မဲခေါင်၊ ဇန်နဝါရီ ၁၃
ရှမ်းပြည်မြောက်ပိုင်း၊ မိုင်းရယ်မြို့အနီးမှ သိမ်းဆည်းမိသည့် မူးယစ်ဆေးချက် ဓာတုပစ္စည်းများသည် ခန့်မှန်း ကျပ် ၁၆၂၀ ဘီလျံ တန်ဖိုးရှိ စိတ်ကြွဆေးပြား သန်း ၈၁၀ ခန့် ထုတ်လုပ်နိုင်ကြောင်း စစ်ကောင်စီ ထုတ်ပြန်ချက်က ဆိုသည်။
ပြီးခဲ့သည့်ဇန်နဝါရီ ၉ ရက်မှ ၁၁ ရက်အတွင်း သီပေါနှင့် မိုင်းရယ်မြို့နယ်များအတွင်း ကျားဖြန့်လုပ်ငန်းသုံး ပစ္စည်းများနှင့် မူးယစ်ဆေးဝါး ချက်လုပ်ရာတွင် အသုံးပြုသည့် ပစ္စည်းကိရိယာများကို သိမ်းဆည်းမိမှုနှင့် ပတ်သက်၍ စစ်ကောင်စီ၏ ဇန်နဝါရီ ၁၁ ရက် ထုတ်ပြန်ချက်တွင် ထိုသို့ ဖော်ပြထားခြင်း ဖြစ်သည်။
ယင်းတွင် မိုင်းရယ်မြို့ အနောက်တောင်ဘက် ၂၀ ကီလိုမီတာခန့် အကွာရှိ ဒုတိယနေရာမှ သိမ်းဆည်းမိသော ဓာတုပစ္စည်းများ အပေါ် ခန့်မှန်း တွက်ချက်မှုအရ ကျပ် ၅၄၀ ဘီလျံ တန်ဖိုးရှိ အိုက်စ် ၂၇ တန်ခန့် ထုတ်လုပ်နိုင်ပြီး စိတ်ကြွဆေးပြားအဖြစ် ပြောင်းလဲ ထုတ်လုပ်ပါက အပြား သန်း ၈၁၀ ခန့် ထုတ်လုပ်နိုင်မည်ဟု ဆို သည်။
ယင်းစိတ်ကြွဆေးပြားများသည် ဈေးကွက်အတွင်း၌ ကျပ် ၁၆၂၀ ဘီလျံခန့် တန်ဖိုးရှိသွားနိုင်ပြီး မူးယစ်ဆေးဝါး ချက်လုပ်ရာတွင် အသုံးပြုသည့် ပစ္စည်းကိရိယာများကို သုံးသပ်ချက်အရ အိုက်စ် ၂၇ တန် သို့မဟုတ် စိတ်ကြွ ဆေးပြား သန်း ၈၁၀ ခန့်ထက် ပိုသည့် မူးယစ်ဆေးဝါးများကို ပုံမှန် ထုတ်လုပ်နေခြင်းဖြစ်ကြောင်း စိစစ်တွေ့ရှိရသည်ဟု စစ်ကောင်စီက ဆိုထားသည်။
ထို့ပြင် ဒုတိယနေရာနှင့် အနောက်တောင်ဘက် ၁၉ ကီလိုမီတာခန့်အကွာ တတိယနေရာတို့တွင် GUAN YIN WANG စာတန်းပါ ထုပ်ပိုးခွံများနှင့် တရုတ်စာတန်းပါ ထုပ်ပိုးခွံ အမြောက်အမြားကိုလည်း သိမ်းဆည်းမိခဲ့ကြောင်း သိရသည်။
ပြီးခဲ့သည့် ၂၀၂၅ ခုနှစ်အတွင်း မြန်မာ တစ်နိုင်ငံလုံးတွင် ဖမ်းဆီးရမိခဲ့သည့် အိုက်စ် ၃၇ ဒသမ ၈၁၅ တန် အနက် GUAN YIN WANG စာတန်းပါ ထုပ်ပိုးခွံဖြင့် ထုပ်ပိုးထားသည့် အိုက်စ် ၁၁ ဒသမ ၆၈၆ တန်နှင့် တရုတ်စာတန်းပါ ထုပ်ပိုးခွံဖြင့် ထုပ်ပိုးထားသည့် အိုက်စ် ၀ ဒသမ ၉၆ တန်၊ စုစုပေါင်း ၁၂ ဒသမ ၆၄၆ တန် (စုစုပေါင်းကာလတန်ဖိုး ကျပ် ၂၅ ဒသမ၂၉၂ ဘီလျံ) ဖမ်းဆီးရမိခဲ့ကြောင်း စိစစ်တွေ့ရှိရသဖြင့် ယင်းနေရာ ၂ ခုမှ ထုတ်လုပ် ဖြန့်ဖြူးခဲ့သည့် ပမာဏမှာ ၂၀၂၅ ခုနှစ် အတွင်း တစ်နိုင်ငံလုံး၌ ဖမ်းဆီးရမိခဲ့သည့် အိုက်စ်ပမာဏ၏ ၃၃ ဒသမ ၄၄ ရာခိုင်နှုန်းခန့် ရှိကြောင်း သိရသည်။
ယခု ဇန်နဝါရီ ၁၀ နှင့် ၁၁ရက်များတွင် ဖော်ထုတ် ဖမ်းဆီးမိခဲ့သည့် မူးယစ်ဆေးဝါး ချက်လုပ်သည့်နေရာ ၃ ခုသည် မြန်မာနိုင်ငံအတွင်း မူးယစ်ဆေးဝါး ထုတ်လုပ်သည့် ပင်ရင်းနေရာများ ဖြစ်ကြောင်း စစ်ကောင်စီ ထုတ်ပြန်ချက်က ဆိုသည်။
“ဒါဟာ နည်းနည်းနောနော မဟုတ်ဘူးဗျ။ တော်တော်ကြီးတဲ့ လုပ်ငန်းပဲ၊ ပါဝင်ပတ်သက် တာတွေလည်း ထိပ်တန်း အဆင့်ဖြစ်မယ်”ဟု နိုင်ငံရေး အကဲခတ်တစ်ဦးက သုံးသပ်သည်။
ဖမ်းဆီးမိ နေရာများသည် SSPP လှုပ်ရှားသည့် နေရာများ ဖြစ်သော်လည်း ယင်းပစ္စည်းများနှင့် လုံးဝပတ် သက်မှုမရှိကြောင်း SSPP က စာထုတ်ငြင်းဆိုထားပြီး ပါဝင် ပတ်သက်သူများကို စိစစ် အရေးယူသွားမည်ဟု ဆိုထားသည်။
#MeKongNews
#သီပေါ
#မိုင်းရယ်
#မူးယစ်ဆေးချက်
#စိတ်ကြွဆေးပြား
