– အယ်ဒီတာ့အာဘော် –
ပြီးခဲ့သည့် ၂၀၂၅ ခုနှစ်၊ နှစ်လယ်ပိုင်းက မြဝတီနှင့် ဘုရားသုံးဆူ ဒေသများတွင် အွန်လိုင်းငွေလိမ်လည်မှု (ကျားဖြန့်) လုပ်ငန်းများကို အရှိန်အဟုန်ဖြင့် ဖမ်းဆီးနှိမ်နင်းခဲ့ရာမှ လွင့်စင်လာသော ရာဇဝတ်ဂိုဏ်းများသည် ယခုအခါ ရှမ်းပြည်နယ်အရှေ့ပိုင်း၊ တာချီလိတ်မြို့အတွင်းသို့ အလုံးအရင်းဖြင့် ပြန်လည်ဝင်ရောက် အခြေချနေပြီဖြစ်သည်။ စုံစမ်းသိရှိရသည့် အချက်အလက်များအရ ယင်းဒုစရိုက်လုပ်ငန်းအများစုမှာ စစ်ကောင်စီတပ်အပါအဝင် လက်နက်ကိုင်တပ်ဖွဲ့များနှင့် ဆက်စပ်နေပြီး ကိုယ်ကျိုးစီးပွားအတွက် မျက်ကွယ်ပြုကာ လက်ခံထားကြကြောင်း သိရသည်။
ဤလုပ်ရပ်သည် ဒေသခံပြည်သူလူထု၏ အသက်အိုးအိမ်စည်းစိမ်ကို လောင်းကြေးထပ်ကာ အာဏာပိုင်အချို့နှင့် လက်နက်ကိုင်အဖွဲ့အစည်းအချို့က ကိုယ်ကျိုးရှာနေသည့် အောက်တန်းကျသော လုပ်ရပ်ပင်ဖြစ်သည်။
ကျားဖြန့်လုပ်ငန်းခွင် တစ်ခုလျှင် တစ်လ ဘတ် ၃၅ သိန်း၊ ပျမ်းမျှ တရုတ်နိုင်ငံသား တစ်ဦးလျှင် ဘတ် ၃ သောင်းနှုန်းဖြင့် လာဘ်ငွေယူကာ ဒုစရိုက်သမားများကို ခိုလှုံခွင့်ပေးထားခြင်းသည် တာချီလိတ်မြို့၏ လုံခြုံရေးကို အပုပ်နံ့နံသော ငွေစက္ကူများဖြင့် လဲလှယ်လိုက်ခြင်းဖြစ်သည်။ အာဏာပိုင်များအနေဖြင့် တစ်လလျှင် ရရှိမည့် သန်းနှင့်ချီသော ဘတ်ငွေများကို ကြည့်နေသော်လည်း ယင်းလုပ်ငန်းများကြောင့် နောက်ဆက်တွဲဖြစ်လာမည့် လူကုန်ကူးမှု၊ လူသတ်မှု၊ ပြန်ပေးဆွဲမှုနှင့် မူးယစ်ဆေးဝါး ရာဇဝတ်မှုများကိုမူ လျစ်လျူရှု့ထားကြသည်။
မကြာသေးမီက ဖြစ်ပျက်ခဲ့သည့် သမိုင်းသင်ခန်းစာကို ပြန်ကြည့်လျှင် ကျားဖြန့်များကြောင့် တာချီလိတ်နှင့် ရှမ်းအရှေ့ဒေသကို ထိုင်းနိုင်ငံဘက်က လျှပ်စစ်မီးနှင့် စက်သုံးဆီ ဖြတ်တောက်ခဲ့ဖူးသည့် သာဓကများရှိသည်။ ထိုစဉ်က အကျိုးဆက်ကို ခံစားခဲ့ရသူမှာ အကျင့်ပျက် အာဏာပိုင်များမဟုတ်ဘဲ သာမန်အရပ်သား ပြည်သူများသာ ဖြစ်သည်။ အကယ်၍ ယခုတစ်ကြိမ်တွင်လည်း ကျားဖြန့်များကို ဆက်လက်လက်ခံထားပါက နိုင်ငံတကာ၏ ဖိအားနှင့် အိမ်နီးချင်းနိုင်ငံများ၏ ပိတ်ဆို့မှုဒဏ်ကို ဒေသခံပြည်သူများကသာ ထပ်မံခါးစည်းခံရဦးမည်မှာ မလွဲဧကန်ဖြစ်သည်။
ထို့ကြောင့် အာဏာပိုင်များနှင့် လက်နက်ကိုင်တပ်ဖွဲ့များအနေဖြင့် မိမိတို့၏ ရေတိုကိုယ်ကျိုးစီးပွားအတွက် ဒေသတစ်ခုလုံးကို ဓားစာခံမလုပ်ရန် ပြင်းပြင်းထန်ထန် သတိပေးလိုသည်။ ဒုစရိုက်သမားများကို ခိုလှုံခွင့်ပေးနေခြင်းအား ချက်ချင်းရပ်တန့်ပြီး နှိမ်နင်းမှုများ ပြုလုပ်ရန် လိုအပ်သည်။
တစ်ဆက်တည်းမှာပင် မိမိတို့ရပ်ကွက်၊ မိမိတို့ဝန်းကျင်၌ ကျားဖြန့်လုပ်ငန်းများ ပြန်လည်အခြေချလာသည်ကို တွေ့ရှိပါက ဒေသခံပြည်သူများအနေဖြင့်လည်း နှုတ်ဆိတ်မနေကြရန် တိုက်တွန်းလိုပါသည်။ ယင်းအချက်အလက်များကို ခိုင်လုံသော သတင်းဌာနများထံ ဆက်သွယ်တိုင်ကြားခြင်းဖြင့် လူထုအသံကို မြှင့်တင်ကြရမည်ဖြစ်သည်။
တာချီလိတ်မြို့ကို ဒုစရိုက်သမားများ၏ နားခိုရာ နိဗ္ဗာန်ဘုံအဖြစ်မှ ကာကွယ်ရန်မှာ အာဏာပိုင်တို့၏ တာဝန်ယူမှုရှိခြင်းနှင့် ပြည်သူတို့၏ စောင့်ကြည့်မှုအပေါ်တွင်သာ မူတည်နေပါသည်။ ကိုယ်ကျိုးစီးပွားထက် ဒေသခံတို့၏ ဘေးကင်းလုံခြုံရေးကို ရှေးရှုကြရန် အချိန်နှောင်းမသွားမီ တိုက်တွန်းလိုက်ရပါသည်။
#MeKongNews
#အယ်ဒီတာ့အာဘော်
#ကျားဖြန့်
#တာချီလိတ်
