မဲခေါင်၊ ဇန်နဝါရီ ၂၄
ရှမ်းပြည်အရှေ့ပိုင်း၊ တာချီလိတ်မြို့တွင် ဇန်နဝါရီလ တတိယပတ်အတွင်း ပြန်ပေးဆွဲမှု နှစ်ခု ဆက်တိုက် ဖြစ်ပွားခဲ့ပြီး ယနေ့အချိန်ထိ တရားခံများကို ဖမ်းဆီးနိုင်ခြင်း မရှိသေးကြောင်း မဲခေါင်သတင်းဌာနက စုံစမ်းသိရှိရသည်။
ယနေ့ ဇန်နဝါရီ ၂၄ ရက် နံနက်ပိုင်းတွင် ဆန်ဆိုင်း (က) ရပ်ကွက်၊ မြို့ပတ်လမ်းရှိ ရွှေသဲ အိမ်ဆောက်ပစ္စည်းဆိုင်အနီး၌ အသက် ၄၀ ဝန်းကျင် အမျိုးသမီးတစ်ဦး ပြန်ပေးဆွဲခံခဲ့ရသည်။
တာဝန်ရှိသူများက လိုက်လံစုံစမ်းနေသော်လည်း ညနေပိုင်းအထိ ပြန်ပေးဆွဲသူများကို ဖမ်းဆီးရမိခြင်း မရှိသေးကြောင်း သိရသည်။
“မနက်က မျက်နှာဖုံးစွတ်ထားတဲ့သူတွေက ကားပေါ်ဆွဲတင်ပြီး ခေါ်သွားတာလို့ ကြားရတယ်။ ရဲတွေ တစ်မြို့လုံး ပိတ်ဆို့ရှာဖွေနေတယ်လို့လည်း ကြားတယ်။ လွန်ခဲ့တဲ့ တစ်ပတ်ကလည်း 1G1 ဟိုတယ်နား တိုးနယားကွင်းထဲမှာ အမျိုးသားတစ်ဦး ပြန်ပေးဆွဲခံရသေးတယ်။ ကျားဖြန့်တရုတ်တွေ မြို့ထဲဝင်လာရင် အခုလို ပြန်ပေးဆွဲတာမျိုးတွေ ပြန်ကြားလာရတယ်။ အခုလည်း မြို့ထဲမှာ ကျားဖြန့်တွေ ပြန်လုပ်နေကြတယ်လို့ ကြားနေရတယ်” ဟု တာချီလိတ်ဒေသခံတစ်ဦးက ပြောသည်။
ပြီးခဲ့သည့် ဇန်နဝါရီ ၁၆ ရက်၊ မွန်းလွဲ ၁၂ နာရီဝန်းကျင်ကလည်း ဆန်ဆိုင်း (ခ) ရပ်ကွက်၊ တိုးနယားအပိုင်း၊ အိမ်အမှတ် ၁၀/၁၀၉ နေထိုင်သူ ဦးစိုင်းဟန်လင်းကို အမျိုးသား ၄ ဦးက ကားပေါ်ဆွဲတင်၍ ပြန်ပေးဆွဲ ခေါ်ဆောင်သွားခဲ့ကြောင်း သိရသည်။
တာချီလိတ်မြို့တွင် ၂၀၂၃ ခုနှစ်အတွင်းကလည်း ပြန်ပေးဆွဲမှု အကြိမ်ကြိမ် ဖြစ်ပွားခဲ့သည်။
ဈေးဆိုင်အတွင်း လက်နက်ကိုင်ဆောင် ဝင်ရောက်ဖမ်းဆီးခြင်း၊ အာခါဈေးလမ်းမပေါ်တွင် လုံခြုံရေးတပ်ဖွဲ့ဝင်အယောင်ဆောင်၍ ကားရပ်တန့်ကာ ပြန်ပေးဆွဲခြင်းနှင့် နေအိမ်အတွင်း ဝင်ရောက်ဖမ်းဆီးခြင်း စသည့် ဖြစ်စဉ်များ ရှိခဲ့သည်။
ယင်းဖြစ်စဉ်များတွင် ပြန်ပေးငွေတောင်းယူ၍ ပြန်လွှတ်ပေးခဲ့မှုများ ရှိသလို၊ သတ်ဖြတ်ပစ်ခဲ့သည့် ဖြစ်စဉ်များလည်း ရှိခဲ့ကြောင်း စုံစမ်းသိရှိရသည်။
ယခင်ဖြစ်ပွားခဲ့သည့် ပြန်ပေးဆွဲမှုများမှာ ကျားဖြန့် (အွန်လိုင်းငွေလိမ်) ဂိုဏ်းများနှင့် ပတ်သက်သည့် တရုတ်နှင့် ထိုင်ဝမ်နိုင်ငံသားများက ဦးဆောင်ကာ ဒေသခံအချို့နှင့် ပူးပေါင်း၍ ပြန်ပေးဆွဲမည့်သူကို စနစ်တကျ လေ့လာစောင့်ကြည့်ပြီးမှ ကျူးလွန်ခဲ့ကြခြင်းဖြစ်ကြောင်း သိရသည်။
#MeKongNews
#တာချီလိတ်
#ရှမ်းအရှေ့
#ပြန်ပေးဆွဲ
#တရုတ်
