မဲခေါင်၊ ဇန်နဝါရီ ၁၉
ဒေါ်နယ်ထရမ့်၏ ဂါဇာပဋိပက္ခ အဆုံးသတ်ရေး ကျယ်ပြန့်သော အစီအစဉ်နှင့် ငြိမ်းချမ်းရေးဘုတ်အဖွဲ့ ထူထောင်ပြီး အမေရိကန်က ဦးဆောင်မှုတွင် ပါဝင်ရန် အမေရိကန်သမ္မတ ဒေါ်နယ်ထရမ့်ထံမှ ဖိတ်ကြားမှုကို လက်ခံ ရရှိထားကြောင်း ထိုင်းနိုင်ငံခြားရေးဝန်ကြီးဌာန – MFA က ပြောကြားပြီး ထိုင်းနိုင်ငံက အသေးစိတ်ကို လေ့လာနေသည်ဟု ဆိုသည်။
အရှေ့အလယ်ပိုင်းတွင် တည်မြဲသော ငြိမ်းချမ်းရေးကို အထောက်အကူပြုမည့် အစီအစဉ်များနှင့် ပါလက်စတိုင်း ပြည်သူများ၏ ဒုက္ခခံစားရမှုများကို အဆုံးသတ်စေမည့် လူသားချင်း စာနာထောက်ထားရေး ကြိုးပမ်းမှုများကို ထိုင်းနိုင်ငံက ကြိုဆိုသည်ဟု MFA က ပြောသည်။
၎င်းအစီအစဉ်က ပါလက်စတိုင်း ပြည်သူများ၏ဆန္ဒကို ထင်ဟပ်ပြီး ဒေသတွင်း နိုင်ငံများ၏ ထောက်ခံမှု ရမည်ဟုလည်း မျှော်လင့်ကြောင်း MFA က ဆိုသည်။
ငြိမ်းချမ်းရေးဘုတ်အဖွဲ့သည် ထရမ့်၏ ဂါဇာအစီအစဉ်အရ အချက် ၂၀ ပါသော လမ်းပြမြေပုံ၏ တစ်စိတ်တပိုင်း ဖြစ်ကာ ထရမ့် မူဘောင်အရ ဖွဲ့စည်းထားသော အခြား အဖွဲ့အစည်းများ နှင့်အတူ ဂါဇာ၏ ပဋိပက္ခမှ ပြန်လည်တည် ဆောက်ရေး အသွင်ကူးပြောင်းမှုအတွက် မဟာဗျူဟာမြောက် ကြီးကြပ်မှုပေးပြီး အရင်းအမြစ်များကိုလည်း အသုံးချနိုင်မည် ဖြစ်သည်။
လက်ရှိကုလသမဂ္ဂ၏ လုပ်ငန်းစဉ်များကို ဘေးရောက်သွားစေနိုင်သော စိုးရိမ်မှုများနှင့်အတူ အဆိုပြုထားသော ဘုတ်အဖွဲ့ကို အစိုးရအဖွဲ့များက သတိထား၍ တုံ့ပြန်နေကြသည်ဟု ရိုက်တာသတင်းက ဖော်ပြသည်။
ဘုတ်အဖွဲ့တွင် အမြဲတမ်းအဖွဲ့ဝင် အဖြစ်ပါဝင်ရန် အမေရိကန်ဒေါ်လာ တစ်ဘီလီယံ ထည့်ဝင်ရမည်ဟုလည်း မူကြမ်းစည်းမျဉ်းတွင် ဖော်ပြထားကြောင်း ရိုက်တာက ဆိုသည်။
ကုလသမဂ္ဂ လုံခြုံရေးကောင်စီကမူ ပို၍ကျယ်ပြန့်သော လုပ်ပိုင်ခွင့်များ မပေးဘဲ ဂါဇာကို အဓိကထားသည့် တာဝန် အပ်နှင်းမှုကိုသာ ဘုတ်အဖွဲ့အတွက် ခွင့်ပြုထားကြောင်း သိရသည်။
နိုင်ငံတကာဥပဒေနှင့် သက်ဆိုင်ရာ ကုလဆုံးဖြတ်ချက်များ အပေါ် အခြေခံ၍ အစ္စရေးနှင့် ပါလက်စတိုင်းနိုင်ငံ ငြိမ်းချမ်းလုံခြုံစွာ အတူယှဉ်တွဲနေထိုင်ရေးနှင့် ၂ နိုင်ငံ အဖြေရှာရေးမူ အောင်မြင်ရေး သက်ဆိုင်သူ အားလုံး၏ ကြိုးပမ်းအား ထုတ်မှုများကို ထောက်ခံကြောင်း ထိုင်းနိုင်ငံက ထပ်မံ အတည်ပြုလိုက်သည်ဟု MFA ထုတ်ပြန်ချက်က ဆက်လက် ဖော်ပြသည်။
အေးကျော်
Ref:The Nation
#ထရမ့်
#ငြိမ်းချမ်းရေးဘုတ်အဖွဲ့
#ထိုင်း
#ဖိတ်ခေါ်
