မဲခေါင်၊ ဇန်နဝါရီ ၂၇
ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ စံကားမြို့ပေါ်တွင် ပအိုဝ်းပြည်သူ့စစ် – PNO ခန့်အပ်သော အုပ်ချုပ်ရေးမှူး ဦးစန်းထွန်းက ရပ်ကွက်အတွင်း လောင်းကစားဝိုင်းများဖွင့်ထားပြီး လာကစားသူများကို ကိုယ်တိုင် ပြန်ဖမ်းကာ ကျပ်သိန်း ၃၀ ဖြင့် ပြန်ရွေးခိုင်းခဲ့ကြောင့် ဒေသခံများထံမှ သိရသည်။
ယခုလတွင်ပင် ငွေညှစ်ခံရသူ ၈ ဦးရှိပြီး ငွေမပေးလျှင် ရဲလက်အပ်မည်ဟု ဦးစန်းထွန်းက အမျိုးမျိုး ခြိမ်းခြောက်နေကြောင်း ဒေသခံများက ပြောသည်။
“လောင်းကစားဝိုင်းက သူပဲဖွင၊့် သူက PNO နဲ့ ပေါင်းပြီး ပြန်ဖမ်းခိုင်းတာ၊ ဖမ်းပြီးရင်လည်း အမျိုးမျိုး ခြိမ်းခြောက်တယ်။ ဒီအမှုက ငါအထက်ကို တင်ပြလိုက်ရင် ထောင် ၃ နှစ်မှ ၅ နှစ်ကျမယ်ဆိုပြီး ပြောတယ်။ ငွေပေးမယ်ဆိုရင် ဒီမှာပဲပြီးမယ်ဆိုပြီး တစ်ဦးကို ငွေသိန်း ၃၀ ထိ ဒဏ်ရိုက် ငွေညှစ်တယ်” ဟု ဒေသခံတစ်ဦးက မဲခေါင်သို့ ပြောသည်။
ယင်းကိစ္စနှင့် ပတ်သက်၍ အပြင်သို့ ပေါက်ကြားပြီး လိုင်းပေါ်တင်ပါက ယခု ဒဏ်ငွေထက် ၁၀ ဆ ထပ်တောင်းမည်ဟုလည်း ဦးစန်းထွန်းက အဖမ်းခံရသူများကို ခြိမ်းခြောက်ထားကြောင်း ၎င်းက ဆက်ပြောသည်။
၎င်းသည် စစ်ကောင်စီတပ်၊ PNO တို့နှင့် ပေါင်းပြီး စံကားဒေသရှိ ဒေသခံများကို ဖမ်းဆီးငွေညှစ်ခြင်း၊ လောင်းကစားဝိုင်းများ ဖွင့်လှစ်ခြင်းနှင့် ဒေသခံများကို အနိုင်ကျင့်ခြင်းများ ပြုလုပ်လျက်ရှိကြောင်း ဒေသခံများက ဆိုသည်။
စံကားဒေသသည် ပင်လောင်း – ဖယ်ခုံ – ညောင်ရွှေ အစပ်တွင်ရှိပြီး စစ်ကောင်စီတပ်၊ PNO တပ်နှင့် တော်လှန်ရေးတပ်တို့အကြား တိုက်ပွဲ မကြာခဏ ဖြစ်ပွားသော ဒေသလည်း ဖြစ်သည်။
#MeKongNews
#လောင်းကစားဝိုင်း
#PNO
#အုပ်ချုပ်ရေးမှူး
#အုပ်ချုပ်ရေးမှူး
#ပြန်ဖမ်း
