ပြောသည်။
ယူကရိန်းအရေးပေါ် ဝန်ဆောင်မှုများဌာနက ထုတ်ပြန်ခဲ့သော ဓာတ်ပုံများနှင့် ဗီဒီယိုများတွင် ရုရှား ဒရုန်းတိုက် ခိုက်မှု ဖြစ်ပြီးနောက် ဆိုးရွားစွာ ပျက်စီးနေသော ရထားတွဲ မီးလောင်နေသည်ကို မြင်တွေ့ရသည်။
တိုက်ခိုက်ရေး ဒရုန်းတစ်စင်းက ရထားကို တိုက်ရိုက်ထိမှန်ခဲ့ပြီး အခြားနှစ်စင်းက ရထားတွဲအနီး ပေါက်ကွဲခဲ့ကြောင်း ကာကိဗ်ဒေသ အစိုးရရှေ့နေများရုံးက ပြောသည်။
ရထားသည် အနောက်ဘက်နယ်စပ် ချော့ပ်မြို့မှ ဒေသမြို့တော် ကာကိဗ်ကို ဖြတ်သန်း၍ ဘာဗီကိုဗီဒေသသို့ ပြေးဆွဲသည့် ရထားဖြစ်သည်။
သီးခြားဖြစ်ရပ်တွင် အိုဒက်ဆာဆိပ်ကမ်းဒေသမှ စွမ်းအင်နှင့် အရပ်သားအခြေခံ အဆောက်အအုံများကို ပစ်မှတ်ထား၍ ရုရှားက ဒရုန်း အစင်း ၅၀ ကျော်ဖြင့် တိုက်ခိုက်ခဲ့ကြောင်း အိုဒက်ဆာမှ တာဝန်ရှိသူများက ပြောသည်။
တိုက်ခိုက်မှုကြောင့် လူ ၃ ဦးသေဆုံးခဲ့ကာ ၂၅ ဦး ဒဏ်ရာရရှိခဲ့သည်ဟု ၎င်းမြို့မှ စစ်ဘက်အကြီးအကဲ ဆာဟီလိုင်ဆက်က ဆိုသည်။
တိုက်ခိုက်မှုအတွင်း အရပ်ဘက် အဆောက်အအုံတစ်ခု အထပ်များစွာ ပြိုကျခဲ့ကာ အခြား အဆောက်အဦးများလည်း ပျက်စီးခဲ့သည်။
ယင်းသတင်းများနှင့်ပတ်သက်၍ ရုရှားက မှတ်ချက်မပေးပေ။
သို့သော် ရုရှားသည် မကြာသေးမီလများတွင် နှစ်ပေါင်းများစွာအတွင်း အကြမ်းတမ်းဆုံး ဆောင်းရာသီကို ရင်ဆိုင်နေရသည့် ယူကရိန်း၏ စွမ်းအင်နှင့် သယ်ယူပို့ဆောင်ရေးလုပ်ငန်း အခြေခံအဆောက်အအုံများကို ပစ်မှတ်ထား၍ ဒုံးကျည်များ၊ ဒရုန်းများဖြင့် တိုက်ခိုက်မှုများကို တိုးမြှင့် လုပ်ဆောင်ခဲ့သည်။
ရုရှား၏ တိုက်ခိုက်မှုများ ဖြစ်ပေါ်ခဲ့ပြီးနောက် သန်းပေါင်းများစွာသော ယူကရိန်းနိုင်ငံသားများသည် လျှပ်စစ်မီး၊ အပူပေးစနစ်နှင့် ရေပြတ်တောက်မှုများနှင့် ရင်ဆိုင်နေကြရသည်။
အေးကျော်
Ref: BBC
#MeKongNews
#ခရီးသည်တင်ရထား
#ရုရှား
#ဒရုန်းတိုက်ခိုက်
#ဇီလန်စကီး
