မဲခေါင်၊ ဇန်နဝါရီ ၇
ဖူးခက် အပန်းဖြေစခန်း ချာလောင် ဆိပ်ခံတံတားတွင် ယနေ့နံနက် အရုဏ်မတိုင်မီ လောင်ကျွမ်းခဲ့သော မီးကြောင့် စပိဘုတ် အစီး ၂၀ ကျော် ပျက်စီးသွားခဲ့ကြောင်း ထိုင်းသတင်းများအရ သိရသည်။
မီးလောင်ရခြင်း အကြောင်းရင်းကို စုံစမ်းစစ်ဆေးရန်နှင့် လောင်စာဆီများ ပင်လယ်ထဲသို့ မပျံ့နှံ့သွားရေး အရေးပေါ် အစီအစဉ်များ လုပ်ဆောင်ကြရန် ပြည်နယ် အုပ်ချုပ်ရေးမှူးက ညွှန်ကြားထားသည်။
မူအန်းခရိုင်၊ ချာလောင်ခရိုင်ခွဲတွင် မီးလောင်မှုဖြစ်ကြောင်း ယနေ့ ဇန်နဝါရီ ၇ ရက် နံနက် ၄ နာရီခန့်တွင် ချာလောင်း ရဲစခန်းနှင့် ကယ်ဆယ်ရေးအဖွဲ့များထံ သတင်း ရောက်ရှိခဲ့သည်။
ပေါက်ကွဲမှုတစ်ခု ဖြစ်ပြီးနောက် ပထမဆုံးလှေတွင် မီးစတင် လောင်ကျွမ်းခဲ့ပြီး မီးလောင်နေသော အပိုင်းအစများကို ပင်လယ်လေများက အခြားကမ်းကပ်ထားသော စပိဘုတ်ဆီ သယ်ဆောင်သွားခဲ့ရာမှ အခြား လှေများကိုလည်း မီးကူးစက် လောင်ကျွမ်းမှု လျင်မြန်သွားခဲ့ကြောင်း မျက်မြင် သက်သေများနှင့် တာဝန်ရှိသူများက ပြောကြားကြသည်။
ကနဦး အကဲဖြတ်ချက်များအရ စပိဘုတ် အစီး ၂၀ ကျော် ပျက်စီးသွားခဲ့သည်။
မြူနီစပယ်ဒေသသုံးခုမှ မီးသတ်တပ်ဖွဲ့များ နှင့် အခြားအေဂျင်စီများက မီးကိုငြှိမ်းသတ်ရန် ကြိုးစားခဲ့ကြရာ ရေဖြန်းပက်နေရင်းမှာပင် မီးထပ်မံ ကူးစက်ခြင်းကို ကာကွယ်ရန် အခြားလှေများ၏ ကြိုးများကို ဖြတ်ကာ လှေများကို အဝေးသို့ မျှောပစ်ရန် လုပ်ဆောင်ခဲ့ကြသည်။
သို့သော် ပင်လယ်ရေ ကျဆင်းနေချိန်ဖြစ်၍ အခြားလှေများသို့ သွားရောက်ရန် အခက်အခဲများ ဖြစ်ပေါ်ခဲ့ခြင်း ကြောင့် မီးကို ချက်ချင်း မထိန်းချုပ်နိုင် ဖြစ်ခဲ့ရသည်။
မီးကို ကူညီထိန်းချုပ်ရန် မီးသတ် ဓာတုဆေးများ ယူသွားရန် နှင့် လောင်စာဆီများ ပင်လယ်ထဲသို့ မရောက်သွားစေ ရေး လုပ်ဆောင်ရန် ပြည်နယ် အုပ်ချုပ်ရေးမှူး နီရတ်ပွန်ဆစ်သာဗွန်က ဖူးခက်ရေကြောင်းဌာနရုံးအား ညွှန်ကြား ခဲ့သည်။
ဆိပ်ခံတွင် တပ်ဆင်ထားသော CCTV ရုပ်သံနှင့် အနီးဝန်းကျင်မှ စောင့်ကြည့် ကင်မရာများကိုပါ ကြည့်ရှု၍ စေ့စေ့စပ်စပ် စုံစမ်း စစ်ဆေးကြရန်လည်း အုပ်ချုပ်ရေးမှူးက ရဲတပ်ဖွဲ့နှင့်အခြားတာဝန်ရှိသူများအား ပြောကြားသည်။
ခရီးသွားများကို အနီးအနားသို့ ပို့ဆောင်ရန် အသင့်ပြင်ထားသဖြင့် လှေအများစုမှာ ဆီအပြည့် ဖြည့်ထားကြကြောင်း အရာရှိများက မှတ်ချက်ပြုသည်။
မီးလောင်မှုကြောင့် ၎င်း၏ စပိဘုတ် ၃ စီး ပျက်စီးသွားခဲ့ကြောင်းနှင့် တစ်စီးလျှင် ဘတ် ၅ သန်း တန်ကြောင်း ပိုင် ရှင်တစ်ဦးက ပြောကြားသည်။
အေးကျော်
Ref:The Nation
#MeKongNews
#ဖူးခက်
#ဆိပ်ခံတံတား
#မီးလောင်
#စပိဘုတ်
#ပျက်စီး
