မဲခေါင်၊ ဇန်နဝါရီ ၂၈
ကရင်နီအမျိုးသား တိုးတက်ရေးပါတီ – KNPP က ဗဟိုကော်မတီအား ပြန်လည်ရွေးချယ် တင်မြှောက်ရာတွင် လူငယ်နှင့် အမျိုးသမီးများ ပိုမိုပါဝင်လာကြောင်း ယနေ့တွင် သတင်းထုတ်ပြန်သည်။
KNPP ၏(၁၅) ကြိမ်မြောက် ပါတီကွန်ဂရက်ကို ကရင်နီပြည်၊ ဆိုတရှားမြို့နယ်၊ တလဲဒူဆိုတွင် ဇန်နဝါရီ ၁၉ ရက်မှ ၂၄ ရက်အထိ ကျင်းပခဲ့ခြင်းဖြစ်ပြီး ပါတီဗဟိုကော်မတီဝင် ၃၀ ဦးကို ရွေးချယ် တင်မြှောက်ခဲ့ ကြသည်။
ယခု ရွေးချယ်သည့် ပါတီဗဟိုကော်မတီတွင် အမျိုးသမီး ၈ ဦးနှင့် အသက် ၃၅ နှစ်အောက်လူငယ် ၅ ဦး ပါဝင်လာသဖြင့် ယခင်ထက် လူငယ်နှင့် အမျိုးသမီးများ ပိုမိုပါဝင်လာခြင်း ဖြစ်သည်ဟု KNPP ထုတ်ပြန်ချက်တွင်ဖော်ပြသည်။
ယခုအကြိမ် ရွေးချယ်ခံရသူများတွင် ဗဟိုကော်မတီဝင် ဥက္ကဌအဖြစ် ခူဦးရယ်၊ ဒုဥက္ကဌအဖြစ် ခူးထဲဘူး၊ အထွေထွေအတွင်းရေးမှူးအဖြစ် ဦးအောင်ဆန်းမြင့်တို့က တာဝန်ယူမည် ဖြစ်ကြောင်း သိရသည်။
KNPP အနေဖြင့် အာဏာရှင်စနစ် ချုပ်ငြိမ်းရေးနှင့် ပြည်နယ်ဖက်ဒရယ်ယူနစ် အားကောင်းရေးမှ ပြည်ထောင်စု အားကောင်းရေး ချဉ်းကပ်မှုဖြင့် တော်လှန်ရေး၏ ပန်းတိုင်ဖြစ်သည့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးတွင် မဟာမိတ် တော်လှန်ရေးအင်အားစုများနှင့်အတူ ပူးပေါင်း ဆောင်ရွက်သွားမည်ဟု ထုတ်ပြန်ချက်တွင် ဖော်ပြသည်။
KNPP သည် ကရင်နီတပ်မတော် – KA ၏ နိုင်ငံရေး ဦးဆောင်အဖွဲ့ ဖြစ်ပြီး စစ်အာဏာရှင်စနစ်အား ခေတ်အဆက်ဆက် လက်နက်ကိုင် တော်လှန်ခဲ့သည်။
#MeKongNews
#KNPP
#ဗဟိုကော်မတီ
#လူငယ်
#အမျိုးသမီး
#ပိုမိုပါဝင်
