မဲခေါင်၊ ဇန်နဝါရီ ၁၃
ဗင်နီဇွဲလား အတိုက်အခံ ခေါင်းဆောင် မာရီယာကော်ရီနာ မာချာဒိုနှင့် အမေရိကန်သမ္မတ ဒေါ်နယ်ထရမ့်တို့ ကြာသာပတေးနေ့တွင် တွေ့ဆုံမည်ဖြစ်ကြောင်း အိမ်ဖြူတော်က အတည်ပြု ပြောကြားသည်။
အမေရိကန်တပ်ဖွဲ့များက စစ်ဆင်ရေးတစ်ရပ်ဖြင့် ဗင်နီဇွဲလားသမ္မတ မာဒူရိုကို ကာရာကတ်စ်တွင် ဖမ်းဆီးခဲ့ပြီး နောက် မာချာဒို၏ ခရီးစဉ် ထွက်ပေါ်လာခြင်း ဖြစ်သည်။
သို့သော် ၂၀၂၄ ခုနှစ်က အပြိုင်အဆိုင် အငြင်းပွားခဲ့ကြသော ရွေးကောက်ပွဲ၌ ၎င်းတို့ အနိုင်ရရှိခဲ့သည်ဟု မာချာဒို၏ ထောက်ခံသူများက ပြောသော်လည်း မာချာဒိုအား ဗင်နီဇွဲလားခေါင်းဆောင်သစ်အဖြစ် ထောက်ခံပေးရန် ထရမ့်က ငြင်းဆန်ခဲ့သည်။
ထိုအစား ဗင်နီဇွဲလား၏ ဒုသမ္မတ မစ္စဒယ်လ်စီ ရိုဒရီဂွက်စ်ကိုသာ အမေရိကန်က ထောက်ခံခဲ့သည်။
မာဒူရိုအား အရေးယူခဲ့ခြင်းအတွက် ၎င်းအနေဖြင့် ထရမ့်အား ကိုယ်တိုင်ကိုင်ကျ ကျေးဇူးတင်စကားပြောကြားလိုပြီး ထရမ့်ကိုလည်း ၎င်းရရှိခဲ့သော ငြိမ်းချမ်းရေးနိုဘယ်ဆုကို လွှဲပေးလိုကြောင်း မာချာဒိုက ပြီးခဲ့သည့် သီတင်းပတ် အတွင်း ပြောကြားခဲ့သည်။
ယင်းမှာ ကြီးကျယ်သော ဂုဏ်ပြုမှုဖြစ်မည်ဟု ထရမ့်က ပြောကြားခဲ့သော်လည်း နိုဘယ်ဆုမှာ လွှဲပြောင်းပေး၍ မရကြောင်း နိုဘယ်ဆုကော်မတီက ရှင်းလင်း ပြောကြားသည်။
ငြိမ်းချမ်းရေး နိုဘယ်ဆုကို လက်ခံရန် မာချာဒို၏ ဆုံးဖြတ်ချက်ကို သဘောမကျကြောင်း ထရမ့်က အစောပိုင်းတွင် ပြောကြားခဲ့ပြီး ထိုဆုကို ၎င်း အလွန် မက်မောသည်ဟု ဆိုသည်။
ယင်းဆုကို လက်ခံရရှိခဲ့ပါက ဗင်နီဇွဲလားမှ မာချာဒို၏ အခန်းကဏ္ဍအပေါ် အမြင်ပြောင်းလဲသွားနိုင်သလားဟု သောကြာနေ့က မေးမြန်းရာတွင်လည်း “ သူ့အနေနဲ့ တချို့အစိတ်အပိုင်းကနေ ပါဝင်လာနိုင်ပါတယ်” ဟု ထရမ့်က ဖြေကြားသည်။
လက်ရှိအချိန်အထိ မာဒူရို၏လက်ထောက် ဒယ်လ်စီရိုဒရီဂွက်စ်အား ဗင်နီဇွဲလား ကြားဖြတ် သမ္မတ အဖြစ် အမေရိကန်က ထောက်ခံထားသည်။
ရိုဒရိုဂွက်စ်အား မဟာမိတ်တစ်ဦးအဖြစ် ထရမ့်က ပြောကြားပြီး အမေရိကန် အရာရှိများကလည်း ၎င်းကို မည့်သည့်ပြစ်မှုနှင့်မှ စွဲချက်မတင်ထားပေ။
“ဒယ်လ်စီရိုဒရိုဂွက်စ် နဲ့ သူ့အဖွဲ့က အမေရိကန်နဲ့ ပူးပေါင်း ဆောင်ရွက်နေပါတယ်” ဟု အိမ်ဖြူတော် ပြန် ကြားရေးမှူး ကယ်ရိုလင်းလီဗစ်က ယမန်နေ့တွင် ပြောသည်။
မာချာဒိုကမူ ၎င်းတို့မဟာမိတ်အဖွဲ့က ဗင်နီဇွဲလားတွင် ထိန်းချုပ်မှု ရယူထားသူ လုံးဝ ဖြစ်သင့်သည်ဟု ခံယူထားဆဲ ဖြစ်သည်။
ဗင်နီဇွဲလားနိုင်ငံတွင် ရိုဒရီဂွက်စ်အား မည်သူကမျှ ယုံကြည်မှု မရှိကြကြောင်း၊ ၎င်းသည် အပြစ်မဲ့ ပြည်သူများကို ဖိနှိပ်ခဲ့သည့် အဓိက လက်သည်တစ်ဦး ဖြစ်ကြောင်း မာချာဒိုက ဆက်ပြောသည်။
အေးကျော်
Ref: BBC
#MeKongNews
#ထရမ့်
#ဗင်နီဇွဲလား
#မာချာဒို
#အတိုက်အခံ
