မဲခေါင် ၊ ဇန်နဝါရီ ၁၅
ဓနုဒေသအတွင်းရှိ တော်လှန်ရေးတပ်ဖွဲ့များ အချင်းချင်းကြား အထင်အမြင်လွဲ သွေးကွဲစေရန် စစ်ကောင်စီ လက်ကိုင်တုတ်များက အကောင့်တုများဖြင့် လှုံ့ဆော်နေသည်ကို မယုံကြည်ကြရန် ဓနု PDF အမှတ် – ၁၀၀၃ တပ်ရင်းက ယမန်နေ့က သတိပေး ထုတ်ပြန်သည်။
ဘုံရန်သူ စစ်ကောင်စီကို တော်လှန်နေကြသည့် ဓနုဒေသအတွင်းရှိ မဟာမိတ် တပ်ရင်းတပ်ဖွဲ့များနှင့် ပြည်သူ့ကာကွယ်ရေး တပ်ရင်းတပ်ဖွဲ့များအား တစ်ဖွဲ့နှင့် တစ်ဖွဲ့ အထင်အမြင် လွဲမှားစေရန် ရည်ရွယ်၍ စစ်ကောင်စီ လက်ကိုင်တုတ်များက အွန်လိုင်းပေါ်တွင် အကောင့်တုများဖြင့် ဝါဒဖြန့် သွေးထိုး လှုံ့ဆော်မှုများ ရှိနေသည်ဟု အမှတ် – ၁၀၀၃ တပ်ရင်းက ဆိုသည်။
“ထို့ကြောင့် မိမိတို့ ဓနုဒေသအတွင်းရှိ တိုင်းရင်းသား ညီအကို ပြည်သူများအနေဖြင့် တစုံတရာ စိုးရိမ်သောက မဖြစ်ကြဘဲ ဘုံရန်သူ စစ်အာဏာရှင် ပြုတ်ကျရေး အတွက်သာ အာရုံစိုက် ပူးပေါင်း တော်လှန်သွားကြဖို့ကိုဘဲ အတူတူ ဆောင်ရွက်ကြပါရန် မေတ္တာရပ်ခံ ပန်ကြားအပ်ပါသည်” ဟု ထုတ်ပြန်ချက်က ဆိုသည်။
ထို့ပြင် ယင်းဝါဒဖြန့် လှုံ့ဆော်မှုများသည် စစ်ကောင်စီ၏ လက်ကိုင်တုတ်များက စစ်အာဏာရှင် အလိုကျ ထင်ရာမြင်ရာကို အချက်အလက် အကြောင်းအကျိုး မခိုင်လုံဘဲ တော်လှန်ရေး အဖွဲ့များကြား သွေးထိုး သွေးခွဲနေသည့် ရေသားချက်များသာ ဖြစ်သည်ဟု ထုတ်ပြန်ချက်တွင် ဆိုသည်။
စစ်ကောင်စီ လက်ကိုင်တုတ်များ၏ အထောက်အထားမဲ့ ရေးသား ဝါဒဖြန့်မှုများကြောင့် စိုးရိမ်စိတ်ဖြင့် သတင်း မေးမြန်းကြသည့် ပြည်သူများ စိုးရိမ် ကြောင့်ကြစိတ် မဖြစ်စေရန် ရည်ရွယ်၍ ယခုကဲ့သို့ ရှင်းလင်း ထုတ်ပြန်ရခြင်း ဖြစ်သည်ဟု အမှတ် – ၁၀၀၃ တပ်ရင်းက ဆိုသည်။
ယခင်တွင် ဓနုတိုင်းရင်းသား လက်နက်ကိုင် တော်လှန်ရေးတပ်ဖွဲ့ မရှိခဲ့သော်လည်း စစ်ကောင်စီက အာဏာသိမ်းပြီးနောက် ဓနု တိုင်းရင်းသားများသည် စစ်အာဏာရှင်ကို လက်နက်ကိုင် တော်လှန်လာခဲ့ကြပြီး လက်ရှိတွင် ဓနုအခြေစိုက် တော်လှန်ရေးတပ်ဖွဲ့ ၃ ဖွဲ့ထက်မနည်းရှိသည်။
ထိုတော်လှန်ရေး တပ်ဖွဲ့အချင်းချင်းကြား သွေးကွဲမှု ဖြစ်စေရန်လည်း စစ်ကောင်စီ၏ ဝါဒဖြန့်ချိရေးများ၊ စစ်ကောင်စီနှင့် ပူးပေါင်းနေသည့် ဒေသတွင်းရှိ အချို့က အမြဲသွေးထိုး လုပ်ဆောင်နေသဖြင့် ဓနု PDF က ယခုကဲ့သို့ ထုတ်ပြန် သတိပေးခြင်း ဖြစ်သည်။
ဓနုအခြေစိုက် အမှတ် – ၁၀၀၃ တပ်ရင်း အနေဖြင့် စစ်ကောင်စီ လက်ကိုင်တုတ်များ ဝါဒဖြန့်သကဲ့သို့ တော်လှန်ရေးတပ်ဖွဲ့ အချင်းချင်းကြား သွေးကွဲသွားမည် မဟုတ်ဘဲ ဘုံရန်သူကို တော်လှန်နေကြသည့် မဟာမိတ် အင်အားစုများနှင့် ပူးပေါင်းကာ စစ်အာဏာရှင် ပြုတ်ကျသည်အထိ တိုက်ပွဲဝင်သွားမည်ဟု ထုတ်ပြန်ချက်က ဆိုသည်။
#MeKongNews
#သွေးကွဲ
#စစ်ကောင်စီ
#ဝါဒဖြန့်
#PDF
