မဲခေါင်၊ ဇန်နဝါရီ ၂၀
စစ်ကောင်စီက ဒရုန်းဖြင့် ဗုံးကြဲတိုက်ခိုက်သဖြင့် ယမန်နှစ်အတွင်း ကရင်နီပြည်သူ ၁၀ ဦး သေဆုံးပြီး ၃၂ ဦး ထိခိုက်ဒဏ်ရာ ရရှိခဲ့သည်ဟု ကရင်နီ လူ့အခွင့်အရေးအဖွဲ့ – KnHRG က သတင်း ထုတ်ပြန်သည်။
စစ်ကောင်စီတပ်က ကရင်နီ ပြည်သူလူထုအား တနှစ်အတွင်း ဒရုန်းဖြင့် ၂၁ ကြိမ် ဗုံးကြဲတိုက်ခိုက်ရာမှ ထိခိုက်၊ သေဆုံးခဲ့မှုများကို KnHRG က မှတ်တမ်းပြုစုထားခြင်း ဖြစ်သည်။
ယင်းသေဆုံးခဲ့ရသည့် ကရင်နီ ပြည်သူများတွင် ကလေးတစ်ဦး၊ အမျိုးသား ၆ ဦး၊ အမျိုးသမီး၂ ဦး၊ ကျား/မ မသိသူတစ်ဦးတို့ ပါဝင်သည်။
ထို့ပြင် ဒဏ်ရာရ ပြည်သူများတွင် ကလေး ၇ ဦး၊ အမျိုးသား ၁၀ ဦး၊ အမျိုးသမီး ၉ ဦး၊ ကျား/မ မသိသူ ၆ ဦးဖြင့် စုစုပေါင်း ၃၂ ဦးပါဝင်သည်ဟု KnHRG ၏ အစီရင်ခံစာတွင် ဖော်ပြထားသည်။
ထို့သို့ စစ်ကောင်စီက ဒရုန်းဖြင့် ဗုံးကြဲခြင်းကြောင့် ကရင်နီ ပြည်သူများ၏ နေအိမ် ၇ လုံး၊ ဘာသာရေး အဆောက် အဦ ၂ လုံး၊ အများပိုင် အဆောက်အဦးတစ်လုံး၊ ယာဉ် ၁၀ စီး၊ လယ်ကွင်း ၃ ကွင်း၊ တိရစ္ဆာန် ၂ ကောင်လည်း ထိခိုက်ဆုံးရှုံးခဲ့သည်။
“ဒါတွေက အဖွဲ့အစည်းတွေ စာရင်းကောက်ယူလို့ ရတာပဲ ရှိသေးတာ မြေပြင်မှာ ဒီထက်ပိုဖို့ပဲ ရှိတယ်။ အခုက မြေပြင်မှာ တစ်ဖွဲ့နဲ့တစ်ဖွဲ့ ပစ်တာမျိုး မဟုတ်တော့ဘူး စကစက မဲမဲမြင်ရာ ဗုံးလိုက်ကြဲတယ်။ ရွာမြင်တိုင်း လက်နက်ကြီးနဲ့ ပစ်တယ်လေ။ သက်ရှိမှန်သမျှ သူတို့ရန်သူလို့ သတ်မှတ်ထားသလိုမျိုးပဲ” ဟု ရှမ်း – ကရင်နီနယ်စပ်ရှိ ကရင်နီ သတင်းရင်းမြစ်တစ်ဦးက ပြောသည်။
စစ်ကောင်စီသည် ၂၀၂၅ ခုနှစ် ဇွန်လနောက်ပိုင်းတွင် ပြည်သူလူထုရှိရာသို့ ဒရုန်းဗုံးကြဲမှုများ ပိုမို ပြုလုပ်လာပြီး ပြည်သူလူထု၏ စားဝတ်နေရေးအတွက် အဓိက အားထားရသော စိုက်ပျိုးမြေ ဧရိယာများတွင် သီးနှံများ မရိတ်သိမ်းနိုင်စေရန်နှင့် မစိုက်ပျိုးနိုင်စေရန် ပစ်မှတ်ထား တိုက်ခိုက်လာသည်ကို တွေ့ရှိရသည်ဟု KnHRG က ဆိုသည်။
#MeKongNews
#စစ်ကောင်စီ
#ဒရုန်းဗုံး
#ကရင်နီပြည်သူ
#သေဆုံး
