မဲခေါင်၊ ဇန်နဝါရီ ၁၀
နေတိုးအဖွဲဝင် ပိုလန်နှင့် နယ်စပ်အနီးမှ ယူကရိန်း ပစ်မှတ်တစ်ခုအား အင်အား အလွန်ကောင်းသော အသံထက်မြန် ဒုံးကျည်ဖြင့် ရုရှားက ယမန်နေ့ညတွင် ပစ်ခတ်ခဲ့သည်။
ပြီးခဲ့သည့် လအတွင်း သမ္မတ ဗလာဒီမာပူတင်၏ နေအိမ်တစ်လုံးကို ယူကရိန်းက ဒရုန်းများဖြင့် တိုက်ခိုက်ရန် ကြိုးစားခဲ့ခြင်းအား တုံ့ပြန်၍ အသံထက်မြန်သော အိုရက်ရှ်နစ် ဒုံးကျည်ဖြင့် ပစ်ခတ်ခြင်းဖြစ်သည်ဟု မော်စကိုက ပြောသည်။
ယူကရိန်းကို နျူကလီးယားထိပ်ဖူး တပ်ဆင်နိုင်သည်ဆိုသော အိုရက်ရှ်နစ် ဒုံးကျည်ဖြင့် ရုရှားက တိုက်ခိုက်မှုမှာ ဒုတိယအကြိမ်မြောက် ဖြစ်သည်။
ယမန်နေ့ကညက လေကြောင်း တိုက်ခိုက်မှုများကြောင့် ကိဗ်မြို့တွင် လူ ၄ ဦးသေဆုံးခဲ့ကာ လျှပ်စစ်မီးများလည်း ပြတ်တောက်ခဲ့သည့် အပြင် ကာတာသံရုံးလည်း ပျက်စီးသွားခဲ့သည်ဟု ယူကရိန်း အာဏာပိုင်များက ပြောကြ သည်။
ပိုလန်နိုင်ငံနယ်စပ်မှ ကီလိုမီတာ ၆၀ ခန့်အကွာ ယူကရိန်း အနောက်ပိုင်း လီဗျူးဒေသမှ ပစ်မှတ်ကို အိုရက်ရှ်နစ် ဒုံးကျည် ထိမှန်ခဲ့ပြီး ၎င်းနေရာသည် ဒရုန်းများ ထုတ်လုပ်သည့် စက်ရုံနှင့် စွမ်းအင်အခြေခံ အဆောက်အဦတစ်ခု ဖြစ်ကြောင်း ရုရှားက ဆိုသည်။
“အီးယူ၊ နေတိုး နယ်စပ်နဲ့ ဒီလောက် နီးကပ်တဲ့ နေရာကို တိုက်ခိုက်တာဟာ ဥရောပတိုက် လုံခြုံရေးအပေါ် ကြီးမားတဲ့ ခြိမ်းခြောက်မှုဖြစ်သလို နေတိုးအသိုင်းအဝိုင်းကို အကဲစမ်းမှုလည်း ဖြစ်ပါတယ်” ဟု ယူကရိန်း နိုင်ငံခြားရေးဝန်ကြီး အန်ဒရီဆိုင်ဘီဟာက X လူမှုမီဒီယာပေါ်တွင် ပြောကြားသည်။
နေတိုးနယ်စပ်အနီးမှ ပစ်မှတ်ကို ထိုမျှ အားကောင်းသော ဒုံးကျည်မျိုးဖြင့် ပစ်ခတ်ခြင်းမှာ ကမ္ဘာလုံးဆိုင်ရာ ခြိမ်းခြောက်မှု ဖြစ်ကာ ကမ္ဘာလုံးဆိုင်ရာ တုံ့ပြန်မှု လိုအပ်သည်ဟု ၎င်းက ဆက်ပြောသည်။
အိုရက်ရှ်နစ်ဒုံးကျည်အား ရုရှားက အသုံးပြုခဲ့ခြင်းမှာ ယူကရိန်းအပေါ် ရှင်းလင်းသော စစ်ရှိန်မြှင့်မှု ဖြစ်ကာ ဥရောပနှင့် အမေရိကန်ကို သတိပေးခြင်း ဖြစ်ကြောင်း ဥရောပသမဂ္ဂ နိုင်ငံရေးမူဝါဒ အကြီးအကဲ ကာဂျာကဲလက်စ်က လည်း X လူမှုမီဒီယာပေါ်၌ ပြောကြားသည်။
ယမန်နေ့ညမှာပင် ရုရှားက စုစုပေါင်း ဒုံးကျည် ၃၆ စင်း နှင့် ဒရုန်း ၂၄၂ စင်း ပစ်လွှတ်ခဲ့ပြီး မြို့တော်ကိဗ်နှင့် အနောက်ပိုင်း လီဗျူးမြို့အနီးမှ အခြေခံ အဆောက်အဦများကို ပစ်မှတ်ထားခဲ့သည်ဟု ယူကရိန်းက ပြောသည်။
အေးကျော်
Ref: Reuters
#MeKongNews
#နေတိုး
#ယူကရိန်း
#ဒုံးကျည်
#ရုရှား
