မဲခေါင်၊ ဇန်နဝါရီ ၁၄
ရှမ်းပြည်တွင် ဘိန်းစိုက်ပျိုးမှု ဧက တစ်သိန်း တစ်သောင်းခွဲကျော် ရှိသော်လည်း စစ်ကောင်စီက ဧက ၅ ထောင် ခန့်သာ ဟန်ပြ ဖျက်ဆီးခဲ့သည်ကို မူးယစ်ရဲတပ်ဖွဲ့က ထုတ်ပြန်သည့် အချက်အလက်များက သက်သေပြနေသည်။
စစ်ကောင်စီ၊ မူးယစ်ရဲတပ်ဖွဲ့၏ ဇန်နဝါရီ ၁၁ ရက် ထုတ်ပြန်ချက်အရ ရှမ်းပြည်တွင် ၂၀၂၅ ခုနှစ်အတွင်း ဘိန်းစိုက် ခင်း ၅၀၈၄ ဧကကို ဖျက်ဆီးခဲ့သည်ဟု ဖော်ပြထားသည်။
သို့သော် ယင်းဖျက်ဆီးခဲ့သည့် ပမာဏသည် စိုက်ပျိုးခဲ့သည့် ပမာဏနှင့် နှိုင်းယှဉ်ပါက အလွန် နည်းပါးနေသည်ကို ၎င်းတို့ ဖော်ပြသည့် အချက်အလက်များတွင် တွေ့ရသည်။
ကုလသမဂ္ဂ မူးယစ်ဆေးဝါးနှင့် ရာဇဝတ်မှုဆိုင်ရာရုံး – UNODC ၏ ထုတ်ပြန်ချက်အရ ၂၀၂၅ခုနှစ်အတွင်း ရှမ်း ပြည် တွင် ဘိန်းစိုက်ပျိုးမှု ၁၁၅၃၉၈ ဧက (၄၆၇၀၀ ဟတ်တာ) ရှိသည်ကို တွေ့ရသည်။
ထို့ကြောင့် စစ်ကောင်စီ ဖျက်ဆီးခဲ့သည့် ဘိန်းစိုက်ခင်း ပမာဏသည် စိုက်ပျိုးမှု၏ ၄ ရာခိုင်နှုန်းခန့်သာ ရှိသည် ကိုတွေ့ရသည်။
ယင်း ၄ ရာခိုင်နှုန်းခန့်တွင်လည်း အများစုမှာ ဟန်ပြ ဖျက်ဆီးနေခြင်းသာ ဖြစ်ပြီး ထိုဘိန်းစိုက်ပျိုးမှုမှ စစ်ကောင်စီတပ်ဖွဲ့များ၊ ပြည်သူ့စစ်များက ဆက်ကြေး အများအပြား ရရှိကြသည်ဟု ဒေသခံ သတင်းရင်းမြစ်များက ပြောသည်။
“ဟန်ပြဖျက်ဆီးတာ များပါတယ်။ တချို့ နေရာကျတော့လည်း ဌာနဆိုင်ရာတွေ ဖျက်ဆီးဖို့အတွက် စိုက်ခင်းတစ်ခု သပ်သပ် စိုက်ပေးရတာလည်း ရှိတယ်။ သူတို့လည်း ဒီကရတဲ့ ဆက်ကြေးနဲ့ပဲ ဝမ်းတွေဝ ငွေတွေရတော့ အပြတ် မလုပ်ရဲကြပါဘူး။ တချို့ဒေသက တောင်သူတွေ ကျတော့လည်း လမ်းပန်းဆက်သွယ်ရေး စီးပွားရေး အခွင့်အလမ်းတွေ ခက်ခဲကြတော့ ဝမ်းဝဖို့ သယ်ရပြုရ ရောင်းရလွယ်တဲ့ ဒီဘိန်းကိုပဲ မကောင်းမှန်းသိသိနဲ့ စိုက်ကြရတာပါ”ဟု သတင်းရင်းမြစ်တစ်ဦးက ပြောသည်။
ဘိန်းစိုက်ပျိုးခွင့်ရရေး စစ်ကောင်စီတပ်ဖွဲ့များ၊ ဌာနဆိုင်ရာများ ပြည်သူ့စစ်များနှင့် လက်နက်ကိုင်တပ်ဖွဲ့ အသီးသီးကို ဒေသခံပြည်သူများက အခွန်များစွာ ပေးဆောင်ရသဖြင့် စိုက်ပျိုးသူထက် ဆက်ကြေးတောင်းသူက ပိုပြီး စီးပွားဖြစ်နေသည်ဟုလည်း သတင်းရင်းမြစ်များ၏ ပြောကြားချက်အရ သိရသည်။
“ကိုယ့်ကို ရွှေဥပေးနေတဲ့ ငန်းကို ဘယ်သူက သတ်မှာလည်းဗျာ။ စိုက်ပျိုးသူက ငန်းစာကျွေးတဲ့သူ အဆင့်ပါပဲ၊ ဆက်ကြေးယူတဲ့ အဖွဲ့တွေကမှ ရွှေဥ ပိုင်ရှင်တွေပါ။ သူတို့တွေပဲ အကျိုးအမြတ် ခံစားရတာ စိုက်တဲ့ တောင်သူကတော့ နာမည်ကြီးထမင်းငတ် အကြွေးပါတင်တဲ့နှစ်လည်းရှိတယ်”ဟု ပင်လောင်းဒေသခံ ခွန်လတီးက ဆိုသည်။
ရှမ်းပြည်တွင် တောင်ပိုင်း၏ ဘိန်းစိုက်ပျိုးမှု ၅၇၃၂၈ ဧက ဖြင့် အများဆုံးဖြစ်ကာ မြို့နယ်အနေဖြင့် စစ်ကောင်စီနှင့် ပြည်သူ့စစ်များ ထိန်းချုပ်ထားသည့် လွိုင်လင်၊ ဟိုပုံး၊ ဆီဆိုင်၊ ညောင်ရွှေ၊ ပင်လောင်း၊ နမ့်စန်၊ ဖယ်ခုံတို့တွင် စိုက်ပျိုးမှု အများဆုံးဖြစ်သည်။
UNODC ၏ ၂၀၂၅ ထုတ်ပြန်ချက် မြေပုံအရ ရှမ်းပြည်အတွင်းရှိ ဘိန်းစိုက်ပျိုးမှုများ၏ ၈၀ ရာခိုင်နှုန်း ထက်မနည်းမှာ စစ်ကောင်စီနှင့် ပြည်သူ့စစ်၏ ထိန်းချုပ်မှုဒေသတွင် တည်ရှိသည်ကို တွေ့ရသည်။
#MeKongNews
#ရှမ်းပြည်
#ဘိန်းခင်း
#ဖျက်ဆီးမှု
#စစ်ကောင်စီ
