မဲခေါင်၊ ဇန်ဝါရီ ၁၂
ကမ္ဘောဒီးယားနိုင်ငံထဲသို့ နယ်စပ်ဖြတ်၍ တရားမဝင် ဝင်ရောက်ရန် ကြိုးစားခဲ့သော မြန်မာနိုင်ငံသား ၁၆ ဦးကို ထိုင်းလုံခြုံရေး တပ်ဖွဲ့များက ဖမ်းဆီးလိုက်သည်ဟု ထိုင်းရဲတပ်ဖွဲ့က ယနေ့ ပြောကြားသည်။
စစ်တပ် ကင်းလှည့်တပ်ဖွဲ့ဖြစ်သည့် ဘာရူပါအဖွဲ့နှင့် ခလောင်နမ်ဆိုင် ရဲတပ်ဖွဲ့က ဆာကေပြည်နယ်၊ အရန်ယာပရာသက်ခရိုင်တွင် ပူးတွဲ ကင်းလှည့်နေကြစဉ် ၎င်းတို့အား ဖမ်းမိခြင်းဖြစ်သည်။
နောင်ဖလူကျေးရွာအနီး တောလမ်းတစ်ခုတွင် ခြေလျင်သွားနေသူ လူတစ်စုအား တွေ့ရှိခဲ့ပြီးနောက် လုံခြုံရေးတပ်ဖွဲ့များက စစ်ဆေးခဲ့ခြင်း ဖြစ်သည်။
ယင်း ၁၆ ဦး စလုံးသည် မြန်မာနိုင်ငံ မန္တလေးဒေသမှ ဖြစ်ကြောင်း တွေ့ရှိခဲ့ပြီး ၎င်းတို့က ပတ်စပို့နှင့် အခြားခရီးသွား စာရွက်စာတမ်းများလည်း မပြနိုင်ခဲ့ကြောင်း အာဏာပိုင်များက ပြောသည်။
ဖေ့စ်ဘွတ်ခ်ပေါ်တွင် ကြော်ငြာနေသော တစ်လလျှင် အမေရိကန်ဒေါ်လာ ၅၀၀ ဖြင့် သန့်ရှင်းရေး အလုပ် ကို လျှောက်ထားကြရန် သူငယ်ချင်း မိတ်ဆွေများက ၎င်းတို့ကို စည်းရုံး သိမ်းသွင်းခဲ့သည်ဟု ရွှေ့ပြောင်းသူများက တာဝန်ရှိသူများကို ပြောကြားကြသည်။
၎င်းတို့က ပေ့ချ်တာဝန်ရှိသူ တစ်ဦးကို ဆက်သွယ်ခဲ့ကြကြောင်း ထို့နောက်တွင် ထိုင်းအမျိုးသားတစ်ဦးနှင့် မြန်မာအမျိုးသားတစ်ဦးတို့က အနက်ရောက် ပစ်ကပ်ကားဖြင့် ပို့ဆောင်ခဲ့ကြပြီး ကမ္ဘောဒီးယားသို့ ဆက်လက် သွားရောက်ရန် စီစဉ်ပေးခဲ့ကြသည်ဟု မြန်မာရွှေ့ပြောင်းများက ထွက်ဆိုခဲ့ကြသည်။
ထိုခရီးစဉ်အတွက် ရွှေ့ပြောင်းတစ်ဦးလျှင် ဘတ် ၁၂၀၀၀ ပေးခဲ့ရကြောင်း ရဲတပ်ဖွဲ့က ပြောသည်။
၎င်းတို့အား ဖမ်းဆီးမိချိန်၌ စောင့်ရှောက် ခေါ်ဆောင်လာသူ သို့မဟုတ် လူကုန်ကူးသူများကို မတွေ့ခဲ့ရဟု ဆိုသည်။
ယင်းအပေါ် ဆက်လက် အရေးယူရန် ၎င်းတို့အား ခလောင်နမ်ဆိုင် ရဲတပ်ဖွဲ့သို့ လွှဲပြောင်းပေးခဲ့ကြောင်း သိရသည်။
အေးကျော်
Ref: Khaosod
#MeKongNews
#ကမ္ဘောဒီးယား
#မြန်မာရွှေ့ပြောင်း
#ထိုင်းတပ်ဖွဲ့
#ဖမ်းဆီး
