မဲခေါင်၊ ဇန်နဝါရီ ၁၆
ရှမ်းပြည်မြောက်ပိုင်း၊ သီပေါမြို့နယ်အတွင်းရှိ ခြံထွက်သီးနှံများအား အခြားမြို့နယ်များသို့ တင်ပို့ရောင်းချရာတွင် စစ်ကောင်စီ ဌာနာဆိုင်ရာများမှ ထောက်ခံစာပေါင်းစုံ ယူနေရသဖြင့် လုပ်ငန်းများကြန့်ကြာကာ တောင်သူများ အခက်အခဲကြုံနေရကြောင်း သတင်းရင်းမြစ်များထံမှ သိရသည်။
စစ်ကောင်စီ၏ စိုက်ပျိုးရေးဌာနနှင့် ထွေအုပ်တို့၏ ထောက်ခံချက်များ မပါပါက တရုတ်နိုင်ငံမှ ဝင်ရောက်လာသည့် ကုန်ပစ္စည်းများဟု စွပ်စွဲကာ စစ်ကောင်စီ စစ်ဆေးရေးဂိတ်များက မတရားဖမ်းဆီးခြင်းနှင့် ငွေတောင်းခြင်းများ ပြုလုပ်ကြသဖြင့် ထောက်ခံစာများ ယူရခြင်းဖြစ်ကြောင်း သတင်းရင်းမြစ်များက ပြောသည်။
“သူတို့ ထောက်ခံစာမပါရင် တရုတ်ပစ္စည်းဆိုပြီး ကားတွေလျှောက်ဖမ်း ငွေတွေ လျှောက်တောင်းတာဗျ။ ကိုယ့့် ခြေလက်နဲ့ စိုက်ပျိုးတဲ့ ကိုယ့်ခြံထွက်ပစ္စည်း ရောင်းတာတောင်မှ သူတို့ ထောက်ခံချက် ယူနေရတာမျိုးက မဟုတ်သေးဘူး၊ လွတ်လပ်မှု မရှိဘူးပေါ့ဗျာ။ အကျိုးမရှိတဲ့ ကြိုးနီစနစ်တွေ”ဟု သတင်းရင်းမြစ်တစ်ဦးက ပြောသည်။
ထို့သို့ ထောက်ခံစာယူ၍ ခြံထွက်ပစ္စည်းကို ရောင်းဝယ်သော်လည်း လမ်းခရီးတွင်ရှိသည့် စစ်ကောင်စီဂိတ်များကိုမူ ငွေပေးနေရဆဲ ဖြစ်ကြောင်းလည်း ၎င်းက ဆိုသည်။
“ထောက်ခံစာက ထောက်ခံစာပဲ ကားတွေ ပစ္စည်းတွေ အဖမ်းမခံရအောင် ကူပေးနိုင်တာပဲ ရှိတယ်။ ဂိတ်ကတောင်းတဲ့ ပိုက်ဆံကိုတော့ မပေးမနေရပဲဟေ့”ဟု သီပေါမြို့နယ် သတင်းရင်းမြစ်တစ်ဦးကပြောသည်။
ထို့ပြင် သီပေါမြို့နယ်ထွက် ပျားလိမ္မော်များကို ရန်ကုန်သို့ပို့ရန် ထောက်ခံစာယူနေရပြီး သီပေါတံတား ပိတ်ထားသဖြင့်လည်း စိုက်ပျိုးရေးခြံနှင့် တောင်သူများ အခက်ကြုံ နေကြရကြောင်း သိရသည်။
ပျားလိမ္မော်များ သယ်ယူရန် ဒေသထွက်ကုန် ဖြစ်ကြောင်း သီပေါရှိ စစ်ကောင်စီ၏ ထွေအုပ်နှင့် စိုက်ပျိုးရေးဦးစီးမှူး ထောက်ခံစာပါမှသာ ရန်ကုန်သို့ ပို့ခွင့်ရပြီး နေ့စဉ် ယူနေရသဖြင့် အခက်အခဲ ကြုံနေရခြင်းဖြစ်ကြောင်း သိရသည်။
ပျားလိမ္မော်ခြံများမှာ သီပေါမှ လားရှိုးသွားလမ်း မြို့ဟောင်းနှင့် ကွန်ခိုက်အုပ်စု၊ နမ့်အွန် ကျေးရွာများတွင် အများအပြား ရှိနေပြီး သီပေါတံတားကို ခြေလျင်ဖြတ်၍ ထောက်ခံစာများ သွာရောက် ယူနေကြရခြင်း ဖြစ်သည်။
“သီပေါ ပျားလိမ္မော် တင်ဖို့ကို ထောက်ခံစာပါမှ တင်လို့ရတယ်။ ဒီစာရွက်မပါရင် တင်မရဘူး။ သီပေါသွားပြီး လုပ်လို့ရတာ သီပေါတံတားလည်း ပိတ်နေတုန်းပဲ အခုထိ လမ်းလျှောက် သွားယူရတာ နေ့တိုင်းပဲ။ ခြေထောက် ညောင်းကိုက်နေပြီ နေ့တိုင်းသွားယူနေတော့”ဟု လုပ်ငန်းရှင်တစ်ဦးက ၎င်း၏ လူမှုကွန်ရက်တွင် ပြောထားသည်။
ရှမ်းမြောက်မှ တရုတ်ကုန်စည် တင်သွင်းမှုများကို တရားမဝင် ကုန်စည်အဖြစ် စစ်ကောင်စီက တားဆီး ပိတ်ပင်ခဲ့ပြီးနောက် ဖမ်းဆီးမှုများ ပြုလုပ်လာခဲ့ရာ ပြည်တွင်း စိုက်ပျိုးတောင်သူများ အတွက်ပါ အခက်ကြုံလာရခြင်း ဖြစ်သည်။
အထူးသဖြင့် ပြည်တွင်း စိုက်ပျိုးရေးသီးနှံများပင် တင်ပို့ခွင့် ခက်ခဲလာနေခြင်း ဖြစ်သည်။
“ထောက်ခံစာပြလည်း ပေးတာက ပေးရတာပါပဲ၊ အဆင်မပြေရင် အသီးတင်ဖာတွေ ပျက်စီးတဲ့အထိ စစ်ဆေး မခံနိုင်တော့ ပေးရတာပေါ့။ မှတ်ထားတာ ရန်ကုန်အထိ ၅ ထောင်၊ တစ်သောင်း ပေးရတဲ့ ဂိတ်အစုံ ၂၃ ဂိတ် ရှိတယ်”ဟု ယာဥ်မောင်းတစ်ဦးက ပြောသည်။
ရှမ်းမြောက်မှ သယ်ယူလာသည့် ကုန်များကို တရားမဝင် ကုန်စည်များဟု အမည်တပ်ကာ စစ်ကောင်စီတပ်က မတရား ဖမ်းဆီးနေပြီး ယခု ဇန်နဝါရီလအတွင်း ကုန်ကားအစီး ၈၀ ထက်မနည်း ဖမ်းဆီးခဲ့သည်။
#MeKongNews
#သီပေါ
#ခြံထွက်သီးနှံ
#တင်ပို့
#ထောက်ခံစာ
#တောင်သူ
