မဲခေါင်၊ ဇန်နဝါရီ ၂၃
အာတိတ်ဒေသအား ရုရှားနှင့် တရုတ်တို့ထံမှ နေတိုးအဖွဲ့က မည်သို့ အကောင်းဆုံး ကာကွယ်သွားမည်ကို ၎င်းနှင့် သမ္မတထရမ့်တို့ ဒါးဗို့စ်မြို့တွင် ဆွေးနွေးခဲ့ကြသည်ဟု နေတိုးအဖွဲ့အတွင်းရေးမှူးချုပ် မာ့ခ်ရုတေး က ယမန်နေ့တွင် ပြောကြားသည်။
ဂရင်းလန်းသာမဟုတ်ဘဲ အာတိတ်ဒေသတွင် မြေပိုင်ဆိုင်မှုရှိသော နေတိုး ၇ နိုင်ငံ အတွက်ပါ အာတိတ်လုံခြုံရေး သေချာစေရန် နေတိုးအဖွဲ့ဝင် နိုင်ငံများက မည်သို့ စုပေါင်း လုပ်ဆောင်ကြမည်ကို ထရမ့်နှင့် အလွန်ကောင်းမွန်သော ဆွေးနွေးမှု ရှိခဲ့သည်ဟု ရုတေးက ပြောသည်။
ပြီးခဲ့သည့် သီတင်းပတ်က အမေရိကန်နှင့် ဒိန်းမတ်၊ ဂရင်းလန်း ကိုယ်စားလှယ်များ ဝါရှင်တန်တွင် ပြုလုပ်ခဲ့သော ဆွေးနွေးမှုများကို ဆက်လက် တည်ဆောက်၍ ဆွေးနွေးမှုများ ထပ်မံ လုပ်ဆောင်သွားမည်ဟုလည်း ၎င်းက ဆိုသည်။
“မနေ့က ထွက်ပေါ်လာတဲ့ လုပ်ငန်းတစ်ခုကတော့ အထူးသဖြင့် ဂရင်းလန်းနဲ့ ပတ်သက်လာရင် တရုတ်နဲ့ ရုရှားတို့ကို စီးပွားရေးအရ၊ စစ်ရေးအရ ဂရင်းလန်းမှာ လက်လှမ်းခွင့် မပေးဖို့ သေချာအောင် လုပ်ဆောင်ရေး ဖြစ်ပါတယ်” ဟု ဒါးဗို့စ် ကမ္ဘာ့စီးပွားရေးဖိုရမ်မှ ဆွေးနွေးပွဲတွင် ၎င်းက ပြောသည်။
အမျိုးသားလုံခြုံရေးကို အကြောင်းပြ၍ ဂရင်းလန်းကို ထိန်းချုပ်လိုကြောင်း ဒေါ်နယ်ထရမ့်က အကြိမ်ကြိမ် ပြောကြားခဲ့သည်။
သို့သော် ဗုဒ္ဓဟူးနေ့က ရုတေးနှင့် ဆွေးနွေးပြီးနောက်တွင် အင်အားသုံးမည့်ကိစ္စကို ထရမ့်က လက်ရှောင်လိုက်ကာ ဒိန်းမတ်နယ်မြေနှင့် ပတ်သက်၍ အငြင်းပွားမှု အဆုံးသတ်ရန် သဘောတူညီချက် မြင်နေရပြီဟု ပြောသည်။
ယင်းမတိုင်မီ ထရမ့်၏ ဂရင်းလန်း ရည်မှန်းချက်များမှာ နေတိုးမဟာမိတ်အဖွဲ့အပေါ် အကြီးအကျယ် ဝန်ပိစေခဲ့သည်။
အာတိတ်ဒေသမှ ၎င်းတို့၏ သိပ္ပံပညာဆိုင်ရာ လေ့လာရေး ခရီးစဉ်များနှင့် ရေကြောင်း သွားလာမူများသည် နိုင်ငံတကာဥပဒေများ၊ သဘောတူညီချက်များကို လိုက်နာခဲ့သည်ဟု တရုတ်က အကြိမ်ကြိမ် ပြောကြားပြီး အချက်အလက်များကို အနောက်တိုင်းက လိုသလို ဆွဲယူပြီး ၎င်းတို့၏ လှုပ်ရှားမှုများကိုလည်း စစ်ရေးရည်မှန်းချက် လက္ခဏာများအဖြစ် ဘေးတီးပေးနေသည်ဟု စွပ်စွဲပြောကြားသည်။
အမေရိကန်နှင ့်ဥရောပက အာတိတ်ရေးရာ၌ တရုတ်နိုင်ငံအား စစ်ရေး ခြိမ်းခြောက်မှုတစ်ခု၊ အရင်းအမြစ် ရယူသူ၊ ဥပဒေချိုးဖောက်သူ ဟူသော အသုံးအနှုန်းများဖြင့် တံဆိပ်ကပ်နေခြင်းကို မိမိတို့က အခိုင်အမာ ဆန့်ကျင်သည်ဟု တရုတ်အစိုးရ ထောက်ခံသော ဂလိုဘယ်တိုင်းမ်စ်သတင်းစာက ပြီးခဲ့သည့် သီတင်းပတ် ခေါင်းကြီးပိုင်းတွင် ရေးသားခဲ့သည်။
ပြီးခဲ့သည့်နှစ် အောက်တိုဘာလက တရုတ် ကွန်တိန်နာ သင်္ဘောတစ်စီး အာတိတ်ဒေသမှ ပထမဆုံးအကြိမ် ဖြတ်သန်း၍ ဥရောပသို့ ကုန်သွယ်ရေကြောင်း လမ်းဖောက်ခဲ့ပြီး ပုံမှန်ထက် အချိန် ထက်ဝက်လျှော့ချနိုင်ခဲ့သည်။
၂၀၂၄ ခုနှစ်၊ ဇူလိုင်လက တရုတ်နှင့် ရုရှားပူးတွဲကင်းလှည့်မှုအတွင်း နျူကလီးယားလက်နက် သယ်ဆောင် နိုင်သော မဟာဗျူဟာမြောက် ဗုံးကြဲလေယာဉ်များ အာတိတ်နှင့် မြောက်ပစိဖိတ်တွင် အမေရိကန်၏ အလာစကာပြည်နယ် အနီးမှ ပျံသန်းသွားခဲ့ပြီးနောက် အမေရိကန်နှင့် ကနေဒါက တိုက်လေယာဉ်များ စေလွှတ်ခဲ့ရသည်။
အေးကျော်
Ref:Reuters
#MeKongNews
#အာတိတ်ဒေသ
#ရုရှား
#တရုတ်
#ဒေါ်နယ်ထရမ့်
#နေတိုး အတွင်းရေးမှူးချုပ်
