မဲခေါင်၊ ဇန်နဝါရီ ၂၁
နေတိုးအဖွဲ့၏ အရေးပါသော ကွပ်ကဲရေးစင်တာများတွင် ခန်အပ်ထားသော အမေရိကန် အရာရှိဦးရေ ၂၀၀ ခန့် လျှော့ချရန် အမေရိကန်က စီစဉ်နေကြောင်းနှင့် ယင်းလုပ်ရပ်သည် မဟာမိတ်အဖွဲ့အပေါ် အမေရိကန်၏ ကတိကဝတ်နှင့် ပတ်သက်၍ စိုးရိမ်မှုများကို မြင့်တက်လာစေခဲ့သည်ဟု အခြေအနေနှင့် နီးစပ်သည့် သတင်းရင်းမြစ် ၃ ဦးက ရိုက်တာသတင်းဌာနကို ပြောကြားသည်။
အမေရိကန်၏ မူဝါဒသစ်ကြောင့် ထိခိုက်မည့် နေတိုး အဖွဲ့အစည်းများတွင် အမေရိကန်အရာရှိ ၄၀၀ ခန့် ကို ခန့်အပ်ထားသည်ဟု သတင်းရင်းမြစ်တစ်ဦးက ပြောကြားခဲ့သဖြင့် အမေရိကန် လျှော့ချမည့် ဦးရေမှာ စုစုပေါင်း၏ ထက်ဝက်ခန့်ဖြစ်ကြောင်း သိရသည်။
လက်ရှိ တာဝန်ထမ်းဆောင် နေသူများအား ပြန်လည် ခေါ်ယူခြင်းထက် အရာရှိများ ရာထူးတက်သွားချိန်၌ အစားထိုးခန့်အပ်ရန် ငြင်းဆန်ခြင်းဖြင့် အမေရိကန်က နေတိုး အဖွဲ့အစည်းများမှ လူများကို လျှော့ချခြင်းဖြစ်ကြောင်း သတင်းရင်းမြစ်များက ပြောသည်။
စစ်ရေးနှင့် ထောက်လှမ်းရေး လုပ်ငန်းများကို စီစဉ် ကြီးကြပ်သော နေတိုး အဖွဲ့အစည်းများတွင် ခန့်အပ်ထားသော အမေရိကန် အရာရှိများအား အစားထိုးမပေးတော့မည့် အကြောင်းကို ထရမ့်အစိုးရက ဥရောပ အစိုးရအချို့အား ဆက်သွယ် ပြောကြားထားသည်ဟု သံတမန်အတွင်းရေး ကိစ္စများဖြစ်၍ အမည်မဖော်လိုသော သတင်းရင်းမြစ် များက ပြောကြားသည်။
နေတိုးမဟာမိတ်အဖွဲ့၏ ၇၇ နှစ် သက်တမ်းတွင် သံတမန်ရေးအရ အတင်းမာဆုံး အခိုက်အတန့်များ ကြုံနေရချိန်တွင် အမေရိကန်ဘက်မှ လူလျှော့ခြင်းများ လုပ်ဆောင်လာခြင်း ဖြစ်သည်။
အမေရိကန်၏ လုပ်ရပ်ကြောင့် ထိခိုက်မည့် နေတိုး အဖွဲ့အစည်းများတွင် ဗြိတိန်အခြေစိုက် နေတိုး ထောက်လှမ်းရေးစင်တာ၊ ဘရပ်ဆဲလ်မြို့မှ မဟာမိတ် အထူးစစ်ဆင်ရေးတပ်ဖွဲ့များ ကွပ်ကဲရေးဌာန၊ ပေါ်တူဂီ အခြေစိုက်ပြီး ရေကြောင်း စစ်ဆင်ရေးများ ကြီးကြပ်သည့် STRIKFORNATO နှင့်အတူ အခြားအဖွဲ့များလည်း ပါဝင်ကြောင်း သိရသည်။
နေတိုးအဖွဲ့အစည်းများတွင် ခန့်အပ်ထားသော ဝန်ထမ်းဦးရေကို လျှော့ချရန် အမေရိကန်အစိုးရက မည်သည့် အကြောင်းကြောင့် ဆုံးဖြတ်လိုက်သည်ကို သတင်းရင်းမြစ်များက မပြောသော်လည်း ယင်းလုပ်ရပ်မှာ ကမ္ဘာ့အနောက်ခြမ်းသို့ အရင်းအမြစ်များ ပိုမိုပြောင်းရွှေ့ရေး ထရမ့်အစိုးရ၏ ရည်ရွယ်ချက်နှင့် ကိုက်ညီသည်ဟု သတင်းက ဆိုသည်။
ယင်းသတင်းကို ဝါရှင်တန်ပို့စ်သတင်းစာက ဦးစွာဖော်ပြခဲ့သည်။
အေးကျော်
Ref:Reuters
#MeKongNews
#နေတိုးအဖွဲ့
#အမေရိကန်
#အရာရှိ
#လျှော့ချ
